ዘጸአት 1፥1-2፥10

ዮሴፍ ከሞተ በኋላ፥ የእስራኤል ሕዝብ በግብጽ ሀገር እጅግ በዙ። የእስራኤልንም ሕዝብ የሚያስጨንቅ ክፉ ንጉሥ ተነሳ። ይህም ንጉሥ ዮሴፍ ለግብጽ ያደረገውን መልካም ስራ አያውቅም ነበር። ስለዚህ ንጉሡ ከባድ ስራ እንዲሰሩ አዘዛቸው። እነርሱም እየበዙ ስለሄዱ ፈራ።

በዚህም ምክንያት ወንድ ልጅ ሲወለዱ እንዲገደል ትእዛዝ ሰጠ። አንዲት እስራኤላዊ እናት ግን ሙሴ የተባለ ሕፃን ልጅ ወለደች። ለሦሥት ወርም በቤቷ ደበቀችው።

በኋላ ግን በተንሳፋፊ ቅርጫት ውስጥ አስተኝታ በወንዝ ዳር ባለ ሣር ውስጥ አስቀመጠችው።

ብዙም ሳይቆይ የንጉሡ ልጅ አገኘችው። በጣም ስላዘነችለት ወስዳ እንደ ልጇ አድርጋ አሳደገችው።

የንጉሡ ልጅ ሙሴን ስታገኝ

ዘጸአት 2፥11-3፥22

ሙሴ በንጉሥ ቤት አደገ። እዚያም እያለ ጠንካራ እና የተማረ ሰው ሆነ። በኋላም የእስራኤልን ሕዝብ ሊረዳቸው ሞከረ። ንጉሡም ይህንን ሲሰማ ተቆጣው። ስለዚህ ሙሴ ወደ በረሀ ሸሸ። እዚያም ለብዙ ዓመታት ኖረ። ሚስትም አግብቶ ልጆችን ወለደ።

ከዕለታት አንድ ቀን ሙሴ በቁጥቋጦ ውስጥ እሳት አየ። ሆኖም ግን እሳቱ ቁጥቋጦውን አላቃጠለውም። እግዚአብሔር በቁጥቋጦው ውስጥ ነበር። እርሱም “እኔ የአብርሃም፥ የይስሐቅ እና የያዕቆብ አምላክ ነኝ። እግዚአብሔር አምላክህ ነኝ” ብሎ ተናገረው። ደግሞም እንዲህ አለው “የሕዝቤን ልቅሶ እና ጩኸት ስለሰማሁ፥ ቃል በገባሁት መሰረት እረዳቸዋለሁ” አለው።

ሙሴንም የእስራኤልን ሕዝብ ከግብጽ ሀገር ነጻ እንዲያወጣቸው አዘዘው።

ሙሴ በቁጥቋጦ ውስጥ እሳት ሲያይ

ዘጸአት 4-7

እግዚአብሔር ሙሴን ወደ ግብጽ ሀገር ሄዶ የእስራኤልን ሕዝብ ነፃ እንዲያወጣ አዝዞት ነበር። ሙሴ ግን ስለፈራ፥ ወደ ግብጽ ለመመለስ አልፈለገም። ሆኖም እግዚአብሔር ስለተናገረው ታዝዞ ሄደ። ወንድሙ አሮንም እንደሚረዳው እግዚአብሔር ነገረው። ስለዚህ ሙሴ እና አሮን ወደ ግብጽ ንጉሥ ሄደው “እግዚአብሔር ‘ሕዝቤን ልቀቅ!’ ብሎሃል” ሲሉ ተናገሩት። ንጉሡ ግን እንቢ አለ። ከዚህ በኋላ እግዚአብሔር ከሁሉ የሚበልጥ ታላቅ አምላክ መሆኑን ለማሳየት ይህ ተአምር በሙሴ እና በአሮን በኩል አደረገ፡ አሮን በትሩን ሲጥል፥ እባብ ሆነ። ይህች እባብም የሌሎቹ እባቦች ዋጠቻቸው። ቢሆንም ንጉሡ ሕዝቡን ለመልቀቅ አልፈልግም ነበር። እግዚአብሔር ግን “በእርግጥ ሕዝቤን አስለቅቃለሁ” አለ። ግብጻውያንንም ብዙ መከራ በመላክ አስጠነቀቃቸው።

የሙሴ በትር እባብ ስትሆን

ዘጸአት 12

በመጨረሻም እግዚአብሔር ለሙሴ እና ለአሮን “ለእስራኤል ሕዝብ እያንዳንዱ ቤተሰብ በግ እንዲያርድ እና ደሙን በበሩ ላይ እንዲቀባ እዘዙ!“ አላቸው። ስጋውንም ደግሞ ጠብሰው እንዲበሉ ተናገራቸው። ሕዝቡም እግዚአብሔር እንዳላቸው አደረጉ።

በዚያን ሌሊት ከግብጻውያን ብዙዎች ሞቱ። የበግ ደም በበራቸው ላይ የቀቡ እስራኤላውያን ግን ምንም ሰው አልሞተባቸውም። ከዚህ በኋላ የግብጽ ንጉሥ እስራኤላውያንን ሀገሩን ለቀው እንዲሄዱ አስቸኮላቸው። ስለዚህ በፍጥነት ከግብጽ ወጡ። እግዚአብሔር በታላቅ ኃይሉ እስራኤላውያንን ከባርነት ነፃ አወጣቸው።

እስራኤላውያን የበጉን ደም በበራቸው ላይ ሲቀቡ

ዘጸአት 14

እግዚአብሔር እንዳለው እስራኤላውያን ከግብጽ ሀገር ወጡ። እዚያ ያለውን በረሀ አቋርጠው በመሄደ ቀይ ባሕር ደረሱ። ከዚያም በኋላ ግብጻውያን በቁጣ ተከትለዋቸው መጡ። በዚህ ጊዜ እስራኤላውያን ወዴት መሸሽ እንደሚችሉ ስላላወቁ፥ በጣም ፈሩ። ስለዚህ እንዲረዳቸው ወደ እግዚአብሔር ጮኹ። እግዚአብሔርም በሙሴ በኩል ተአምር በማድረግ በፊታቸው ያለውን ባሕር ከፍሎ መንገድ አደረገላቸው። ሕዝቡም በባሕሩ መካከል በመሄድ ከጠላቶቻቸው አመለጡ። አሁንም ግብጻውያን ከኋላቸው ተከተሏቸው። ነገር ግን እስራኤላውያን ባሕሩን ከተሻግሩ በኋላ፥ እግዚአብሔር ውሃውን ወደ ግብጻውያን እንዲመለስ አደረገ። እነርሱም በውሃው ውስጥ ሞቱ። እስራኤላውያን ግን ስላዳናቸው እግዚአብሔርን በጣም አመሰገኑ።

ሙሴ እና ሕዝቡ በባሕር መካከል ሲሄዱ፥ እግዚአብሔር ከኋላቸው በደመና ውስጥ ሆኖ ሲጠብቃቸው

ዘጸአት 16-17

እስራኤላውያን አብዛኛውን ጊዜ መኖር በማይቻልበት በረሃ ውስጥ ጉዟቸውን ቀጠሉ። እግዚአብሔር ምንም በሌለበት በረሀ ለሕዝቡ ከሰማይ የሚበሉትን ምግብ ሰጣቸው። ያንንም ምግብ መና ብለው ጠሩት። እነርሱ በየቀኑ ከመሬት የሚሰበስቡትን መና ይበሉ ነበር።

እንድ ጊዜም በበረሀ እያሉ የሚጠጡት ውሃ አጡ። ከዚህም የተነሳ በሙሴ እና በእግዚአብሔር ላይ ክፉ ተናገሩ። ሕዝቡ ግን እግዚአብሔርን መታመን ነበረበት። ስለዚህ ሙሴም “ለምን በእኔ እና በእግዚአብሔር ላይ ክፉ ንግግር ተናገራችሁ?” አላቸው። ሆኖም ግን ሙሴ እግዚአብሔርን ውሃ እንዲሰጣቸው ለመነ። እግዚአብሔርም ሙሴን በበትሩ አንድ ዐለት እንዲመታ ተናገረው። ዐለት ማለት በጣም ትልቅ ድንጋይ ነው። ሙሴም በበትሩ ዐለቱን ሲመታው ውሃ ፈሰሰ። ውሃውም ከአንድ ሚሊየን በላይ ለሚሆኑ እስራኤላውያን የሚበቃ ነበር።

ሕዝቡ እግዚአብሔር የሰጣቸውን ውሃ ሲጠጡ እና ምግብ (መና) ሲሰበሰቡ

ዘጸአት 19-20 + 31፥18

አንድ ቀን እግዚአብሔር ሙሴን ወደ ሲና ተራራ ላይ እንዲወጣ ተናገረው። ሕዝቡ ግን ከእርሱ ጋር እንዲሄዱ አልተፈቀደላቸውም ነበር። እግዚአብሔርም ሙሴን በተራራ ላይ በእሳት ውስጥ ሆኖ አናገረው። በዚያም ለእስራኤል ሕዝብ አሥር ትእዛዛትን በጠፍጣፋ ድንጋይ ላይ ጽፎ እና ሌሎች ሕጎችንም ጨምሮ ሰጣቸው።

እግዚአብሔር እነዚህን ሕጎች የሰጣቸው ከእርሱ ጋር እና እርስ በእርሳቸው በሰላም እና በፍቅር እንዲኖሩ ነበር።

ሙሴ የእግዚአብሔርን አሥር ትእዛዛት ይዞ ከተራራው ሲወርድ

ዘኍልቍ 13-14

ከጥቂት ጊዜ በኋላ ሙሴ ከነዓን የምትባለው ሀገር ምን እንደምትመስል እንዲያዩ፥ አስራ ሁለት ሰዎችን ላከ። እነርሱም ሄደው በከነዓን የሚገኙትን ፍራፍሬዎች፥ ሰዎች እና ከተሞች አዩ። ከከነዓን ሲመለሱ፥ ያዩትን ሁሉ ለእስራኤል ሕዝብ ተናገሩ። ከእነርሱ አሥሩ “እግዚአብሔር እንዳለው፥ ሀገሪቱ ድንቅ ናት። ነገር ግን በዚያ የሚኖሩት ሰዎች እጅግ በጣም ረጃጅም እና ጠንካራ ስለሆኑ፥ ልናሸንፋቸው አንችልም” አሏቸው። ሕዝቡ ይህን ሲሰሙ ተስፋ ቆረጡ።

ኢያሱ እና ካሌብ የተባሉት ከአሥራ ሁለቱ ሰዎች ሁለቱ ግን ሕዝቡን አበረታቱ። ለሕዝቡም “የከነዓን ሰዎች ትልልቅ ቢሆኑም፥ እግዚአብሔር ከእኛ ጋር ስላለ፥ እናሸንፋቸዋለን” አሉ።

እስራኤላውያን የእግዚአብሔርን እርዳታ እና ተአምራት ብዙ ጊዜ ቢመለከቱም፥ በእርሱ አልታመኑም ነበር። በዚህ ምክንያት እግዚአብሔር “ከኢያሱ እና ከካሌብ፥ እንዲሁም ከልጆቻችሁ በስተቀር ሁላችሁም ወደ ከነዓን ሀገር አትገቡም” አላቸው። ስለዚህም ሕዝቡ ለአርባ ዓመት በበረሀ ዞሩ።

የተላኩት ሰዎች ለሙሴ በከነዓን ሀገር ያዩትን ሲነግሩት

ዘኍልቍ 21

እስራኤላውያን በበረሀ ሲጓዙ፥ እግዚአብሔር የሚያስፈልጋቸውን ሰጣቸው። እነርሱ ግን ሊረኩ አልቻሉም። በበረሀም ሲኖሩ ሳለ፥ በሕዝቡ መካከል በእግዚአብሔር እና በሙሴ ላይ ክፉ ንግግር በዛ። በዚህ ምክንያት እግዚአብሔር መርዘኛ እባቦችን ላከባቸው። ብዙ ሰዎችም በእባብ ተነድፈው ሞቱ። ሕዝቡም ይህንን ባዩ ጊዜ፥ እግዚአብሔርን ይቅርታ ጠየቁ። ሙሴም እንደገና እግዚአብሔርን እንዲያድናቸው ለመነ። እርሱም ጸሎቱን ሰማ። ከናስ ብረት እባብ እንዲሰራ እና በእንጨት ሰቅሎ እንዲተክል ለሙሴ ነገረው። በእባብ የተነደፉት ሰዎች ያንን የናስ እባብ ሲመለከቱ፥ ወዲያውኑ ዳኑ።

እግዚአብሔር እንደተናገረው ሙሴ የናስ እባብ ያለበትን እንጨት ሲተክል

ኢያሱ 1-3 + ዘዳግም 34፥10

ሙሴም በአንድ ተራራ ላይ ሆኖ ከነዓንን ከሩቅ አየ። ከዚያም እዛው ተራራ ላይ ሞተ። ሙሴ እግዚአብሔርን ፊት ለፊት ያየ እና ያነጋገረ (በጣም ትሑት*) ሰው ነበር። በእስራኤል ከእርሱ በፊትም ሆነ፥ በኋላ እንደ እርሱ ያለ ነቢይ አልነበረም።

ሙሴ ከሞተ በኋላ፥ እግዚአብሔር ኢያሱን መሪ አደረገው። የእስራኤልንም ሕዝብ ወደ ከነዓን ሀገር እንዲመራ ተናገረው። ከነዓንም እግዚአብሔር ለአብርሃም የገባው የተስፋ ቃል ሀገር ነበረች። ስለዚህ ኢያሱ እና ሕዝቡ ተነስተው ወደ ዮርዳኖስ ወንዝ መጡ። ወደ ከነዓን ለመሄድ ግን የዮርዳኖስን ወንዝ መሻገር ነበረባቸው። ወንዙ ብዙ ውሃ ስለነበረው፥ መሻገር አስፈሪ ነበር። ስለዚህ በመጀመሪያ ካህናቱ ታቦት ተሸክመው በእግራቸው ወንዙ ውስጥ ገብተው ቆሙ። በዚህ ጊዜ ውሃው ቀጥ ብሎ ስለቆመ፥ በደረቅ መሬት የዮርዳኖስን ወንዝ በቀላሉ ተሻገሩ። ከዚህም በኋላ ከነዓን ደረሱ።

እግዚአብሔር ውሃውን ሲያቆመው እና የእስራኤል ሕዝብ ሲሻገሩ

ኢያሱ 6

በከነዓን ሀገር የምትገኝ ኢያሪኮ የምትባል ከተማ ነበረች። በዙሪያዋ ከድንጋይ የተሰራ ጠንካራ አጥር ነበራት። ስለዚህ በቀላሉ ወደ ኢያሪኮ ገብቶ ማሸነፍ አይቻልም ነበር። እግዚአብሔርም ለእስራኤላውያን ማሸነፍ እንዲችሉ፥ ማድረግ ያለባቸውን እንዲህ ሲል ነገራቸው፦ “ከተማዋን ለስድስት ቀናት በፀጥታ በየቀኑ አንድ ጊዜ ዙሩ! በሰባተኛው ቀን ሰባት ጊዜ ዞራችሁ ስትጨርሱ፥ በከፍተኛ ድምፅ ጩኹ!” አላቸው።

ሕዝቡም እግዚአብሔር እንዳላቸው ከተማዋን ዞሩ። በመጨረሻም ቀን ሲጮሁ፥ የኢያሪኮ አጥር ተደረመሰ። በዚህ መንገድ ከተማዋን ማሸነፍ ቻሉ። ሆኖም ግን ከኢያሪኮ ሰዎች መካከል ቀይ ገመድ በቤታቸው የሰቀሉ አንድ ቤተሰብን አዳኗቸው። ምክንያቱም ከቤተሰቡ መካከል አንዲት ሴት ከዚህ በፊት እስራኤላውያንን ረድታቸው ስለነበረ ነው።

የኢያሪኮ አጥር በእግዚአብሔር ኃይል ሲደረመስ

ኢያሱ 24

ኢያሱ የእስራኤልን ሕዝብ* ለብዙ ዓመታት በጥሩ ሁኔታ መራቸው። ከመሞቱም በፊት የሕዝቡን መሪዎች ሁሉ* ሰበሰበ። ለእነርሱም እግዚአብሔር ለአባቶቻቸው ያደረገውን ስራ ሁሉ ነገራቸው። እግዚአብሔር ከግብጽ እንዳወጣቸው፥ በበረሀ የሚያስፈልጋቸውን ሁሉ እንደሰጣቸው እና ወደ ተስፋይቱ ሀገር እንደመራቸው አስታወሳቸው። ከዚያም በኋላ ኢያሱ ፡- “እኔ እና ቤተሰቤ እግዚአብሔርን እናመልካለን። እናንተስ፥ ማንን ማምለክ ትፈልጋላችሁ? እግዚአብሔርን ወይስ ሌሎች አማልክቶችን?” ብሎ ምርጫ ሰጣቸው። ሕዝቡም ሁሉ“እግዚአብሔርን ማምለክ እንፈልጋለን” ብለው መለሱለት። ኢያሱም “እግዚአብሔርን ከመረጣችሁ፥ ለእርሱ ብቻ ታዘዙ!” አላቸው።

የእስራኤል ሕዝብ እግዚአብሔርን ለመታዘዝ ሲወስኑ

መሳፍንት 6

እስራኤላውያን እግዚአብሔርን ሊታዘዙ ቃል ገብተው ነበር። ሆኖም ግን ብዙ ጊዜ የገቡትን ቃል መጠበቅ አልቻሉም። በዚህ ምክንያት እግዚአብሔር አንዳንድ ጊዜ በሌላ ሕዝብ እንዲጨነቁ ይፈቅድ ነበር። እስራኤላውያንም ችግሩ እየከበዳቸው ሲመጣ፥ የእግዚአብሔርን እርዳታ ይጠይቁ ነበር። በጌዴዎንም ዘመን በጠላቶቻቸው ተጨንቀው ስለነበር፥ ወደ እግዚአብሔር ጮኹ።

እግዚአብሔርም ጩኸታቸውን ስለሰማ፥ አንድ ቀን መልአክ ለጌዴዎን ተገልጦለት፡- “እኔ ከአንተ ጋር እሆናለሁ። በአንተም በኩል የእስራኤልን ሕዝብ ከሚያስጨንቋቸው ሰዎች ነፃ አወጣቸዋለሁ” አለው። ከዚያም ጌዴዎን ለእግዚአብሔር መልአክ ጥሩ ምግብ አቀረበ። መልአኩም ምግቡን ሳይበላ በበትሩ ነካው። እሳትም ከሰማይ መጥቶ ምግቡን አቃጠለው። በዚህም ጌዴዎን እግዚአብሔር በእውነት ሕዝቡን ለማዳን እንደመረጠው አወቀ።

ጌዴዎን ለመልአኩ ምግብ ሲያቀርብ እና ምግቡ በእሳት ሲቃጠል

መሳፍንት 7

ሕዝቡም እግዚአብሔር እንደተናገረው፥ በጌዴዎን መሪነት ጠላቶቻቸውን ለመዋጋት ተዘጋጁ። እግዚአብሔር ግን ጌዴዎንን “የሕዝቡ ቁጥር ስለበዛ ቀንሳቸው!” አለው። ስለዚህ ጌዴዎን የፈሩ ሰዎች ወደ ቤታቸው እንዲመለሱ አደረገ።

በድጋሜ እግዚአብሔር፡- “አሁንም ሰዎች በጣም ስለበዙ፥ መቀነስ አለባቸው። ስለዚህ ውሃ እንዲጠጡ ወደ ወንዝ አምጣቸው እና ተንበርክከው የሚጠጡትን ወደ ቤታቸው መልሳቸው!” አለው። ጌዴዎንም እግዚአብሔር እንዳለው አደረገ። ከዚህ በኋላ የቀሩት ሦስት መቶ ሰዎች ብቻ ነበሩ። ጠላቶቻቸውን ለመወጋት ይዟቸው ሄደ። እግዚአብሔርም ስለተዋጋላቸው፥ ብዙ ሺህ የሚሆኑ ጠላቶቻቸውን አሸነፉ። እግዚአብሔር ወደ ውጊያው ጥቂት ሰዎችን ብቻ የላከው፥ ድሉ ከእርሱ እንደመጣ እንዲያውቁ ነው።

የሰውን ቁጥር ለመቀነስ ጌዴዎን ሰዎቹ ውሃ እንዴት እንደሚጠጡ ሲመለከት

መሳፍንት 13 +14

እንደገና በሌላ ዘመን እስራኤላውያን በጣም ስለተጨነቁ፥ ወደ እግዚአብሔር ጮኹ። እግዚአብሔርም ጸሎታቸውን ሰማ። በዚህ ጊዜ ልጅ መውለድ ላልቻሉ ባል እና ሚስት ልዩ ልጅ ሰጣቸው። እግዚአብሔርም ልጁ ከመወለዱ በፊት “ልጁ የእኔ መሆኑ እንዲታወቅ፥ ፀጉሩን በፍጹም አትቁረጡ!” አላቸው። እነርሱም እግዚአብሔር እንዳላቸው ፀጉሩን አልቆረጡም። ልጃቸውም እጅግ በጣም ጠንካራ ሰው ሆነ። ስሙም ሳምሶን ይባል ነበር። አንድ ጊዜ የመጣበትን አንበሳ በባዶ እጁ እግዚአብሔር በሰጠው ኃይል ገደለ።

ሳምሶን የመጣበትን አንበሳ በእግዚአብሔር ኃይል በባዶ እጁ ሲገድል

መሳፍንት 16

ሳምሶን ከእስራኤል ጠላቶች የነበረችውን ደሊላ የምትባል ሴት ወደደ። እርሷም ኃይለኛ ሊሆን የቻለበትን ምስጢር ጠየቀችው። እርሱ ግን ሊነግራት አልፈለገም ነበር። ብዙ ጊዜ ስለጠየቀችው ግን፥ በመጨረሻ ሳምሶን “ፀጉሬ ከተቆረጠ፥ እንደ ማንኛውም ሰው ኃይል የሌለኝ እሆናለሁ” በማለት ምስጢሩን ነገራት። ደሊላም የሳምሶንን የኃይል ምስጢር ለጠላቶቹ ነገረቻቸው። እነርሱም እንቅልፍ ተኝቶ እያለ መጥተው ፀጉሩን ቆረጡት። ከዚህ የተነሳ ሳምሶን ደካማ ስለሆነ፥ በቀላሉ ይዘው ወደ እስር ቤት አስገቡት።

ከተወሰነ ጊዜ በኋላ ፀጉሩ እንደገና ማደግ ስለጀመረ፥ ኃይሉ ተመለሰለት። በዚህ ጊዜ እግዚአብሔር የእስራኤልን ሕዝብ ለመርዳት ተጠቀመበት። በአንድ ግብዣ ላይ ብዙ ጠላቶቹ የሞሉበትን የትልቅ ቤት ምሶሶ ገፍቶ ቤቱ በላያቸው እንዲደረመስ አደረገ። ሳምሶንም ከብዙ ጠላቶቹ ጋር አንድ ላይ ሞተ።

ሳምሶን እስራኤልን ለመርዳት ከእግዚአብሔር ኃይል አገኘ።

ጠላቶች የሳምሶንን ፀጉር ሲቆርጡ

ሩት 1

ኑኃሚን የምትባል ሴት ሀገራቸው ራብ በሆነ ጊዜ ከባሏ እና ከሁለት ወንድ ልጆቿ ጋር ወደ ሌላ ሀገር ሄደች። በዚያም እየኖረች ሳለ፥ ባሏ እና ልጆቿ ሞቱባት። ከዚህ የተነሳ እግዚአብሔር ከእርሷ ጋር የሌለ መስሏት ነበር። አንድ ቀን ኑኃሚን የልጆቿ ሚስቶች የነበሩትን “ከዚህ በኋላ እዚህ አልቀመጥም። ወደ ሀገሬ እመለሳለሁ። እናንተም ወደ ቤተሰቦቻችሁ ተመለሱ!” አለቻቸው። አንደኛዋ በሀገሯ ለመቅረት ስትስማማ፥ ሩት ግን አብራት ለመሄድ ወሰነች። እርሷም ኑኃሚንን “ብቻሽን በፍጹም አልተውሽም። አብሬሽ እሄዳለሁ። ሕዝብሽ ሕዝቤ ይሆናል፥ አምላክሽም አምላኬ ይሆናል” አለቻት። ስለዚህ ኑኃሚን እና ሩት ወደ እስራኤል ሀገር አብረው ሄዱ። እዚያም መኖር ጀመሩ።

ሩት ኑኃሚንን “ከአንቺ ጋር እሄዳለሁ” ስትላት

ሩት 2

ሩት በእስራኤል ሀገር ምንም የሌላት እንግዳ ነበረች። ከኑኃሚን በስተቀር የምታውቀው ሰው አልነበራትም። አማቷንም በጣም ትረዳት እና ምክሯንም ትሰማ ነበር። አንድ ቀን እህል በሚሰበስብበት ወቅት፥ በአንድ እርሻ የተረፈ እህል ቀኑን ሙሉ ስትሰበስብ ዋለች። የእርሻው ባለቤት ቦዔዝ የተባለ መልካም እና ሀብታም ሰው ነበር። ስለ ሩትም መልካምነት ሰምቶ ነበር። ስለዚህ በእርሻው የተረፈ እህል እንድትሰበሰብ ፈቀደላት። በተጨማሪም ለሰራተኞቹ መልካም እንዲሆኑላት እና ብዙ እህል እንዲያስቀሩላት ነገራቸው። በዚህ ምክንያት ሩት በቂ እህል መሰብሰብ ቻለች።

ሩት በእርሻ የተረፈውን እህል ስትሰበስብ

ሩት 3

ኑኃሚን ከተወሰነ ጊዜ በኋላ ሩትን ቦዔዝ መልካም ሰው ስለሆነ እንድታገባው መከረቻት። ሩትም በኑኃሚን ምክር ተስማማች። ስለዚህ ቆንጆ ልብስ ለብሳ ቦዔዝ ወዳለበት ቦታ ሄደች። እርሱንም ለማግባት ፍላጎት እንዳላት ገለፀችለት።

ቦዔዝም በመልካምነት ለሩት “ወደ ሌላ ሰው አልሄድሽም። ለቤተሰባችንም ታማኝ ስለሆንሽ፥ እግዚአብሔር ይባርክሽ! ስለ ጋብቻችን ጉዳይ ግን ከአንድ ዘመዳችን ጋር መወያየት አለብኝ። ከዚያም በኋላ መልሱን እነግርሻለሁ። አሁን ግን እህል ይዘሽ ወደ አማትሽ ወደ ኑኃሚን ሂጂ!” አላት። ከዚያም ብዙ እህል ሰጣት። ሩትም እህሉን ተሸክማ ወደ ቤት ሄዳ ለኑኃሚን ሰጠቻት።

ሩት ወደ ቦዔዝ ልታገባው መፈለጓን ለመግለጽ ስትሄድ

ሩት 4

ቦዔዝ ከዘመዱ እና ከሽማግሌዎች ጋር ሩትን ለማግባት ስላሰበው ጉዳይ ተነጋገረ። ሁሉም ከተስማሙ በኋላ፥ ቦዔዝ እና ሩት ተጋቡ። ኢዮቤድ የሚባል ወንድ ልጅም ወለዱ። ኑኃሚንም እንደ ራስዋ ልጅ አድርጋ አሳደገችው። ኑኃሚን እና ቤተሰቧ እንደገና ጥሩ ኑሮ መኖር ጀመሩ። በብዙ መከራ ውስጥ ቢያልፉም፥ እግዚአብሔር ከዚህ ቤተሰብ ጋር ነበር። እርሱም በጣም ባረካቸው።

ኢዮቤድም በኋላ የንጉሥ ዳዊት አያት ሆነ።

የቦዔዝ ዘመድ እና ሽማግሌዎች በእነ ቦዔዝ ጋብቻ ጉዳይ ሲወስኑ

1ኛ ሳሙኤል 1-2

ሐና ለብዙ ዓመታት ልጅ መውለድ አልቻለችም ነበር። በዚህ ምክንያት በጣም አዝና “እግዚአብሔር ሆይ፥ ወንድ ልጅ ብትሰጠኝ፥ መልሼ ላንተ አገልጋይ እንዲሆን እሰጥሀለሁ። የእኔ ሳይሆን፥ የአንተ ልጅ ይሆናል” ብላ አልቅሳ ጸለየች። ስትጸልይ ያያት ካህንም “እግዚአብሔር የለመንሽውን ይስጥሽ!” አላት። ስለዚህም ሐና ተፅናንታ ወደ ቤቷ ተመለሰች።

ከአንድ ዓመት በኋላም እግዚአብሔር ለሐና ወንድ ልጅ ሰጣት። ስሙንም ሳሙኤል ብላ ጠራችው። ሳሙኤል ትንሽ ካደገ በኋላ፥ ወደ እግዚአብሔር ቤት ወስዳ ሰጠችው። ይህንን በማድረግ ሐና ለእግዚአብሔር የገባችውን ቃል ፈጸመች። ሳሙኤልም እዚያው አደገ። በእግዚአብሔር ቤት ውስጥ ዔሊ የተባለውን ካህን ይረዳው ነበር።

ሐና ተጨንቃ በእግዚአብሔር ቤት ውስጥ ስትጸለይ

1ኛ ሳሙኤል 3-4

አንድ ሌሊት ሳሙኤል ተኝቶ ሳለ“ሳሙኤል፥ ሳሙኤል!” የሚል ድምፅ ሰማ። ዔሊ የጠራው ስለመሰለው፥ ወደ እርሱ ሄዶ “ጠራኸኝ?” ሲል ጠየቀው። እርሱ ግን “አይ፥ አልጠራሁህም። እንደገና ተኛ!” ብሎ ተናገረው። ሳሙኤልም ለሦስት ጊዜ በተደጋጋሚ ይህንን ድምፅ እየሰማ ወደ ዔሊ ሄደ። በመጨረሻም ዔሊ እግዚአብሔር ሳሙኤልን እንደጠራው ተረዳ። እርሱንም “ከዚህ በኋላ ድምፅ ስትሰማ፡ ‘እግዚአብሔር ሆይ፥ እኔ አገልጋይህ እሰማለሁ እና እባክህ ተናገር!’ በል” አለው። ሳሙኤልም ዔሊ እንደተናገረው አደረገ። ከዚያም እግዚአብሔር ለብዙ ዓመታት ያልታዘዙትን የዔሊ ቤተሰብን እንደሚቀጣ ተናገረው።

ከተወሰነ ጊዜ በኋላ እግዚአብሔርን ያላከበሩት ካህኑ ዔሊ እና ልጆቹ ሞቱ። ሳሙኤል ግን ለእስራኤል ሕዝብ ደህና የሚያስብ እና እውነተኛ ነቢይ ሆነላቸው።

እግዚአብሔር ሳሙኤልን ሲጠራው፥ እርሱ ግን ወደ ዔሊ ሲሄድ

1ኛ ሳሙኤል 7

እስራኤላውያን ለብዙ ዓመታት በጠላቶቻቸው ተጨነቁ። ከዚህ የተነሳ ወደ እግዚአብሔር ጮኹ። ሳሙኤልም ሕዝቡ እግዚአብሔርን እንዲታዘዙ መከራቸው። ሕዝቡም መጥፎ ስራቸውን ትተው ለመታዘዝ ወሰኑ። ተሰብስበውም ሳሉ፥ ሳሙኤል ወደ እግዚአብሔር ጸለየ። የእስራኤል ጠላቶች መሰብሰባቸውን ሰምተው በክፋት ተነስተው ሊዋጓቸው መጡ። እግዚአብሔር ግን እስራኤላውያንን ረድቶ ጠላቶቻቸውን በኃይለኛ ነጎድጓድ አባረራቸው።

ሕዝቡ መጥፎ ስራቸውን ሲተው እና ሳሙኤልም ሲጸልይላቸው