ሉቃስ 10፥38-42

አንድ ቀን ኢየሱስ ከተከታዮቹ ጋር አንድን ቤተሰብ ጎበኙ። እነርሱም ማርታ፥ እህቷ ማርያም እና ወንድሟ አልዓዛር ነበሩ። በዚያን ጊዜ ማርያም ተቀምጣ ኢየሱስ የሚያስተምረውን ስትሰማ፥ ማርታ ግን እንግዶችን ለማስተናገድ በስራ ትተጋ ነበር። ከተወሰነ ጊዜ በኋላ ማርታ ኢየሱስን “እባክህ፣ እህቴን እንድትረዳኝ ንገራት” አለችው። ኢየሱስ ግን “ማርታ፥ በብዙ ነገር ትጨነቂያለሽ። ማርያም ግን እኔን በመስማቷ ከሁሉ የሚበልጠውን ነገር እያደረገች ነው” ብሎ መለሰላት።

ማርታ እንግዶቿን ስታስተናግድ እና ማርያም ደግሞ የኢየሱስን ትምህርት ስትሰማ

ሉቃስ 12፥16-21

ኢየሱስ ስለ ሀብት እንዲህ ሲል አስተማረ፡
– በጣም የተሳካለት አንድ ሀብታም ሰው ነበር። ማስቀመጫ ቦታ እስከማይበቃው ድረስ ብዙ ምርት አገኘ። ስለዚህ የምርት ማስቀመጫ ቤቶቹን አፈርሶ ከበፊት የበለጠ ትላልቅ አድርጎ ሰራቸው። ለራሱም “ከዚህ በኋላ የሚያስፈልገኝን ነገር ሁሉ ስላዘጋጅሁ፥ ለብዙ አመታት እየበላሁ እና እየጠጣሁ በደስታ እኖራለሁ” አለ። ሀብታሙ ሰው ግን በዚያች ሌሊት ሞተ። ስለዚህ ያለው ንብረት ለእርሱ ሊሆን እና ሊጠቅመው አልቻለም። ይህ ሀብታም ሰው በሰማይ ምንም ሀብት ሳያስቀምጥ ሞተ።

በከንቱ ብዙ ሀብት የሰበሰበ ሰውየው

ሉቃስ 13፥10-17

ኢየሱስ በሰንበት ምኵራብ በሚባለው በእግዚአብሔር ቤት ያስተምር ነበር። እዚያም ለአሥራ ስምንት አመታት የታመመች አንዲት ሴት አየ። ይህችም ሴት ከሰይጣን መንፈስ የተነሳ ቀጥ ብላ መቆም ወይም መራመድ አትችልም ነበር። ኢየሱስም ወደ እርሱ ጠርቶ እጁን በእርሷ ላይ አድርጎ ፈወሳት። ወዲያውም ጀርባዋ ቀጥ ስላለ፥ በትክክል መሄድ ቻለች። እግዚአብሔርንም ከበሽታዋ ስለፈወሳት በጣም አመሰገነች። የእግዚአብሔር ቤት መሪ ይህንን ፈውስ ባየ ጊዜ “በሰንበት ለምን ትፈውሳለህ? በሰንበት ስራ መስራት እንደማይፈቀድ አታውቅም?” ብሎ ተቆጣው። ኢየሱስም “በሰንበት እንሰሳው ጉድጓድ ውስጥ ወድቆ ቢያየው የማያወጣ ማንም የለም። እንዲሁም ይህች ለአሥራ ስምንት አመታት ሰይጣን ያሰራትን ሴት ከእስራቷ ልፈታት አያስፈልጋትም? ያስፈልጋታል” አለው።

ኢየሱስ በፍቅር የተሞላ ስለሆነ፥ ስራ በማይሰራበት ቀን እንኳን እንደዚህች ሴት የሚጨነቁትን ሰዎች ይረዳል።

ኢየሱስ በሰንበት አንዲትን ሴት ሲፈውስ

ሉቃስ 14፥15-23

ኢየሱስ ሰዎችን ወደ እግዚአብሔር መንግስት ስለመጥራት እንዲህ ሲል አስተማረ፡-

አንድ ታላቅ ሰው ትልቅ ግብዣን አዘጋጀ። ሰዎችንም ወደ ግብዣው እንዲጠራ ሰራተኛውን ላከው። ነገር ግን ከተጠሩት አንዱ “መሬት ስለገዛሁ ሄጄ ማየት አለብኝና መምጣት አልችልም” አለ። ሁለተኛው ደግሞ “በሬዎች ስለገዛው እነርሱን ላለማምድ እሄዳለሁ። ይቅርታ አድርግልኝ፥ መምጣት አልችልም” አለ። ሌላኛውም “አሁን ሚስት ስላገባሁ፥ መምጣት አልችልም” ብሎ መለሰለት። እንደዚህ ሁሉም የተለያዩ ምክንያቶች በመስጠት ቀሩ። ታላቁም ሰው እነዚህን መልሶች ሲሰማ በጣም ተቆጣ። ወዲያውም በእነርሱ ቦታ ድሆችን፥ አንካሶችን እና ዐይነ ስውሮችን ወደ ግብዣው አስጠራ። እነርሱም እሺ ብለው ወደ ግብዣው መጡ።

ድሆች እና በሽተኞች ወደ ግብዣው ሲመጡ

ዮሐንስ 10

ኢየሱስ በፍቅር የተሞላ እውነተኛ እረኛ ነው። ድምፁን ሰምተን ወደ እርሱ ከመጣን በጎቹ ነን። በየስማችን ያውቀናል ደግሞም ይጠራናል። እርሱን እንጂ ሌላ እረኛ አንከተልም። ይህ መልካም እረኛ ወደ ለምለም ቦታ ይመራናል። አውሬ ሲመጣብንም ይጠበቀናል እንጂ አይሸሸም። እርሱ ክፉን ሁሉ ያሸነፋል። ለበጎቹ ለመሞት እንኳን ዝግጁ ነው። ከመንጋው መስረቅ የሚችል ማንም የለም። ስለዚህ እውነተኛ መልካም እረኛ እርሱ ብቻ ነው። እርሱን ስንከተል ነው የዘላለም ሕይወት የሚኖረን።

ኢየሱስ መልካም እረኛ ሆኖ ከአደጋ በጎቹን ሲጠብቅ

ሉቃስ 15፥11-19

ኢየሱስ ስለ እግዚአብሔር ታላቅ ፍቅር እንዲህ ሲል በዚህ ታሪክ አስተማረ፡-

አንድ አባት ሁለት ልጆች ነበሩት። አንድ ቀን ታናሹ ልጅ አባቱን “የእኔን የሀብት ድርሻ ስጠኝ እና ልሂድ!” አለው። አባቱም በጥያቄው ቢያዝንም፥ ከሀብቱ ድርሻውን ሰጠው። ከዚያም ልጁ የተሰጠውን ገንዘብ ይዞ ወደ ሌላ አገር ሄደ። እዚያም ገንዘቡን በሙሉ አባክኖ ከጨረሰ በኋላ፥ የሚበላው አጣ። ስለዚህ በአንድ ገበሬ ቤት የዐሣማዎች እረኛ ሆኖ መስራት ጀመረ። እዚያም እያለ የዐሣማዎቹን ምግብ መብላት እስኪፈልግ ድረስ በጣም ተራበ። ስለዚህ ምን ማድረግ እንዳለበት ማሰብ ጀመረ። በመጨረሻም ከዚህ ችግር የሚወጣበት አንድ ጥሩ ሐሳብ መጣለት።

ልጁ ድርሻውን ወስዶ የአባቱን ቤት ትቶ ሲሄድ

ሉቃስ 15፥20-24

በመጨረሻም ልጁ በጣም ስለራበው እንደዚህ ብሎ አሰበ: “በአባቴ ቤት ለሰራተኞች ጭምር የሚሆን በቂ ምግብ ስላለ፥ ወደዚያ መመለስ አለብኝ። አባቴንም እንደሰራተኞቹ አድርጎ እንዲቀበለኝ እለምነዋለሁ” በማለት ወደ አባቱ ቤት ተመለሰ። አባቱ ገና ከሩቅ ባየው ጊዜ አዘነለት። ወደ እርሱም ሮጦ በደስታ አቅፎ ተቀበለው። ልጁም “እባክህ፥ አጥፍቻለሁና እንደ ሰራተኛህ ሆኜ እንድኖር ፍቀድልኝ። ከእንግዲህ ወዲህ ልጅህ ለመሆን ብቁ አይደለሁም” አለው። አባቱ ግን ልጁ በመመለሱ ደስ ስላለው፥ በፍጥነት የሚያምር ልብስ እና ቀለበት ሰጠው። የልጁንም መመለስ ለማክበር በሬን አርዶ ትልቅ ግብዣ አደረገለት።

አባቱ ከቤት የሄደበት ልጁ ሲመለስ በደስታ ሲቀበለው

ሉቃስ 16፥19-31

ኢየሱስ አንድን ታሪክ ተጠቅሞ እንዲህ ሲል አስተማረ፦

አልዓዛር የሚባል አንድ በጣም ድሀ ሰው ነበር። ከአንድ ሀብታም ሰው ቤት አጠገብ ተኝቶ ነበር። የሀብታሙን ሰው እርዳታ ቢጠብቅም፥ እርሱ ግን አልረዳውም። አልዓዛር ውሾች መጥተው ቁስሎቹን እስኪልሱ ድረስ ተሰቃየ። ሀብታሙ ሰው ግን በነበረው ሀብት ለራሱ ብቻ እየተደሰተ ይኖር ነበር።

አንድ ቀን አልዓዛር ሲሞት ወደ ጥሩ ቦታ ተወሰደ። እዚያም ከነ አብራሃም ጋር በታላቅ ደስታ መኖር ጀመረ። ትንሽ ቆይቶም ሀብታሙ ሰው ደግሞ ሞተ። እርሱ ግን በጣም አስከፊ እና ስቃይ ወዳለበት ቦታ ተወሰደ። ሰውየው ስለተሰቃየ አልዓዛርን መጥቶ ስቃዩን እንዲቀንስለት አብራሃምን ጠየቀ። አብራሃም ግን “ይህንን እዚህ ማድረግ የማይቻል ነገር ነው” ብሎ መለሰለት። ሀብታሙ ሰው ከመሞቱ በፊት እግዚአብሔር ደስ የሚለውን ነገር ቢያደርግ ኖሮ፥ ወደ ጥሩው ቦታ ይወሰድ ነበር።

አልዓዛር ከሀብታሙ ምግብ ሲጠብቅ እና ውሾች ቁስሉን ሲልሱ

ሉቃስ 17፥11-19

ኢየሱስ ወደ ኢየሩሳሌም በጉዞ ላይ እያለ፥ አሥር የቆዳ በሽታ ያለባቸው ሰዎች ከሩቅ አዩት። እንደዚህ ዐይነት በሽተኛ በሕዝብ መካከል መኖር አይችልም ነበር። እነዚህ አሥር ሰዎች “ኢየሱስ፥ እባክህ ፈውሰን!” ብለው ጮኹ። ኢየሱስም “ወደ ካህን ሄዳችሁ ከበሽታው እንደዳናችሁ ያረጋግጥላችሁ!” ብሎ ነገራቸው። እርሱም ይህንን ያለው ወደ ካህን በመሄድ ላይ እያሉ እንደሚፈወሱ ስላወቀ ነው። እነርሱም ኢየሱስ እንዳላቸው ሄዱ። በመንገድም ላይ እያሉ ተፈወሱ። መዳናቸውንም ለካህን አሳዩ። ይህም በዚያን ጊዜ ሰዎች ከቆዳ በሽታ መዳናቸውን የሚያረጋግጡበት የተለመደ ስርአት ነበር።

ከተፈወሱትም ሰዎች መካከል አንዱ ብቻ ወደ ኢየሱስ ተመልሶ በጣም አመሰገነው። ይህ ሰው እስራኤላዊ እንኳን አልነበረም። ኢየሱስም “በሰላም ወደ ቤትህ ሂድ! በእኔ ስላመንህ ድነኃል” አለው። ደግሞም “የፈውስኳቸው 10 ሰዎች ነበሩ፥ እኔን ለማመስገን የተመለሰ ግን አንድ ሰው ብቻ ነው” ሲል ተገረመ።

ከተፈወሱት አሥር ሰዎች አንዱ ብቻ ተመልሶ ኢየሱስን ሲያመሰግን

ሉቃስ 18፥1-8

ሁልጊዜ ስለ መፀልይ ኢየሱስ እንዲህ ሲል አስተማረ፡-

ችግር ያጋጠማት አንዲት ሴት ነበረች። ወደ አንድ ዳኛ ሄዳ ከሰው ጋር በገጠማት ክርክር ትክክለኛውን ፍርድ እንዲፈርድላት ጠየቀችው። ዳኛው ግን እግዚአብሔርን የማይፈራ እና ሰውንም የማያከብር ስለነበር፥ ሊፈርድላት አልፈለገም። ይሁን እንጂ ሴትየዋ ተስፋ ሳትቆርጥ በተደጋጋሚ እየሄደች ትጠይቀው ነበር። በመጨረሻም ዳኛው ብዙ ጊዜ በጥያቄዋ ስላስቸገረችው፥ በትክክል ፈረደላት።

ኢየሱስም “ይህ ክፉ ዳኛ ለሴትየዋ ከፈረደላት፥ የሚወዳችሁ እግዚአብሔር ሳታቋርጡ ብትለምኑት በእርግጥ ይረዳችኋል” አለ።

አንዲት ሴት በችግሯ እንዲረዳት ክፉውን ዳኛ ስትለምን

ሉቃስ 18፥9-14

ሁለት ሰዎች ወደ እግዚአብሔር ጸለዩ። አንደኛው ወደ ሰማይ እንኳን ቀና ብሎ ለማየት እየፈራ፡ “እባክህ እግዚአብሔር ሆይ፣ እኔ ጥፋተኛ ነኝና ይቅር በለኝ” ብሎ ጸለየ። ሌላው ትዕቢተኛ ሰው ስለነበረ “እግዚአብሔር ሆይ፥ እኔ እንደዚህ ኃጢአተኛ ወይም እንደ ሌሎች ክፉ ሰዎች ስላልሆንኩ፥ አመሰግንሃለሁ። በሳምንት ሁለት ቀን እጾማለሁ፥ ገንዘብ ለቤትህ ስራ እሰጣለሁ” ብሎ ጸለየ።

እግዚአብሔር በትህትና “እኔ ኃጢአተኛ ነኝና ይቅር በለኝ” ብሎ በጸለየው ሰው ተደሰተ። ራሱን ከፍ ከፍ ባደረገው ትዕቢተኛ ሰው ጸሎት ግን አልተደሰተም።

ትሑቱ እና ትዕቢተኛው ሰው ወደ እግዚአብሔር ሲጸልዩ

ማርቆስ 10፥13-16 + ሉቃስ 18፥15-17

ሰዎች ሕፃናትን እንዲባርካቸው ወደ ኢየሱስ ይዘው መጡ። የኢየሱስ ተከታዮች ይህንን አይተው እንዳያስችግሩት ከለከሏቸው። ኢየሱስ ግን
“ሕፃናት ወደ እኔ ይምጡ፥ አትከልክሏቸው” ብሎ ተቆጣቸው። ከዚህም በኋላ ሕፃናቱን አቅፎ ባረካቸው። በተጨማሪም “የእግዚአብሔር መንግሥት እንደ ሕፃናት ለሆኑ ናት። ደግሞም ወደ እግዚአብሔር መንግሥት ለመግባት እንደ ሕፃናት የምታምኑ መሆን አለባችሁ” አላቸው።

ኢየሱስ ሕፃናትን ተቀብሎ አቅፎ ሲባርክ

ማቴዎስ 18፥21-35

እግዚአብሔር እኛን ሁልጊዜ ይቅር እንደሚለን፥ እኛም ያሳዘኑንን ሰዎች ይቅር ማለት አለብን። ኢየሱስም ስለዚህ ጉዳይ አንድ ታሪክ በመናገር አስተማረ፦

ከአንድ ንጉሥ በጣም ብዙ ዕዳ የተበደረ አንድ ሰራተኛ ነበር። የተበደረውን ገንዘብ ግን በጊዜ መመለስ አልቻለም። ንጉሡም ለተበዳሪው ሰው የነበረበትን ዕዳ በሙሉ በመተው ምሕረት አደረገለት። ይህም ምሕረት የተደረገለት ተበዳሪ ለሌላ ሰው ትንሽ ብድር ሰጥቶ ነበር። እርሱም ገንዘቡን በጊዜ ሊመልስለት አልቻለም። የንጉሡ ሰራተኛ ግን ተበዳሪውን ሊምረው አልፈለገም። ስለዚህ ወደ እስር ቤት አስገባው። ንጉሡም ይህን በሰማ ጊዜ ተቆጥቶ ክፉውን ሰራተኛ አስጠራው። እርሱን እንደማረው ሌላውን ሰው ለምን እንዳልማረ ጠየቀው። ብዙ ምሕረት አገኝቶ እርሱ ግን ምሕረት ስላላደረገ፥ ንጉሡ በጣም ቀጣው።

እኛም ለሌሎች ምሕረት ካላደረግን፥ እግዚአብሔር እኛንም አይምረንም።

ምሕረትን የተቀበለው ሰራተኛ ለሌላ ሰው ምሕረት አላደርግም ሲል

ማቴዎስ 19፥16-26

አንድ ቀን አንድ ሀብታም ሰው ወደ ኢየሱስ መጥቶ “የዘለአለም ሕይወት ለማግኘት ምን ማድረግ አለብኝ?” ሲል ጠየቀው። ኢየሱስም “የእግዚአብሔርን ትእዛዛት አክብር። ‘ሰውን አትግደል! ለሚስትህ ታማኝ ሁን! አትስረቅ! በውሽት በሰው ላይ አትመስክር! አባትህን እና እናትህን አክብር! ሰውን እንደራስህ ውደድ!’ የሚለውን ሕግ አድርግ” አለው። ሀብታሙም ሰው “ያልከውን የእግዚአብሔርን ትእዛዛት ሁሉ አድርጌያለሁ” ብሎ መለሰለት። ኢየሱስም “አንድ ነገር ይቀርሀል። ያለህን ሁሉ ሽጠህ ለድሆች ስጥ! ከዚያም በኋላ መጥተህ ተከታዬ ሁን” ብሎ ነገረው። ሀብታሙ ሰው ግን ብዙ ገንዘብ ስለነበረው፥ ይህንን ማደርግ በጣም ከበደው። ስለዚህ አዝኖ ኢየሱስን ትቶ ሄደ።

ሀብታሙ ሰው ኢየሱስን የዘለአለም ሕይወት እንዴት ማግኘት እንደሚችል ሲጠይቀው

ሉቃስ 18፥35-43

አንድ ቀን ኢየሱስ በኢያሪኮ አካባቢ ከብዙ ሕዝብ ጋር ያልፍ ነበር። እዚያም አንድ ዐይነ ስውር መንገድ ዳር ተቀምጦ ገንዘብ ይለምን ነበር። ሰውየው ብዙ ጫጫታ ሲሰማ “ምን እየሆነ ነው?” ሲል ሰዎችን ጠየቀ። ሰዎቹም “ኢየሱስ እያለፈ ነው” ብለው መለሱለት። ስለዚህ ዐይነ ስውሩ “ኢየሱስ፥ ኢየሱስ! ማረኝ፥ እርዳኝ” ብሎ መጮኽ ጀመረ። አንዳንድ ሰዎች ዝም እንዲል ቢከለክሉትም፥ እርሱ ግን ይበልጥ ጮኸ። ኢየሱስም ሰምቶት ቆመ እና “ምን እንዳደርግልህ ትፈልጋለህ?” ብሎ ጠየቀው። ዐይነ ስውሩም “ማየት እፈልጋለሁ” አለው። ስለዚህ ኢየሱስ
“እይ” ሲለው፥ ወዲያው ማየት ቻለ። እግዚአብሔርን ከልብ አመስግኖ ኢየሱስን ተከተሎ ሄደ።

ኢየሱስ ዐይነ ስውር ሲፈወስ

ዮሐንስ 4፥1-42

እስራኤላውያን የሰማርያን ሕዝብ አይወዷቸውም ነበር። ኢየሱስ ግን እስራኤላውያን ብቻ ሳይሆን፥ ሳምራውያንንም ይወዳል። አንድ ቀን ከተከታዮቹ ጋር በሰማሪያ በኩል ሄደ። በዚያም በአንዲት ከተማ ሲያልፍ ውሃ ለመቅዳት የመጣች ሴትን አነጋገረ። በሕይወትዋም ዘመን ያደረገችውን ነገር እስክትደነቅ ድረስ ነገራት። ኢየሱስም እርሱ የሕይወትን ውሃ የሚሰጥ መሆኑን አሳወቃት። ይህም ውሃ ኢየሱስን በማመን የሚገኝ የዘለአለም ሕይወት ነው። እርሱም ልብን በሰላም ይሞላል። ከዚህ በኋላ ሴትየዋ ወደ ከተማ ሄዳ ለሕዝቡ ኢየሱስ ሚስጥሯን ሁሉ እንዳወቀ ነገረቻቸው። ንግግርዋንም ሰምተው ብዙ የሰማሪያ ሰዎች ወደ ኢየሱስ መጡ። ከእነርሱም ጋር እንዲቆይ ስለለመኑት፥ ለሁለት ቀናት አብሯቸው ሆነ። ብዙ የሰማሪያ ሰዎችም ኢየሱስ እግዚአብሔር የላከው አዳኝ እንደሆነ አመኑ።

ኢየሱስ ከሳምራዊትዋ ሴት ጋር ሲነጋገር

ሉቃስ 19፥1-10

ገንዘብ ከሚገባው በላይ ከሕዝብ በመውሰድ ሀብታም የሆነ ዘኬዎስ የሚባል ሰው ነበር። አንድ ቀን ኢየሱስ በሚኖርበት ከተማ እንደሚያልፍ ሰማ። እርሱም ኢየሱስን በጣም ማየት ፈለጎ ነበር። ቁመቱ ግን አጭር ስለነበር፥ ለማየት እንዲችል ዛፍ ላይ ወጣ። ኢየሱስም ቀና ብሎ ወደላይ አይቶት “ዘኬዎስ፥ ና ውረድ! ዛሬ በቤትህ መዋል እፈልጋለሁ” አለው። ዘኬዎስም በደስታ ከዛፉ ወርዶ ወደ ቤቱ ጋበዘው። እርሱም ኢየሱስን “ከሀብቴ ግማሹን ለድሆች እሰጣለሁ። ከሰውም ከመጠን በላይ የወሰድኩትን አራት እጥፍ እመልሳለሁ” ብሎ ተናገረ። በዚህ ጊዜ ኢየሱስ ለዘኬዎስ “ዛሬ ከጥፋት መዳን ሆነልህ” አለው።

ከዚህ ታሪክ የምንማረው፥ ኃጢአታቸውን ትተው ወደ እግዚአብሔር ለተመለሱ ሰዎች ሁሉ ኢየሱስ ምሕረትን እንደሚያደርግ ነው።

ዘኬዎስ ዛፍ ላይ ወጥቶ ኢየሱስን ሲያይ እና ኢየሱስ ሲጠራው

ሉቃስ 19፥28-44

ኢየሱስ ኢየሩሳሌም ከመድረሱ በፊት ከተከታዮቹ ሁለቱን ወደ ቅርብ መንደር ሄደው አንድ አህያ እንዲያመጡለት ነገራቸው። ከዚህ በፊት በአህያው ላይ ማንም ተቀምጦ አያውቅም ነበር። ተከታዮቹ አህያውን ካመጡለት በኋላ፥ ኢየሱስ ተቀምጦበት ወደ ኢየሩሳሌም ገባ። በዚህ ጊዜ ከእርሱ ጋር የነበሩ ሰዎች ልብሳቸውን በመንገድ ላይ አነጠፉ። ኢየሱስ ስላደረገውም ድንቅ ነገሮች ሁሉ በደስታ ተሞልተው በከፍተኛ ድምፅ እግዚአብሔርን አመሰገኑ። እነርሱም “በእግዚአብሔር ስም ለሚመጣው ንጉሥ ክብር እና ምስጋና ይሁን!” ብለው ጮኹ።

ይህ የሆነው ኢየሱስ ከመሞቱ ከአንድ ሳምንት በፊት ነው። በዚህ ጊዜ የኢየሩሳሌም ሰዎች ግን እርሱ አዳኝ እና የሰላም ንጉሥ መሆኑን አላወቁም ነበር። በዚህም ምክንያት ኢየሱስ ስለሚመጣባቸው መከራ አውቆ አለቀሰላቸው።

ኢየሱስ በአህያ ተቀምጦ ወደ ኢየሩሳሌም ከተማ ሲገባ

ዮሐንስ 2፥13-23 + ማርቆስ 11፥15-19 + ሉቃስ 19፥45-48

ኢየሱስ ወደ ቤተ መቅደስ ሲገባ፥ ሰዎች ቅዱሱን ቦታ የንግድ ቤት አድርገውት አየ። የጸሎት ቤት መሆን የነበረበትን የገበያ ሰፍራ ስላደረጉት ተቆጣ። ስለዚህም እንስሳቱን፥ ነጋዴዎቹን እና ደንበኞቻቸውን ከቤተ መቅደሱ አባረራቸው። ከዚያ በኋላ በቤተ መቅደስ ውስጥ ስለ እግዚአብሔር መንግሥት አስተማረ። ተአምራትንም ስላደረገ፥ ብዙዎች በእርሱ አመኑ። አብዘኛው የእስራኤል መሪዎች ኢየሱስ ባደረገው ነገር ተቆጥተው ሊገድሉት ፈልገው ነበር። ሕዝቡ ግን ኢየሱስን ወደውት ስለነበር፥ በቀላሉ ይህንን ማድረግ አልቻሉም።

ኢየሱስ በቤተ መቅደስ ውስጥ የሚደረገውን ገበያ ሲያስቆም

ማቴዎስ 20፥1-16

ትልቅ የወይን እርሻ የነበረው አንድ ሰው ነበር። የእርሻውን ፍሬ እንዲሰበስቡለት ሰራተኞች ፍለጋ በማለዳ ወደ ገበያ ሄደ። በገበያውም ሰራተኞችን አግኝቶ በደመወዝ ከተስማሙ በኋላ ቀጠራቸው። ከተወሰነ ሰዓት በኋላ እንደገና ሄዶ ተጨማሪ ሰራተኞችን ቀጠረ። ከሰአት በኋላም እንደገና ስራ ያላገኙ ሠራተኞችን አግኝቶ ቀጠራቸው።

በመሸም ጊዜ ደመወዝ ሲከፈል፥ ለሁሉም እኩል ከፈላቸው። በዚህም መጨረሻ ላይ ለመጡት ሰራተኞች መልካም አደረገላቸው። በማለዳ ተቀጥረው የሰሩት ሰራተኞች ግን በኋላ ከመጡት እኩል ስለተከፈላቸው፥ ቅሬታ አቀረቡ። የወይን እርሻ ባለቤትም “እኔ የተስማማነውን ደመወዝ ሰጠኋችሁ እንጂ፥ አልቀነስኩባችሁም። ከኋላ ለመጡት ሰዎች መልካም ስላደረግሁላቸው ለምን ትቀናላችሁ?” አላቸው።

ብዙ እና ትንሽ ሰዓት የሰሩ ሰራተኞች ሁሉ እኩል ደመወዝ ሲያገኙ

ሉቃስ 20፥20-26

ኢየሱስ በእስራኤል መሪዎች ላይ በምሳሌ ስለ መጥፎ ስራቸው ስለተናገረ ተናደዱበት። ሊያስሩትም ፈልገው ሕዝቡን ስለፈሩ አልቻሉም። ስለዚህ እርሱን ለማሳሳት በተንኮል “ለሮም መንግሥት ገንዘብ መክፈል ይፈቀዳል?” በማለት ጠየቁት። እርሱ ግን “አንድ ሳንቲም አሳዩኝ” አላቸው። ሲያሳዩትም “በዚህ ሳንቲም ላይ ያለው ምስል የማን ነው?” ብሎ ጠየቃቸው። እነርሱም “የታላቁ የሮም ንጉሥ ነው” ብለው መለሱለት። ከዚያም ኢየሱስ የንጉስ የሆነውን ለንጉሡ እንዲሰጡ ደግሞም የእግዚአብሔር የሆነውን ለእግዚአብሔር መስጠት እንዳለባቸው ነገራቸው። ሰዎቹም ጥበብ በተሞላው መልሱ ተገረሙ።

ኢየሱስ ለተንኮለኛ ጥያቄዎች በጥበብ መልስ ሲሰጥ

ዮሐንስ 11፥1-44

አልዓዛር፥ ማርታ እና ማርያም ኢየሱስ የሚወዳቸው ቤተሰብ ነበሩ። አንድ ቀን አልዓዛር በጣም ታመመ። ኢየሱስም መታመሙን ቢሰማም፥ ወደ እርሱ ሳይሄድ ባለበት ቦታ ሁለት ቀን ቆየ። አልዓዛርም በጣም ስለታመመ፥ በመጨረሻ ሞቶ ተቀበረ። ኢየሱስ የሚወደው በታመመ ሰአት ያልሄደበት ምክንያት፥ አልዓዛርን ከሞት በማስነሳት ሕዝቡ በእርሱ እንዲያምኑ ነበር።

እርሱም አልዓዛር ከሞተ ከአራት ቀን በኋላ ወደ ልቅሶው አካባቢ ቀረበ። እነ ማርታም መምጣቱን ሲሰሙ ሄደው አገኙት። ከዚያም ከማርታ፥ ከማርያም እና ከአጽናኞችዋ ጋር አልዓዛር ወደ ተቀበረበት ሰፍራ ሄደ። እዚያም ፀሎቱን ሁልጊዜ ስለሚሰማው እግዚአብሔርን አመስግኖ “አልዓዛር፥ ና፥ ውጣ!” ብሎ ጠራው። ወዲያውኑ ከሞት ተነስቶ ከመቃብር ወጣ። ሕዝቡም ይህንን ባዩ ጊዜ በጣም ተገረሙ። ብዙዎችም ኢየሱስ እግዚአብሔር የላከው አዳኝ መሆኑን አውቀው በእርሱ አመኑ።

ኢየሱስ የሞተውን አልዓዛር ከመቃብር እንዲወጣ ሲጠራው

ሉቃስ 21፥1-4

አንድ ቀን ኢየሱስ ከተከታዮቹ ጋር ወደ ቤተ መቅደስ ገባ። በዚያም ሰዎች ለእግዚአብሔር ስጦታ ሲሰጡ ተመለከተ። አንዳንድ ሀብታም ሰዎችም ብዙ ገንዘብ ሲሰጡ አየ። አንዲት ድሀ ሴት ግን ያላትን ትንሽ ሳንቲም ሰጠች። ኢየሱስም ለተከታዮቹ ድሀዋ ሴት ከሀብታሞች ይበልጥ እንደሰጠች ነገራቸው። ምክንያቱም እርሷ ያላት ሁለት ሳንቲም ቢሆንም፥ ሁሉንም ስለሰጠች ነበር። ሀብታሞቹ ግን የሰጡት ካላቸው ገንዘብ ጥቂቱን ብቻ ነው።

ሰዎች ለእግዚአብሔር ገንዘብ ሲሰጡ እና ኢየሱስ ሲመለከት

ማቴዎስ 25፥14-30

አንድ ሀብታም ሰው ሠራተኞቹን ጠርቶ ነግደው እንዲያተርፉበት ለእያንዳንዳቸው ገንዘብ ሰጣቸው። ከዚያም ወደ ሌላ ሩቅ ሀገር ሄደ።

ሀብታሙ ሰው ከተመለሰ በኋላ ሠራተኞቹን እንደገና ጠራ። ሁለቱ ሰዎች በተሰጣቸው ገንዘብ በጥሩ ሁኔታ ሰሩበት። ስለዚህ ከተሰጣቸው በላይ ብዙ ትርፍ አገኙ። በዚህ ምክንያት ባለሀብቱ ሸለማቸው። ሦስተኛው ሰው ግን በተሰጠው ገንዘብ ስላልሰራበት፥ ምንም አላተረፈም። ስለዚህ ባለሀብቱ ሰነፉን ሰው ተቆጥቶ የሰጠውን ገንዘብ ወሰደበት።

ከእግዚአብሔር የተቀበልነውን በጥሩ ሁኔታ ከተጠቀምንበት እየበዛ ይሄዳል።

ባለሀብቱ የተቀበለውን ገንዘብ ስላልሰራበት በሰነፉ ሰው ላይ ሲናደድ