1ኛ ሳሙኤል 8-10

እስከ ሳሙኤል ዘመን ድረስ እስራኤል ንጉሥ አልነበራቸውም። ይመሩ የነበረው በመሪዎች እና በዳኞች ነበር። አንድ ቀን ሕዝቡ ሳሙኤልን “እንደሌሎች ሀገሮች ንጉሥ እንዲነግሠልን እንፈልጋለን” አሉት። እግዚአብሔር እና ሳሙኤል ግን በዚህ ልመናቸው አልተደሰቱም። ምክንያቱም እግዚአብሔር ብቻ ንጉሣቸው መሆን ይፈልግ ስለነበር ነው። ከዚህም የተነሳ ሳሙኤል “የሚነግሠው ንጉሥ በኃይል ይጨቁናችኃል” ብሎ አስጠነቀቃቸው።

እስራኤላውያን ግን አጥብቀው ስለፈለጉ፥ እግዚአብሔር ሳኦል የተባለውን ንጉሥ አነገሠላቸው። ሳሙኤልም ሳኦልን ዘይት ቀብቶ ባረከው። ሕዝቡንም “ሳኦል ንጉሣችሁ ነው። ትእዛዙን አክብሩ! አሁንም እግዚአብሔርን መታዘዝ ከሁሉም በላይ ያስፈልጋችኋል” አላቸው።

ሳሙኤል ሳኦልን ዘይት ቀብቶ ሲባረክ

1ኛ ሳሙኤል 15

ሳኦል ለተወሰነ ጊዜ ስኬታማ ንጉሥ ነበር። ነገር ግን እግዚአብሔርን አልታዘዝም ነበር። አንድ ቀን ሳኦል ትልቅ ጦርነት ካደረገ በኋላ፥ ሳሙኤል ወደ እርሱ መጣ። ለሳኦልም እግዚአብሔርን በፍጹም እንዳልታዘዘ ነገረው። ደግሞም “እግዚአብሔር ከስጦታ ይልቅ መታዘዝን ይወዳል” አለው። ሳሙኤልም ሳኦልን ተለይቶ ሊሄድ በፈለገ ጊዜ፥ ሳኦል ሊያስቆመው ሞከረ። ልብሱንም ይዞት ስለነበር፥ ጫፋ ተቀደደ። ወዲያውኑ ሳሙኤል “እንዲሁም ይህ ልብስ እንደተቀደደ፥ ዛሬ የእስራኤል መንግሥት ከአንተ ተቀደደ። ለሌላ ሰውም እንዲሰጥ ተወስኗል” አለው።

ይህ ሁሉ የሆነው ሳኦል እግዚአብሔርን ስላልታዘዘ ነበር።

ንጉሥ ሳኦል ሳሙኤልን ለማስቆም ሲሞክር እና ልብሱ ሲቀደድ

1ኛ ሳሙኤል 15-16

ዳዊት ወጣት በነበረበት ጊዜ ጎበዝ እረኛ ነበር። ከወንድሞቹ ሁሉ ታናሽ ቢሆንም፥ የአባቱን በጎች በታማኝነት ይጠብቅ ነበር። ጥሩ ባህሪም ነበረው። ስለዚህ እግዚአብሔር ዳዊት በሳኦል ቦታ የእስራኤል ቀጣይ ንጉሥ እንዲሆን መረጠው። በዚህ ምክንያት እግዚአብሔር ነቢዩ ሳሙኤል ዳዊትን እንዲቀባ ላከው። ነቢዩም ታዝዞ ወደ እነ ዳዊት ቤት ሄደ። ዳዊት ግን በጎች ይጠብቅ ስለነበር፥ ለአባቱ እንዲያስጠራው ነገረው።

ዳዊትም እንደመጣ ሳሙኤል በዘይት ቀብቶ ለንጉሥነት እንደተመረጠ ነገረው።ያን ጊዜ እግዚአብሔር ለዳዊት ኃይልን ሰጠው።

ዳዊት መንጋውን በታማኝነት ሲጠብቅ

1ኛ ሳሙኤል 17

አንድ ጊዜ እስራኤላውያን ከጠላቶቻቸው ጋር ሊዋጉ በጦር ሜዳ ተሰብስበው ነበር። የዳዊት ወንድሞችም ወታደሮች ስለሆኑ፥ ውጊያ ሄደው ነበር። አባታቸውም ዳዊትን ለወንድሞቹ ምግብ እንዲወስድላቸው ላከው። ዳዊት ወደ እነርሱ በደረሰ ጊዜ፥ ጎልያድ የተባለ ሰው በሕዝቡ ላይ እየጮኸ ሲያስፈራራቸው ሰማ። እርሱም እጅግ ትልቅ እና ጠንካራ የእስራኤል ጠላት ነበር። ለብዙ ቀናትም በእግዚአብሔር ሕዝብ ላይ ይፎክር ነበር።

ዳዊት ግን ወጣት ቢሆንም ሳይፈራ በእግዚአብሔር ኃይል ጎልያድን ሊዋጋ ሄደ። በወንጭፍ ድንጋይ አድርጎ በመወርወር ጎልያድን መቶ ገደለው። ከዚህ የተነሳ ጠላቶቻቸው ሁሉ ሸሹ። የእስራኤልም ወታደሮች አሸነፉአቸው።

ዳዊት ትልቁን ጎልያድ በእግዚአብሔር ኃይል ሲያሸንፍ

1ኛ ሳሙኤል 26

ዳዊት ስኬታማ እና ጀግና ሰው ስለነበር፥ የእስራኤል ሕዝብ ከንጉሥ ሳኦል ይልቅ አከበሩት። ከዚህ የተነሳ ሳኦል “ዳዊት በእኔ ፈንታ ንጉሥ ሊሆን ነው?” ብሎ ስላሰበ ፈራ። ስለዚህ ዳዊትን ብዙ ጊዜ ለመጉዳት እና ለመግደል ይሞክር ነበር። ቢሆንም እግዚአብሔር ዳዊትን ይጠብቀው ስለነበር፥ አልተሳካለትም። ዳዊት ግን በተደጋጋሚ ሳኦልን የመግደል አጋጣሚ አግኝቶ ነበር። ሆኖም እግዚአብሔር የሾመውን ሰው አልጎዳም በማለት ክፉ ነገር አላደረገበትም። ይልቁንም ለሳኦል ብዙ መልካም ነገሮችን አደረገ።

ዳዊት ንጉሥ ሳኦልን አልጎዳም ብሎ ሲሄድ

2ኛ ሳሙኤል 5 + 1ኛ ዜና 22

ከተወሰኑ ዓመታት በኋላ ሳኦል እና ሁለት ልጆቹ በጦርነት ሞቱ። ከዚያም ዳዊት ይሁዳ በሚባል የሀገሪቱ ክፍል፥ ቀጥሎም በእስራኤል ሀገር ሁሉ ላይ ንጉሥ ሆነ።

ዳዊት ስህተት ቢያደርግም፥ እግዚአብሔርን የሚወድ እና የሚያከብር ንጉሥ ነበር።ለራሱም ክብር ብዙ የሚጨነቅ ሰው አልነበረም። ለእስራኤል ሕዝብም ጥሩ የሚያስብ ንጉሥ ነበር። በተጨማሪም ዳዊት ለእግዚአብሔር ብዙ መዝሙሮችን ይጽፍ፥ በገናም ይጫወት ነበር።

እርሱንም ከመውደዱ የተነሳ ቤት ሊሰራለት አሰበ። እግዚአብሔር ግን ዳዊት ብዙ ጦርነቶች ስላደረገ አልፈቀደለትም። ሆኖም “ልጅህ ሰሎሞን ቤት ይሰራልኛል” አለው።

እግዚአብሔር እንደወሰነው ዳዊት ንጉሥ ሆኖ ሲሾም

2ኛ ሳሙኤል 11-12

አንድ ቀን ንጉሥ ዳዊት በቤቱ ከፍታ ቦታ ላይ ሆኖ ቤርሳቤህ የምትባል ሴት ስትታጠብ አይቶ ተሳሳተ። እርሷ ግን ባል ነበራት። ቢሆንም ዳዊት ባሏን አስገደለ። ቤርሳቤህንም ሚስቱ እንድትሆን ወሰዳት።

ዳዊትም ያደረገው ነገር በጣም የተሳሳተ እንደነበር ካወቀ በኋላ ወዲያውኑ* እግዚአብሔርን ይቅርታ ለመነ። እግዚአብሔር ጻድቅ እና መሐሪ ስለሆነ፥ ዳዊትን በጣም ቢቀጣውም ምሕረት አደረገለት። ስለዚህ ዳዊት ብዙ ዓመታት ኖረ።

ዳዊት የጎረቤቱን ሚስት ሲያይ

1ኛ ነገሥት 1-8 (2ኛ ዜና 1)

ንጉሥ ዳዊት ከሞተ በኋላ፥ ልጁ ሰሎሞን በእርሱ ቦታ ነገሠ። አንድ ሌሊት እግዚአብሔር ሰሎሞንን በሕልሙ “ምን እንድሰጥህ ትፈልጋለህ?” ብሎ ጠየቀው። ሰሎሞንም “ሕዝብህን በመልካም ሁኔታ መምራት እንድችል ጥበብ እና ማስተዋል ስጠኝ” ብሎ ለመነው። ሰሎሞን ለራሱ ሀብት፥ ክብር እና ሰላማዊ ኑሮ ስላልጠየቀ፥ እግዚአብሔር ከሌሎች ሰዎች ሁሉ እጅግ የሚበልጥ ጥበብን ሰጠው። እንዲሁም ያልጠየቀውን ሀብት እና ክብርም ጨመረለት። ሰሎሞንም የተሰጠውን ጥበብ የእስራኤልን ሕዝብ በደህና መንገድ ለማስተዳደር እና ለመፍረድ ተጠቀመበት።

በተጨማሪም ሰሎሞን ለእግዚአብሔር የመጀመሪያውን ቤተ መቅደስ ሰራ። ይህም ቤት ትልቅ እና በጣም የሚያምር ሆነ። ለብዙ ዘመን የእስራኤል ሕዝብ ሁሉ እግዚአብሔርን ለማምለክ ወደዚያ ቤት ይሄዱ ነበር።

ንጉሥ ሰሎሞን የመጀመሪያውን ቤተ መቅደስ ሠርቶ ሲጸልይ

1ኛ ነገሥት 17

ከብዙ ዓመታት በኋላ የእስራኤል ሕዝብ እንደገና ሌሎች አማልክትን አመለኩ። በዚያን ጊዜ ኤልያስ የሚባል የእግዚአብሔር ሰው ነበር። እግዚአብሔር ኤልያስን ወደ ንጉሥ አክዓብ ሄዶ፦ “እኔን ማምለክ ትታችሁ ሌሎች አማልክትን ስላመለካችሁ፥ ለሚመጡት ዓመታት በእስራኤል ላይ ዝናብ አይዘንብም” ብሎ እንዲነግረው ላከው። በእርግጥም እግዚአብሔር እንዳለው ዝናብ ቆመ። ከዚያም በኋላ እግዚአብሔር ኤልያስን “ከከተማ ርቀህ በአንድ ትንሽ ወንዝ አጠገብ ተደበቅ! ቁራዎች የምትበላውንም ምግብ ይዘውልህ እንዲመጡ አዛቸዋለሁ” አለው። ኤልያስም እግዚአብሔር ወዳለው ቦታ ሄደ። እዚያም በየቀኑ ምግብ ቁራዎች ያመጡለት ነበር። በኋላም ደግሞ በሌላ ታአምር በራብ ወቅት ሁሉ የሚበቃውን ምግብ አገኘ።

ክፉው ንጉሡም በኤልያስ ተናድዶ በሁሉም ሀገር ቢያስፈልገውም፥ ሊያገኘው ግን አልቻለም።

ቁራዎቹ ምግብ ለኤልያስ ይዘው ሲመጡ

1ኛ ነገሥት 18

ዝናብ መዝነብ በቆመ በሦስተኛው ዓመት እግዚአብሔር ኤልያስን እንደገና ወደ ንጉሡ ላከው። ሄዶም ንጉሡን ከሌሎች አማልክት ነቢያት ጋር በአንድ ተራራ ላይ እንዲገናኙ ነገረው። ስለዚህ ሁሉም በዚያ ተራራ ላይ ተሰበሰቡ።

ከዚያም ኤልያስ ነቢያቱ ለአማልክታቸው ስጦታ እንዲያዘጋጁ፥ እርሱም ደግሞ ለእግዚአብሔር እንደሚያዘጋጅ ነገራቸው። ኤልያስም ለሕዝቡ “በስጦታው ላይ እሳትን የሚልክ እውነተኛ አምላክ እንደሆነ በዚህ ይታወቅ!” አላቸው። ስለዚህ ኤልያስ ለእግዚአብሔር፥ እነርሱም ለራሳቸው አምላክ ስጦታ አዘጋጁ። በመጀመሪያ ነቢያቱ ቀኑን ሙሉ ወደ አማልክቶቻቸው ጸለዩ። ምንም እሳት ግን አልመጣም። በመጨረሻም ኤልያስ በስጦታው ላይ ውሃ አፈሰሰ። ከዚህ በኋላ ወደ እግዚአብሔር ሲጸልይ እሳት ወዲያውኑ ወረደ። ስጦታውን፥ ስጦታ የተቀመጠበትን እንጨት፥ እንዲሁም ድንጋይ እና ውሃውን በሙሉ አቃጠለ። ሕዝቡም ይህንን ካዩ በኋላ “እውነተኛ አምላክ እግዚአብሔር ብቻ ነው” ብለው ለእግዚአብሔር ሰገዱ።

ከዚህም በኋላ ዝናብም እንደገና ዘነበላቸው።

እግዚአብሔር ሕዝቡ እንደገና እንዲያመልኩት እሳት ሲልክ

2ኛ ነገሥት 2

እግዚአብሔር ኤልሳዕን ከኤልያስ በኋላ ነቢይ እንዲሆን መረጠው። ኤልሳዕም ከኤልያስ ጋር ሄደ። የእርሱም ረዳት እና ተማሪ ሆነ። ከተወሰኑ ዓመታት በኋላ ኤልያስ ከዚህ ዓለም የሚሄድበት ቀን ደረሰ። በዚያን ጊዜ አብረው በመሄድ ላይ እያሉ ድንቅ ነገር ሆነ። ይህም የእሳት ፈረሶች እና የእሳት ጋሪ በመካከላቸው ገብቶ ለያቸው። ኤልሳዕም እያየ ኤልያስ በጋሪው ሆኖ በነፋስ ወደ ሰማይ ተወሰደ። ከዚህ በኋላ ኤልሳዕ በኤልያስ ፋንታ ነቢይ ሆነ። እርሱም በእግዚአብሔር ኃይል ብዙ ተአምራትን ለሕዝቡ ማድረግ ጀመረ።

ኤልያስ ወደ ሰማይ ሲወሰድ

2ኛ ነገሥት 5

ንዕማን የሚባል የእስራኤል ጠላት የሆነች ሀገር የጦር መሪ ነበር። ይህ ሰው ግን ከባድ የቆዳ በሽታ ነበረበት። ስለ ነቢዩ ኤልሳዕም ከሰማ በኋላ፥ ለመፈወስ ወደ እስራኤል ሀገር መጣ። ኤልሳዕም ፈውስን ፈልጎ መምጣቱን ሲሰማ ወደ ቤቱ አስጠራው። ንዕማንም እቤቱ አጠገብ ሲደርስ፥ ኤልሳዕ መልእክተኛውን ልኮ፦ “ሄደህ በዮርዳኖስ ወንዝ ሰባት ጊዜ ታጠብ! በዚያን ጊዜ ትፈወሳለህ” አለው። ንዕማንም ኤልሳዕ እንዳለው በወንዙ ታጥቦ ተፈወሰ። ከዚህም በኋላ ለኤልሳዕ ብዙ ውድ ስጦታዎችን ሊሰጠው ተመለሶ መጣ። ቢሆንም ኤልሳዕ ስጦታውን አልተቀበለም። ነገር ግን ሰራተኛው በጣም ተስገብግቦ ከንዕማን ኋላ ሮጦ በድብቅ ስጦታን ተቀበለ። በዚህ ምክንያት ልክ ንዕማን የነበረበት የቆዳ በሽታ ያዘው።

ንዕማን ከተፈወሰ በኋላ ወደ ሀገሩ ተመለሶ የእስራኤልን አምላክ፥ እግዚአብሔርን ብቻ አመለከ።

ንዕማን ለመፈወስ ኤልሳዕን ሲጠይቅ

2ኛ ነገሥት 6፥8-23

አንድ ጊዜ የእስራኤል ጠላቶች ነቢዩ ኤልሳዕን እና እስራኤልን ሊወጓቸው መጡ። እነርሱም እንደደረሱ ኤልሳዕ እንዲታወሩ ወደ እግዚአብሔር ጸለየ። ወዲያውኑ ሁሉም ማየት አቃታቸው። ስለዚህ ኤልሳዕ በቀላሉ እየመራቸው ወደ አንዲት ከተማ ወሰዳችው። በዚያም እንደገና ማየት እንዲችሉ ሲጸልይላቸው አይኖቻቸው ተከፈቱ። የእስራኤል ንጉሥ ይህንን ሲያይ “እንግደላቸው?” ብሎ ኤልሳዕን ጠየቀ። ኤልሳዕ ግን “አይሆንም፥ ምግብ አብልተን በሰላም እንዲሄዱ እንልቀቃቸው!” ብሎ መለሰለት። ስለዚህ የጠላት ወታደሮቹ ጥሩ ምግብ በልተው ወደ ሀገራቸው በሰላም ተመለሱ። ከዚህ በኋላ እነዚህ የእስራእሌል ጠላቶች ሊወጓቸው ተመልሰው አልመጡም።

ኤልሳዕ የታወሩ ጠላቶቹን ወደ ከተማ ሲወስዳቸው

2ኛ ነገሥት 6፥24-7፥20

አንድ ጊዜ ከእስራኤል ጠላቶች የተወሰኑ ወደ ሰማርያ መጥተው ከተማዋን ከብበው ለረጅም ጊዜ ቆዩ። ይህ በከተማዋ ለሚኖሩ ሰዎች እጅግ የመከራ ጊዜ ነበር። በዚህም ጦርነት ምክንያት ምግብ ስለጠፋ፥ በጣም ተራቡ።

በመጨረሻ* አራት የቆዳ በሽታ ያለባቸው ሰዎች ግን ምግብ ፍለጋ ጠላቶቻቸው ወዳሉበት ቦታ ሄዱ። ሰዎቹም እዚያ ሲደርሱ፥ ጠላቶቹ የተውት* ብዙ ምግብ እና የተለያዩ ጠቃሚ ነገሮችን አገኙ። ምክንያቱም እግዚአብሔር ለጠላቶቻቸው የብዙ ፈረሶች እና የወታደሮች ድምፅ በማሰማት አስደንግጦ አባሯቸው ስለነበር ነው። በዚያው ሌሊት አራቱ ሰዎች ይህንን መልካም ዜና ለሕዝቡ ለመናገር ወደ ከተማ ተመለሱ። ሕዝቡም ዜናው ከተረጋገጠ በኋላ፥ ከከተማይቱ ወጥተው የሚበሉትን እና ብዙ ሌሎች ነገሮችን ወሰዱ።

እግዚአብሔር ጠላቶቻቸውን አስድንግጦ በማባረር ከነበሩበት መከራ አዳናቸው።

አራቱ ሰዎች ጠላቶቻቸው ትተው የሄዱትን ነገሮች ሲያገኙ

ኢዮብ 1

ኢዮብ እግዚአብሔርን የሚወድ ጥሩ እና ሀብታም ሰው ነበር። እግዚአብሔርም በእርሱ እጅግ ተደሰተ። ኢዮብም ሰውን ሁሉ የሚያክብር ጥሩ ተግባቢ ነበር። ሰባት ወንድ እና ሦስት ሴት ልጆች፥ እንዲሁም እጅግ ብዙ እንስሳት ነበሩት።

ለተወሰነ ጊዜ ሰይጣን ኢዮብን እንዲፈትነው እግዚአብሔር ፈቀደለት። ስለዚህ አንድ ቀን ሰይጣን ሊፈትነው መጣ። ወዲያውም ያለውን ሁሉ ከኢዮብ ላይ አጠፋበት። በዚህ ቀን ሰዎች በተደጋጋሚ እየመጡ መጥፎ ዜና ነገሩት። ስላጋጠመው መከራ ሁሉ ኢዮብ በጣም አዘነ። ሆኖም ግን “ሁሉን ነገር የሰጠኝ እግዚአብሔር ነው። መልሶ የወሰደውም እርሱ ነው። ስለዚህ አሁንም ክብር ለእግዚአብሔር ይሁን!” አለ።

መልእክተኞቹ ለኢዮብ ስለደረሰበት መከራዎች በየተራ ሲነግሩት እና ኢዮብ ሲያለቅስ

ኢዮብ 2-42

ከዚህም በኋላ ኢዮብ በበሽታ እጅግ ተሰቃየ። ሚስቱም ይህንን ስቃይ ስታይ “እግዚአብሔርን ስድብ እና ሙት!” አለችው። ኢዮብ ግን “አልሳደብም፥ ከእግዚአብሔር ብዙ መልካም ነገሮች ተቀብለናል። ክፉ ነገር ሲመጣም መቀበል እንጂ፥ እርሱን መተው የለብንም” ብሎ መለሰላት። ኢዮብ የመጣበትን የመከራ ምክንያት ባይረዳም፥ መጥፎ ነገር በመናገር እግዚአብሔርን አላሳዘነም።

ከረጅም ጊዜ በኋላ የኢዮብ ከባዱ መከራ አበቃ። ሰይጣን እርሱን እንደገና እንዲጎዳው እግዚአብሔር አልፈቀደለትም። ጤንነቱም ተመልሶለት በጣም ደህና ሆነ። እግዚአብሔርም እንደገና ሰባት ወንድ እና ሦስት ሴት ልጆችን ሰጠው። በተጨማሪም ከበፊቱ ይልቅ በብዙ እንስሳት ባረከው።

ኢዮብ በታመመ ጊዜ ጓደኞቹ መጥተው ሲጠይቁት

ዮናስ 1-2

በእስራኤል ዮናስ የሚባል ነቢይ ነበር። አንድ ቀን እግዚአብሔር “ነነዌ ወደምትባል ከተማ ሄደህ በዚያ የሚኖሩ ሰዎች ክፉ ስራቸውን እንዲያቆሙ፥ ካልሆነ ግን እንደምቀጣቸው ንገራቸው!” ብሎ ላከው። ዮናስ ግን ወደ ነነዌ መሄድ አልፈለገም። ከዚያ ይልቅ በአንድ መርከብ ውስጥ ገብቶ ወደ ሌላ አቅጣጫ ተጓዘ። ዮናስም እግዚአብሔርን ስላልታዘዘ ኃይለኛ ነፋስ ላከበት። በመርከቡ ውስጥ የነበሩ ሰዎች ችግሩ የደረሰባቸው በእርሱ ምክንያት እንደሆነ ተረዱ። ዮናስንም ማን እንደሆነ በጠየቁት ጊዜ፥ እርሱም “እኔ እግዚአብሔርን ስላልታዘዝኩ፥ ይህ ሆኗል። ወደ ውሃው ብትጥሉኝ ከባዱ ነፋስ ይቆማል” አላቸው። ዮናስም እንዳላቸው ካደረጉ በኋላ፥ ነፋሱ ቆመ። እግዚአብሔርም ትልቅ ዓሣ ዮናስን እንዲውጠው አዘዘ። ዮናስ ግን በዓሣው ሆድ ውስጥ ሆኖ በመጨረሻ* መጸለይ እና መዘመር ጀመረ።

ዮናስ ወደ ነነዌ አልሄድም ብሎ ሲሸሽ

ዮናስ 3-4

ዮናስ ዓሣ ሆድ ውስጥ እያለ እግዚአብሔርን ለመታዘዝ ወሰነ። እግዚአብሔርም ይቅርታ አደረገለት። ስለዚህ ዓሣው ዮናስን ወደ ባሕሩ ዳር ወስዶ ለቀቀው። ከዚህ በኋላ ዮናስ እግዚአብሔር እንደፈለገው ወደ ነነዌ ሄደ። በዚያም ለነበሩት ሰዎች እግዚአብሔር የሰጠውን መልእክት ሰበከ። በስብከቱም ክፉ ስራቸውን እንዲተዉ፥ ካልሆነ ግን እንደሚቀጡ አስጠነቀቃቸው። ሕዝቡም መልእክቱን እንደሰሙ አግዚአብሔር ይቅር እንዲላቸው በፍጹም ልብ ለመኑት። ክፉ ስራቸውንም ወዲያውኑ አቆሙ። በዚህም ምክንያት እግዚአብሔር ምሕረት አደረገላቸው።

እግዚአብሔር ሰዎችን በመቅጣት አይደሰትም። ሆኖም ግን ሰዎች እርስ በርሳቸው እና ከእርሱ ጋር በሰላም እንዲኖሩ ይፈልጋል። ነቢይ የላከላቸውም ለዚህ ነው።

የነነዌ ሕዝብ የዮናስን ማስጠንቀቂያ ሰምተው እግዚአብሔር ይቅር እንዲላቸው ሲለምኑ

አስቴር 1-5

አርጤክስስ የተባለው የፋርስ ንጉሥ እጅግ ኃያል ሰው ነበር። ከሕንድ እስከ ኢትዮጵያ ድረስ ባሉ ሀገራት ላይ ነገሠ። ሚስቱም ንግሥት አስቴር የምትባል እስራኤላዊት ነበረች።

ሐማ የተባለ ሰው የነጉሡ ዋና ሚኒስትር ነበር። የንግሥት አስቴር አጎት ስለማይሰግድለት፥ ሐማ እጅግ ተቆጣ። ከዚህ የተነሳ የእስራኤልን ሕዝብ በሙሉ ሊያጠፋ ከመንግሥት ደብዳቤ አጻፈ። እስራኤላውያንም ይህን በሰሙ ጊዜ በጣም ደነገጡ። ስለዚህ ክፉ ስራቸውን ትተው በጾም እና በጸሎት ወደ እግዚአብሔር ጮኹ። ንግሥት አስቴርም ወደ ነጉሡ ከመሄዷ በፊት ለሦስት ቀኖች ጾማ ጸለየች። ሕዝቡም ለአስቴር ጸለዩላት። ከዚያም በኋላ ለሕይወቷ አደገኛ ቢሆንም፥ ንጉሡ ሳይፈቅድላት ወደ እርሱ ሄደች። እርሱም ባያት ጊዜ ሳይቆጣት “አስቴር፥ ነይ! አትፍሪ! ምን ፈልገሽ መጣሽ?” አላት።

ንጉሡ አስቴርን በመልካም ሁኔታ ሲቀበላት

አስቴር 6-10

ንግሥት አስቴር ክፉውን ሚኒስትር ሐማን እና ንጉሡን በተከታታይ ሁለት ጊዜ እራት ጋበዘቻቸው። ከዚህም በኋላ አስቴር ንጉሡን እንዲያደርግላት የምትፈልገውን ጠየቀችው። እርሷም “ሕዝቤ በሐማ ተንኮል ምክንያት ሊጠፋ ተወስኗል፥ እባክህ አድነን” ብላ ለመነችው። ንጉሡም ልመናዋን ሰምቶ የእስራኤል ሕዝብ እንዳይጠፉ ትእዛዝ አስተላለፈ። ክፉው መሪ ሐማ ግን በሞት ተቀጣ። በእርሱ ቦታም የአስቴር አጎት ሚኒስትር ሆኖ ተሾመ።

ይህ ከጠላቶቻቸው የዳኑበት ቀን ለእስራኤላውያን የበዓል ቀን ሆነላቸው።

አስቴር፥ ሐማ እና ንጉሡ አብረው እራት ሲበሉ

2ኛ ዜና 36፥14-21

እስራኤላውያን ኃጢያት ሲሰሩ፥ እግዚአብሔር በተደጋጋሚ ማስጠንቀቂያ ይልክላቸው ነበር። ስለዚህም ሕይወታቸውን ለማስተካከል ብዙ ዕድሎች ነበራቸው። እግዚአብሔር ክፉ ስራቸውን እንዲተዉ ብዙ ጊዜ ነቢያትን ልኮላቸው ነበር። እነርሱ ግን ኃጢያታቸውን ስላልተው፥ በመጨረሻ የባቢሎን ንጉሥ እንዲያሸንፋቸው ፈቀደ። ጠላቶቻቸውም ኢየሩሳሌም ከተማን እና ቤተ መቅደሳቸውን አፈረሱባቸው። እስራኤላውያንም በብዛት ወደ ባቢሎን ሀገር ተወሰዱ።

ቢሆንም እግዚአብሔር በምሕረቱ ብዛት፥ ሕዝቡን ሙሉ በሙሉ አላጠፋም። አሁንም ወደ እርሱ እንዲመለሱ ይፈልግ ነበር። ሆኖም እግዚአብሔር በነቢዩ በኤርሚያስ በኩል ሕዝቡ ለሰባ ዓመታት በጠላቶቻቸው ጭቆና ሥር እንደሚሆኑ ተናገራቸው። ከዚያ በኋላ ግን ወደ ሀገራቸው እንደሚመለሱ ተስፋ ሰጣቸው።

ለሰባ ዓመታት

pic description

ዳንኤል 1

የባቢሎን ንጉሥ መልካም ወጣቶችን ለሦስት ዓመት ትምህርት እንዲማሩ መረጠ። ተምረው ሲጨርሱ ከመካከላቸው በጣም ጎበዝ ተማሪዎችን አመካሪዎቹ ለማድረግ አቀደ። ለእነርሱም ንጉሡ ራሱ ከሚበላው ምርጥ ምግብ እና መጠጥ እንዲቀርብላቸውም አዘዘ።

ከተመረጡትም መካከል እስራኤላውያን የሆኑት ዳንኤል እና ሦስት ጓደኞቹ ነበሩ። እነርሱ ግን በእግዚአብሔር የተከለከለውን ምግብ አንበላም አሉ። ስለዚህ በንጉሥ ምግብ ፋንታ ጥራጥሬ ሊበሉ እና ውሃ ብቻ ሊጠጡ ስለወሰኑ ፈቃድ ጠየቁ። ከተወሰኑ ቀኖች በኋላ ከሌሎቹ ወጣቶች ይልቅ ሰውነታቸው አምሮበት ታየ። በተጨማሪም እግዚአብሔር ከሁሉ ይበልጥ ጥበብን እና እውቀትን ሰጣቸው። ስለዚህም ንጉሡ የቅርብ አማካሪዎቹ እንዲሆኑ መረጣቸው።

ዳንኤል እና ሦስቱ ጓደኞቹ የንጉሡን ምግብ አንበላም ሲሉ

ዳንኤል 2

አንድ ሌሊት የባቢሎን ንጉሥ ሕልምን አየ። የሕልሙም ትርጉም ስላልገባው እጅግ ተጨነቀ። ስለዚህ ሕልምን መተርጎም ይችላሉ የተባሉ ሰዎችን ጠርቶ “ያየሁትን ሕልም እና ትርጉም ንገሩኝ! ሁለቱንም ልትነግሩኝ ካልቻላችሁ ግን፥ ሞት ይፈረድባችኋል” አላቸው። ሆኖም ሁሉም የንጉሥን ሕልም እና ትርጉም ሊያውቁ አልቻሉም።

ዳንኤል እና ጓደኞቹ ይህንን ሲሰሙ፥ እግዚአብሔር ሕልሙን እንዲገልጥላቸው በጾም እና በጸሎት ጠየቁ። እግዚአብሔርም ሕልሙን እና ፍቺውን ለዳንኤል ነገረው። ንጉሡ ያየው ሕልም ወደፊት ስለሚመጡት መንግሥታት እንደሆነ አስረዳው።

ዳንኤል ለንጉሡ ስላየው ሕልም ሲነግረው

ዳንኤል 3

አንድ ቀን የባቢሎን ንጉሥ እርሱን የሚመስል ትልቅ የወርቅ ሐውልት አሰራ። በመንግሥቱም ያሉትን መሪዎች ሁሉ ጠርቶ ለምስሉ እንዲሰግዱ አዘዛቸው። ሦስቱ የዳንኤል ጓደኞች ግን ለወርቁ ሐውልት ለመስገድ ፈቃደኛ አልነበሩም። ምክንያቱም ሊሰገድለት የሚገባው እግዚአብሔር ብቻ እንደሆነ ስላወቁ ነው። ንጉሡ ይህንን ሲሰማ በጣም ተናደደ። ከዚህ የተነሳ ወደ ትልቅ እሳት እንዲጣሉ አደረገ። ሆኖም ግን የእግዚአብሔር መልአክ ወደ እነርሱ ስለመጣ፥ እሳቱ ምንም አላቃጠላቸውም። ንጉሡም ይህንን ሲያይ “እንዴ! እንዴ! አራት ሰዎች በእሳት ሲመላለሱ እየያሁ ነው። ከመካከላቸው አንዱ የእግዚአብሔር መልአክ ይመስላል” አለ። ውዲያውም ሦስቱ ሰዎች ከእሳቱ እንዲወጡ ጠራቸው። ከዚያም “እንደ እስራኤል አምላክ ያለ ትልቅ አምላክ የትም የለም” አለ። ንጉሡም ሰዎች ሁሉ ከእንግዲህ ወዲህ የእስራኤልን አምላክ፥ እግዚአብሔርን በፍጽም እንዳይሰድቡ ሕግ አወጣ።

እግዚአብሔር ሦስቱን ሰዎች ከእሳት ሲያድናቸው

ዳንኤል 6

ዳንኤል ንጉሡን በታማኝነት ስለሚያገለግለው ይወደው ነበር። ሌሎች የመንግሥት ባለሥልጣኖች ግን በዳንኤል ቀኑበት። ዳንኤልም ሁልጊዜ የሚጸለይ ሰው እንደሆነ ያውቁ ነበር። ስለዚህ ወደ ንጉሡ ሄደው “ማንም ሰው ለሠላሳ ቀኖች ወደ አምላኩ እንዳይጸልይ፥ ከጸለየ ግን አንበሶች ወዳሉበት ጉድጓድ ይጣል” የሚል ሕግ አወጡ።

ዳንኤል ግን ሁልጊዜ እንደሚያደርገው በየቀኑ ወደ እግዚአብሔር መጸለዩን ቀጠለ። ባለሥልጣኖቹም ዳንኤልን ሲጸልይ አዩት። በዚያን ጊዜ በፍጥነት ወደ ንጉሡ ሄደው ያዩተን ነገሩት።

ዳንኤል ወደ እግዚአብሔር ሲጸልይ

ዳንኤል 6

ንጉሡ ዳንኤል ወደ እግዚአብሔር እንደጸለየ ሲሰማ፥ እርሱን ይወደው ስለነበር፥ በጣም አዘነ፤ ደግሞም ተጨነቀ። ሕጉ ግን የማይቀየር ስለሆነ፥ ንጉስ ሊረዳው አልቻለም።

ስለዚህ ዳንኤልን አንበሶች ወዳሉበት ጉድጓድ ውስጥ ጣሉት። በመጨረሻ ነጉሡ ለዳንኤል “ሁልጊዜ የምታመልከው አምላክህ ያድንህ!” ብሎት ወደ ቤቱ ተመለሰ።

በሚቀጥለው ቀን በማለዳ ንጉሡ ወደ ጉድጓዱ በፍጥነት ሄዶ “ዳንኤል፥ አምላክህ አዳነህ?” ብሎ ጮኸ። ዳንኤልም “አዎን፥ አምላኬ መልአኩን ልኮ የአንበሶችን አፍ ዘግቶ አዳነኝ” ሲል መለሰለት። ንጉሡም በጣም ደስ አለው። ወዲያውኑም ወደ ነበረበት ትልቅ ሥልጣን እንዲመለስ አደረገ። ንጉሡም ሰዎች ሁሉ ኃያል የሆነውን የዳንኤልን አምላክ፥ እግዚአብሔር ብቻ እንዲያከብሩ አዘዘ።

መልአኩ ዳንኤልን ከአንበሶች ሲጠብቅ

መጽሐፍ ነህምያ + ዕዝራ

በባቢሎን ሀገር ተማርከው ከተወሰዱት እስራኤላውያን መካከል የመጀመሪያዎቹ ወደ ሀገራቸው ተመለሱ። እነርሱም ፈርሶ የነበረውን ቤተ መቅደስ እንደገና መስራት ጀመሩ። ሆኖም ግን ጠላቶቻቸው እንዳይሰሩ ስለከለከሏቸው፥ ተስፋ ቆርጠው ትተውት ነበር። እግዚአብሔር ግን ቃሉን በነቢያቱ በሐጌ እና በዘካርያስ ልኮ አበረታታቸው። ከዚያም ሕዝቡ በፍጥነት ቤተ መቅደሱን ሰርተው ጨረሱ።

ከተወሰኑ ዓመታት በኋላ ደግሞ ነህምያ የተባለ ሰው ወደ ኢየሩሳሌም ሄዶ የፈረሰውን የከተማዋን አጥር ለመስራት ወሰነ። ሕዝቡም ከነህምያ ጋር ለመስራት ተስማሙ። ያደረጉትን መጥፎ ሰራዎቻቸውንም አቆሙ። ከዚያም በአንድነት መስራት ጀመሩ። ግማሾቹ ሰዎች አጥሩን ሲሠሩ፥ ሌሎቹ ደግሞ ከተማዋን ይጠብቁ ነበር። እግዚአብሔርም ስለረዳቸው፥ በኀምሳ ሁለት ቀኖች የከተማዋን ዙሪያ የድንጋይ አጥር በሙሉ ሰርተው ጨረሱ። በዚህም ሕዝቡ እጅግ ደስ አላቸው። እግዚአብሔርንም በዝማሬ አመሰገኑ።

ሕዝቡ የከተማዋን አጥር ከጠላቶቻቸው እየጠበቁ ሲሰሩ

ነህምያ 8-10 እና ዕዝራ 8

በሌላ ጊዜ ደግሞ ዕዝራ የተባለ ካህን ከባቢሎን ወደ ኢየሩሳሌም ተመለሰ። እርሱም የእግዚአብሔርን ቃል የማስተማር ችሎታ ነበረው። እስራኤላውያንን እንዴት ለእግዚአብሔር መኖር እንዳለባቸው አስተማራቸው። ከእርሱ ጋር የነበሩ ሰዎች ሕዝቡ በቀላሉ ትምህርቱን ማስተዋል እንዲችሉ ረዷቸው።

አንድ ጊዜ ደግሞ ሕዝቡ የእግዚአብሔርን ሕግ ሲሰሙ ተስፋ ስለቆረጡ፥ ግብዣ እንዲያደርጉ ነገራቸው። በተጨማሪም እግዚአብሔር ከዚህ በፊት ያደረገላቸውን መልካም ነገሮች ሁሉ በደንብ እያስታወሱ አመሰገኑ። ከትንሽ ጊዜ በኋላ ሕዝቡ እግዚአብሔርን ለመታዘዝ ቃል ገቡ።

በዚህ መንገድ ነህምያ እና ዕዝራ አብረው ወደ ኢየሩሳሌም የተመለሱትን ሕዝብ አገለገሉ።

ሕዝቡ የእግዚአብሔርን ቃል ሲሰሙ

ኢሳይያስ 9 + 11 + 53 ወዘተ

በእስራኤል ሀገር ኢሳይያስ የተባለ አንድ ነቢይ ነበር። እግዚአብሔር በእርሱ በኩል የእስራኤልን ሕዝብ በተደጋጋሚ አስጠነቀቀቸው፥ ደግሞም አበረታታቸው። እስራኤላውያን ግን እንደ አዳም እና ሔዋን እግዚአብሔርን አልታዘዙም። ኢሳይያስም ለወደፊት ከኃጢአታቸው ንጹሕ የሚያደርግ አዳኝ እንደሚመጣ ነገራቸው። በተጨማሪም “ይህ አዳኝ ይጠብቃችኋል፥ ይፈውሳችኋል፥ እንዲሁም ሰዎች ከእግዚአብሔር ጋር ወዳጅ እንዲሆኑ ያደርጋል” በማለት ስለ ኢየሱስ ትንቢት ተናገረ።

ይህንን ትንቢት የተናገረው ኢየሱስ ከመወለዱ ከ700 ዓመታት በፊት ነበር።

700

ዓመታት