ዘጸኣት 1፡1-2፡10

ድሕሪ ሞት ዮሴፍ ህዝቢ እስራኤል ኣብ ምድሪ ግብጺ ኣዝዩ በዝሐ። ንህዝቢ እስራኤል ዘጨንቅ ሓደ እኩይ ንጉስ ድማ ተንስአ። እዚ ንጉስ ድማ ዮሴፍ ንግብጺ ዝገበሮ ሰናይ ግብሪ ኣይፈለጠን ነበረ። ስለዚ ድማ ንጉስ ከቢድ ስራሕ አስርሖም። ቁጽሮም እንዳ በዝሐ ስለዝከደ ፈርሐ። በዚ ምኽንያት ድማ ወዲ ተባዕታይ ቆልዓ ኣብ ዝውለደሉ እዋን ክቕተል ኣዘዘ። ሓንቲ እስራኤላዊት ኣደ ግና ሙሴ ዝበሃል ቆልዓ ወለደት፡ ኣብ ቤታ ንሰለስተ ወርሒ ሓቢኣቶ። ጸኒሓ ግን ኣብ ተንሳፋፊ ሳጹን ኣእትያ ኣብ ሳዕሪ ኣብ ገምገም ሩባ ኣቀመጠቶ። ነዊሕ ከይጸነሐ ጓል ንጉስ ረኸበቶ። ኣዝያ ስለ ዝደንግጸትሉ ድማ ወሲዳ ከም ወዳ ኣዕብያቶ።

ጓል ንጉስ ንሙሴ ክትረክቦ ከላ

ዘጸኣት 2፡11-3፡22

ሙሴ ኣብ ቤት ንጉስ ዓብዩ። ኣብኡ ከሎ ድማ ሓያልን ምሁርን ሰብ ኮነ። ጸኒሑ ንህዝቢ እስራኤል ክሕግዝ ፈተነ። እቲ ንጉስ ነዚ ምስ ሰምዐ ተቘጥዐ። ስለዚ ሙሴ ናብ በረኻ ሃደመ። ኣብኡ ድማ ንብዙሕ ዓመታት ተቐመጠ። ሰበይቲ ተመርዕዩ ውላድ ወለደ።

ሓደ መዓልቲ ሙሴ ኣብ ቁጥቋጥ ሓዊ ረኣየ። እንተኾነ እቲ ሓዊ ነቲ ቁጥቋጥ ኣየቃጸሎን። እግዚኣብሄር ኣብቲ ቁጥቋጥ እዩ ነይሩ። ንሱ ድማ “ኣነ ኣምላኽ ኣብርሃምን ይስሃቅን ያእቆብን እየ፡ እግዚኣብሄር ኣምላኽካ እየ” ኢሉ ተዛረቦ። ከምኡ ውን ከምዚ በሎ “ብኽያትን ኣውያትን ህዝበይ ስለ ዝሰማዕኩ ከም ዝተመባጸዓክዎ መብጻዓይ ክሕግዞም እየ” በሎ።

ንሙሴ ከአ ንህዝቢ እስራኤል ካብ ምድሪ ግብጺ ሓራ ከውጽኦም ኣዘዞ።

ሙሴ ኣብ ቁጥቋጥ ሓዊ ክርኢ ከሎ

ዘጸኣት 4-7

እግዚኣብሄር ንሙሴ ናብ ግብጺ ከይዱ ንህዝቢ እስራኤል ሓራ ከውጽእ ኣዚዝዎ ነበረ። ሙሴ ግና ፈሪሑ ናብ ግብጺ ክምለስ ኣይደለየን። ይኹን እምበር፡ ቃል ኣምላኽ ተኣዚዙ ከደ። ሓዉ ኣሮን እውን ከም ዝሕግዞ ኣምላኽ ነገሮ። ስለዚ ሙሴን ኣሮንን ናብ ንጉስ ግብጺ ብምኻድ “እግዚኣብሄር ‘ንህዝበይ ሕደጎም!’ ኢሉካ” ኢሎም ተዛረብዎ። እቲ ንጉስ ግን ኣበየ። ብድሕሪ እዚ እግዚኣብሄር ብሙሴን ኣሮንን ኣቢሉ እቲ ካብ ኩሎም ዝዓበየ ኣምላኽ ምዃኑ ንምግላጽ ከምዚ ዝአመሰለ ተኣምር ፈጸመ። ኣሮን በትሩ ምስ ደርበዩ ድማ ተመን ኮነ። እቲ ተመን ግና ነቶም ናይ ካልኦት ኣትማን ወሓጦም። ይኹን እምበር፡ እቲ ንጉስ ነቶም ህዝቢ ኪሓድጎም ኣይደለየን። ኣምላኽ ግና “ንህዝበይ ብርግጽ ነጻ ከውጾዖ እየ” በለ። ንግብጻውያን ድማ ብዙሕ መከራ ብምልኣኽ ኣጠንቀቖም።

በትሪ ሙሴ ተመን ምስ ኮነ

ዘጸኣት 12

ኣብ መወዳእታ እግዚኣብሔር ንሙሴን ኣሮንን “ንህዝቢ እስራኤል ንነፍሲ ​​ወከፍ ስድራ ሓደ ገንሸል ክሓርዱን ደሙ ኣብ ኣፍደገ መዓጾ ክለኽይዎ እዘዙዎም!” በሎም። ነቲ ስጋ ጠቢሶም ክበልዕዎ እውን ነገሮም። እቶም ህዝቢ ድማ ከምቲ ኣምላኽ ዝበሎም ገበሩ።

እቶም ደም ገንሸል ኣብ ኣፍደገኦም ዝቐብኡ እስራኤላውያን ግና ወልሓደ ሰብ ኣይሞተን። ብዙሓት ካብ ግብጻውያን ድማ በታ ለይቲ እቲኣ ሞቱ። ብድሕሪ እዚ ንጉስ ግብጺ ንእስራኤላውያን ካብታ ሃገር ክወጹ ተማሕጸኖም። ስለዚ ድማ ቀልጢፎም ካብ ግብጺ ወጹ። እግዚኣብሄር ብዓቢ ሓይሉ ንእስራኤላውያን ካብ ባርነት ሓራ ኣውጽኦም።

እስራኤላውያን ደም እቲ ገንሸል ኣብ ኣፍደገ ገዝኦም ምስ ለኸዩ

ዘጸኣት 14

ከምቲ ኣምላኽ ዝበሎ እስራኤላውያን ካብ ግብጺ ወጺኦም። ነቲ አባኡ ዝነበረ በረኻ ሰጊሮም ብምካድ ኣብ ቀይሕ ባሕሪ በጽሑ። ሽዑ ግብጻውያን ብቑጥዐ ደድሕሪኦም መጹ። ኣብዚ ግዜ እዚ እስራኤላውያን ናበይ ክሃድሙ ከም ዝኽእሉ ስለ ዘይፈለጡ፡ ኣዝዮም ፈሪሖም። ስለዚ ድማ ናብ ኣምላኽ ክሕግዞም ኣእወዩ። እግዚኣብሄር ብሙሴ ኣቢሉ ተኣምር ፈጺሙ ነቲ ኣብ ቅድሚኦም ዝነበረ ባሕሪ መቂሉ መንገዲ ገበረሎም። እቲ ህዝቢ ድማ ብማእከል ባሕሪ ብምሕላፍ ካብ ጸላእቱ ኣምለጠ። እንደገና ግብጻውያን ብድሕሪኦም ሰዓቡ። እስራኤላውያን ባሕሪ ምስ ሰገሩ ግና፡ ኣምላኽ ነቲ ማይ ናብ ግብጻውያን ከም ዝምለስ ገበረ። ኣብ ማይ ጢሂሎም ድማ ሞቱ። እስራኤላውያን ግና ንኣምላኽ ስለ ዘድሓኖም ኣዝዮም ኣመስገኑ።

ሙሴን ህዝብን ኣብ ማእከል ባሕሪ ክከዱ ከለዉ እግዚኣብሄር ብድሕሪኦም አብ ውሽጢ ደበና ኮይኑ ክሕልዎም ከሎ

ዘጸኣት 16-17

እስራኤላውያን መብዛሕቲኡ ጊዜ ክትነብረሉ ብዘይከአል በረካታት አቢሎም ጕዕዞኦም ቀጸሉ። እግዚኣብሄር ንህዝቢ ኣብቲ ዋላ ሓንቲ ዘይብሉ በረኻ ካብ ሰማይ ዝበልእዎ ምግቢ ሂብዎም። ነቲ ምግቢ ድማ ማና ኢሎም ሰመይዎ። ነቲ ካብ መሬት ዝእክብዎ ዝነበሩ ማና መዓልታዊ ይበልዑ ነበሩ።

ኣብ በረኻ እናሃለዉ ድማ ዝሰትይዎ ማይ ሰአኑ። በዚ ምኽንያት ድማ አብ ልዕሊ ሙሴን ኣምላኽን ክፉእ ተዛረቡ። እቲ ህዝቢ ግን ኣብ ኣምላኽ ክውከሉ ነበሮም። ስለዚ ሙሴ “ስለምንታይ ኣብ ልዕለይን አብ ኣምላኽን ክፉእ ዘረባ ተዛሪብኩም?” በሎም። እንተኮነ ግን ሙሴ ማይ ክህቦም ንኣምላኽ ለመኖ። ኣምላኽ ንሙሴ ብበትሩ ሓደ ከውሒ ክሃርም ነገሮ። ከውሒ ማለት ኣዝዩ ዓቢ እምኒ እዩ። ሙሴ ነቲ ከውሒ ብበትሩ ምስ ወቕዖ ማይ ወጸ። እቲ ማይ ንልዕሊ ሓደ ሚልዮን ንዝኮኑ እስራኤላውያን ዝኣክል እዩ ነይሩ።

‘እቶም ህዝቢ ነቲ እግዚኣብሔር ዝሃቦም ማይ ምስ ሰተዩ ምግቢ (ማና) ክእክቡ ከለው

ዘጸኣት 19-20 + 31፡18

ሓደ መዓልቲ ኣምላኽ ንሙሴ ናብ እምባ ሲና ክድይብ ነገሮ። ህዝቢ ግን ምስኡ ክኸይድ ኣይተፈቕደሉን። እግዚኣብሄር ድማ ንሙሴ ኣብቲ እምባ ካብ ውስጢ ሓዊ ኮይኑ ኣዛረቦ። ኣብኡ ድማ ዓሰርተ ትእዛዛት ኣብ ጽላት እምኒ ንህዝቢ እስራኤል ጽሒፉ ካልእ ሕግታት እውን ሃቦም።

እግዚኣብሄር ነዚ ሕግታት እዚ ዝሃቦም ምእንታን ምስኡን ኣብ ነንሕድሕዶምን ብሰላምን ብፍቕርን ክነብሩ እዩ።

ሙሴ ዓሰርተ ትእዛዛት ኣምላኽ ሒዙ ካብ እምባ ሲና ምስ ወረደ

ዘሁልቁ 13-14

ድሕሪ ቁሩብ ግዜ ሙሴ ምድሪ ከነኣን ከመይ ከም እትመስል ክርእዩ ዓሰርተው ክልተ ሰባት ለኣኸ። ከይዶም ድማ ነቲ ፍረታትን ህዝብን ከተማታት ከነኣንን ረኣዩ።

ካብ ከነኣን ምስ ተመልሱ ንህዝቢ እስራኤል ዝረኣይዎ ኩሉ ነገርዎም። ዓሰርተ ካብኣቶም “እግዚኣብሄር ከምዝበሎ እታ ሃገር ድንቂ እያ። ኣብኡ ዝነብሩ ሰባት ግን ኣዝዮም ነዋሕትን ሓያላትን ስለ ዝኾኑ ክንስዕሮም ኣይንኽእልን ኢና” በሉ። ህዝቢ ነዚ ምስ ሰምዐ ተስፋ ቆረጸ።

ካብቶም ዓሰርተው ክልተ ሰባት ግን ክልተ እያሱን ካሌብን ነቲ ህዝቢ ኣተባባዕዎ። ንህዝቢ ድማ “ህዝቢ ከነኣን ዓበይቲ እኳ እንተኾኑ፡ ኣምላኽ ምሳና ስለ ዘሎ፡ ክንስዕሮም ኢና” በልዎ።

እስራኤላውያን ሓገዝን ተኣምራትን ኣምላኽ ብዙሕ ግዜ እኳ እንተ ረኣዩ፡ ብእኡ ግና ኣይእመኑን ነበሩ። በዚ ምኽንያት ድማ እግዚኣብሔር “ብዘይካ እያሱን ካሌብን ደቅኹምን ኩልኹም ናብ ምድሪ ከነኣን ኣይክትኣትዉን ኢኹም” በሎም። ስለዚ እቲ ህዝቢ ንኣርብዓ ዓመት ኣብ በረኻ ኮለል በለ።

የተላኩት ሰዎች ለሙሴ በከነዓን ሀገር ያዩትን ሲነግሩት

ዘሁልቁ 21

እስራኤላውያን ኣብ በረኻ ክጓዓዙ ከለዉ፡ እግዚኣብሄር ዘድልዮም ሂብዎም። ንሳቶም ግን ክዓግቡ ኣይከኣሉን። ኣብ ምድረበዳ እናተቐመጡ ከለዉ ድማ ኣብ መንጎ እቶም ህዝቢ ኣንጻር ኣምላኽን ሙሴን ብዙሕ ክፉእ ዘረባ ተሰምዐ። በዚ ምኽንያት ድማ እግዚኣብሄር መርዛማት ኣትማን ሰደደሎም። ብዙሓት ሰባት ብኣትማን ተነኺሶም ሞይቶም። እቶም ህዝቢ ነዚ ምስ ረኣዩ ድማ ንኣምላኽ ይቕሬታ ​​ለመኑ። ሙሴ ድማ መሊሱ ንኣምላኽ ከድሕኖም ለመኖ። ጸሎቱ ድማ ሰምዐ። ንሙሴ ድማ ካብ ኣስራዚ ተመን ሰሪሑ ኣብ ባላውን ክሰቕሎ ነገሮ። እቶም ብኣትማን ዝተነኸሱ ነታ ናይ ኣስራዚ ተመን ምስ ረኣዩ፡ ብኡንብኡ ድሒኖም።

ከምቲ ኣምላኽ ዝበሎ ሙሴ ነቲ ተመን ኣስራዚ ዘለዎ ባላ ክተኽላ ከሎ

እያሱ 1-3 + ዘዳግም 34፡10

ሙሴ ኣብ ሓደ ከረን ኮይኑ ንከነኣን ካብ ርሑቕ ረእዮ። ድሕሪኡ ኣብኡ ኣብ ከረን ሞተ። ሙሴ ንእግዚኣብሄር ፊት ንፊት ዝረኣየን ዘዘራርቦን ኣዝዩ ትሑት ሰብ እዩ ነይሩ። ቅድሚኡ ይኹን፡ ብድሕሪኡ ኣብ እስራኤል ከማኡ ዝኣመሰለ ነብዪ ኣይነበረን።

ሙሴ ምስ ሞተ፡ ኣምላኽ ንእያሱ መራሒ ገበሮ። ንህዝቢ እስራኤል ናብ ምድሪ ከነኣን ክመርሖም ነገሮ። ከነኣን እታ ኣምላኽ ንኣብርሃም ቃል ዝኣተወላ ምድሪ እያ ነይራ። ስለዚ እያሱን እቶም ህዝብን ተንሲኦም ናብ ፈለግ ዮርዳኖስ መጹ። ናብ ከነኣን ንምኻድ ግን ንሩባ ዮርዳኖስ ክሰግሩ ነበሮም። እቲ ሩባ ማይ መሊኡ ስለ ዝነበረ፡ ክትሰግሮ ዘፍርሕ እዩ ነይሩ። ስለዚ ፈለማ እቶም ካህናት ታቦት ተሰኪሞም ብእግሮም ውሽጢ ሩባ ኣትዮም ሩባ ደው በሉ። ኣብዚ ግዜ እዚ እቲ ማይ ድማ ኹምራ ኮይኑ ደው ኢሉ ስለ ዝነበረ፡ ብቐሊሉ ንሩባ ዮርዳኖስ ብደረቕ መሬት ሰገሩ። ብድሕሪ እዚ ኣብ ከነኣን በጽሑ።

እግዚኣብሄር ማይ ደው ምስ ኣበለ ህዝቢ እስራኤል ምስ ሰገረ

ኢያሱ 6

ኣብ ሃገር ከነኣን ኢያሪኮ እትበሃል ከተማ ነበረት። ኣብ ዙርያኣ ድልዱል መካበቢያ እምኒ ነበሮ። ስለዚ ብቐሊሉ ናብ ኢያሪኮ ኣቲኻ ክትዕወት ​​ኣይከኣልን ነይሩ። እግዚኣብሄር ድማ ንእስራኤላውያን ንኽዕወቱ፡ እንታይ ክገብሩ ከም ዘለዎም ከምዚ ኢሉ ነገሮም፡ “ንሽዱሽተ መዓልቲ ነታ ከተማ አብ መዓልቲ ሓደ ግዜ ብስቕታ ዙርዋ! ኣብታ ሻብዓይቲ መዓልቲ ሸውዓተ ጊዜ ዘርኩም ምስ ወዳኣኩም፡ ብዓው ዝበለ ድምጺ ጨድሩ!” ኢለዎም።

እቶም ህዝቢ ድማ ከምቲ ኣምላኽ ዝበሎም ነታ ከተማ ይዞርዋ ነበሩ። ኣብ መወዳእታ እታ መዓልቲ ምስ ጨደሩ መካበብያ ኢያሪኮ ወደቀ። በዚ መንገዲ እዚ ድማ ነታ ከተማ ክስዕሩ ክኢሎም። ይኹን እምበር፡ ኣብ መንጎ ህዝቢ ኢያሪኮ፡ ኣብ ቤቶም ቀይሕ ገመድ ዝሰቐላ ስድራቤት ኣድሒኖምም። ምኽንያቱ ሓንቲ ሰበይቲ ካብታ ስድራ ቤት ቅድሚ ሕጂ ንእስራኤላውያን ሓጊዛቶም ነይራ።

መካበብያ ኢያሪኮ ብሓይሊ እግዚኣብሄር ምስ ወደቀ

ኢያሱ 24

ኢያሱ ንብዙሕ ዓመታት ንህዝቢ እስራኤል ብጽቡቕ መሪሕዎ። ቅድሚ ሞቱ ንኩሎም መራሕቲ ህዝቢ ኣኪቡ። ነቲ እግዚኣብሄር ንኣቦታቶም ዝገበሮ ዅሉ ዕዮ ድማ ነገሮም። እግዚኣብሄር ካብ ግብጺ ከም ዘውጽኦምን፡ ኣብ በረኻ ዘድልዮም ኩሉ ከም ዘቕረበሎምን ናብ ምድሪ ተስፋ ከም ዝመርሖምን ኣዘኻኸሮም። ሽዑ እያሱ፡ “ኣነን ስድራይን ንእግዚኣብሄር ነምልኽ። ንስኩም ኸ ንመን ከተምልኹ ትደልዩ? ንእግዚኣብሄር ድዩ ወይስ ካልኦት ኣማልኽቲ?” ኢሉ ምርጫ ሃቦም። ኩሎም እቶም ህዝቢ ድማ “ንእግዚኣብሄር ኽነምልክ ንደሊ ኢና” ኢሎም መለሱ። እያሱ ድማ “ንእግዚኣብሄር እንተ መሪጽኩም ንዕኡ ጥራይ ተኣዘዞ!” ኢልዎም።

ህዝቢ እስራኤል ንእግዚኣብሄር ክእዘዙ ምስ ወሰኑ

መሳፍንቲ 6

እስራኤላውያን ንእግዚኣብሄር ከም ዚእዘዙ ቃል ኣትዮም ነይሮም እዮም። እንተኾነ ብዙሕ ግዜ መብጽዓኦም ክፍጽሙ ኣይከኣሉን። በዚ ምኽንያት እዚ፡ እግዚኣብሄር ሓድሓደ ግዜ ብኻልኦት ኣህዛብ ከጨንቅዎም ይፈቅድ ነበረ። እቲ ጸገም ንእስራኤላውያን ምስ ከብዶም ድማ፡ ካብ እግዚኣብሄር ሓገዝ ሓተቱ። ብዘመን ጊዴዎን ድማ ብጸላእቶም ተጨኒቆም ስለዝነበሩ ናብ እግዚኣብሄር አእወዩ።

እግዚኣብሄር ኣውያቶም ስለ ዝሰምዐ፡ “ሓደ መዓልቲ ንጊዴዎን መልኣኽ ተራእዩ አነ ምሳኻ ክኸውን እየ። ብኣኻ ድማ ንህዝቢ እስራኤል ካብቶም ዘጨንቅዎም ሰባት ሓራ ክገብሮም እየ” በሎ። ሽዑ ጊዴዎን ንእግዚኣብሄር ኣምላኽ ጽቡቕ ምግቢ ኣቕረበሉ።
እቲ መልኣኽ ድማ ነቲ ምግቢ ከይበልዐ ብበትሩ ተንከፎ። ሓዊ ድማ ካብ ሰማይ ወሪዱ ነቲ ምግቢ ኣቃጸሎ። በዚ ኣቢሉ ድማ፡ ጊዴዎን እግዚኣብሄር ንህዝቡ ንምድሓን ብሓቂ ከም ዝሓረዮ ፈለጠ።

ጊዴዎን ነቲ መልኣኽ መግቢ ምስ ኣቕረበሉ እሞ እቲ መግቢ ብሓዊ ምስ ተቓጸለ

መሳፍንቲ 7

እቲ ህዝቢ ድማ ከምቲ እግዚኣብሄር ዝበሎ ብመሪሕነት ጊዴዎን ንጸላእቱ ክዋጋእ ተዳለወ። እግዚኣብሄር ግና ንጊዴዎን “እቲ ህዝቢ ኣዝዩ ብዙሕ እዩ እሞ ኣጉድል!” ኢለዎ እዩ። ስለዚ፡ ጊዴዎን ነቶም ፈሪሖም ዝነበሩ ሰባት ናብ ቤቶም መለሶም።

ሕጂ ውን እግዚኣብሄር “እቶም ሰባት ኣዝዮም ስለ ዝበዝሑ፡ ክቕነሱ ኣለዎም በሎም። ስለዚ ማይ ክሰትዩ ናብ ሩባ ኣምጺእዎም፡ ነቶም ክሰትዩ ዝተንበርከኩ ድማ ናብ ቤቶም ስደዶም!” በሎ። ጊዴዎን ድማ ከምቲ እግዚኣብሄር ዝበሎ ገበረ። ብድሕሪ እዚ ሰለስተ ሚእቲ ሰባት ጥራይ ተሪፎም። ምስ ጸላእቶም ክዋጋዕ ሒዝዎም ድማ ከደ። እግዚኣብሄር ስለ ዝተዋጋዓሎም ድማ ንብዙሓት ኣሽሓት ጸላእቶም ሰዓሩ። እግዚኣብሄር ውሑዳት ሰባት ጥራይ ናብ ውግእ ዝሰደደ፡ እቲ ዓወት ካብኡ ከም ዝመጸ ምእንቲ ክፈልጡ ኢዩ።

ጊዴዎን ቁጽሪ ሰባት ንምቅናስ እቶ ሰባት ከመይ ጌሮም ማይ ከም ዝሰትዩ ክሪኢ ከሎ

መሳፍንቲ 13+14

ሕጂውን ኣብ ካልእ ዘመን እስራኤላውያን ኣዝዮም ተጨኒቖም ስለ ዝነበሩ፡ ናብ እግዚኣብሄር ኣእወዩ። ኣምላኽ ድማ ጸሎቶም ሰምዐ። ኣብዚ ግዜ እዚ ውላድ ክወልዱ ዘይካአሉ ሰብኣይን ሰበይትን ፍሉይ ውላድ ሃቦም። እቲ ቆልዓ ቅድሚ ምውላዱ ድማ እግዚኣብሄር “እቲ ቆልዓ ናተይ ምዃኑ ምእንቲ ክፍለጥ፡ ጸጉሩ ብፍጹም ክይትቆረጽዎ!” ኢለዎም። ከምቲ ኣምላኽ ዝበሎ ድማ ጸጉሩ ኣይቆረጽዎን። ወዶም ድማ ኣዝዩ ሓያል ሰብ ኮነ። ስሙ ድማ ሳምሶን ይበሃል ነበረ። ሓደ እዋን ነቲ ዝመጾ አንበሳ ጥራይ ኢዱ በቲ አምላኽ ዝሃቦ ሓይሊ ቀተሎ።

ሳምሶን ብሓይሊ ኣምላኽ ነቲ ኣንበሳ ብጥራሕ ኢዱ ምስ ቀተሎ

መሳፍንቲ 16

ሳምሶን ምስ ሓንቲ ካብ ጸላእቲ እስራኤል ዝነበረት ደሊላ እትበሃል ሰበይቲ ፍቕሪ ጀመረ። ከመይ ኢሉ ክሳብ ክንድዚ ሓያል ከም ዝኾነ ምስጢሩ ሓተተቶ። ንሱ ግን ክነግራ ኣይደለየን ነበረ። ብዙሕ ግዜ ስለ ዝሓተተቶ፡ ሳምሶን ግን ኣብ መወዳእታ “ጸጉረይ እንተተቖሪጹ፡ ከም ዝኾነ ሰብኣይ ሓይሊ ኣልቦ ክኸውን እየ” ብምባል ነቲ ምስጢር ነገራ። ደሊላ ድማ ንጸላእቱ ምስጢር ሓይሊ ናይ ሳምሶን ነገረቶም። ንሶም ድማ ደቂሱ ከሎ መጺኦም ጸጉሩ ቆረጽዎ። በዚ ምኽንያት ሳምሶን ድኹም ስለዝኮነ ብቐሊሉ ወሲዶም ኣብ ቤት ማእሰርቲ ኣእተውዎ።

ድሕሪ ገለ ግዜ ጸጉሩ መሊሱ ክነውሕ ጀመረ፡ ሓይሉ ድማ ተመልሰ። ኣብዚ ግዜ እዚ ኣምላኽ ንህዝቢ እስራኤል ንምሕጋዝ ተጠቒሙሉ። ኣብ ሓደ ድግስ፡ ኣዕኑድ ናይ ብጸላእቲ ዝመልአ ዓቢ ገዛ ደፊኡ፡ ኣብ ልዕሊኦም እቲ ገዛ ከም ዝፈርስ ገበሮ። ሳምሶን ድማ ምስ ብዙሓት ጸላእቱ ሓቢሩ ሞተ።

ሳምሶን ንእስራኤል ክሕግዝ ካብ ኣምላኽ ሓይሊ ተቐበለ።

ጸላእቲ ንጸጉሪ ሳምሶን ክቆርጽዎ ከለው

ሩት 1

ናእሚ ትበሃል ሰበይቲ ምስ በዓል ቤታን ክልተ ኣወዳት ደቃን አብ ዓዶም ጥሜት ስለዝነበረ ናብ ካልእ ሃገር ገዓዘት። ኣብኡ እናነበረት ከላ፡ በዓል ቤታን ደቃን ሞይቶም። በዚ ምኽንያት ድማ እግዚኣብሄር ምስኣ ከም ዘይኰነ መሲልዋ ነበረ። ሓደ መዓልቲ ናእሚ ንኣንስቲ ደቃ “ድሕሪ ሕጂ ኣብዚ ኣይቅመጥን እየ። ናብ ዓደይ ክምለስ እየ። ንስክን ድማ ናብ ስድራክን ተመለሳ!” ኢላተን። ሓንቲ ካብኣተን ኣብ ሃገራ ክትጸንሕ ተሰማምዐት፡ ሩት ግን ምስኣ ክትከይድ ወሰነት። ንሳ ድማ ንናእሚ “ንበይንኺ ፈጺመ ኣይገድፈካን እየ። ምሳኺ ክኸይድ እየ። ህዝብኺ ህዝበይ ክኸውን እዩ፡ ኣምላኽኪ ድማ ኣምላኸይ ክኸውን እዩ” በለታ። ስለዚ ናእሚን ሩትን ብሓባር ናብ ምድሪ እስራኤል ከዱ። ኣብኡ ክነብሩ ጀመሩ።

ሩት ንናእሚ “ምሳኺ ክኸይድ እየ” ምስ በለታ

ሩት 2

ሩት ኣብ ሃገር እስራኤል ወለሓድ ንብረት ዘይነበራ ጋሻ እያ ነይራ። ብዘይካ ናእሚ እትፈልጦ ሰብ ኣይነበራን። ንሓማታ ኣዝያ ትድግፍን ምኽርታታ ትሰምዕን ነበረት። ሓደ መዓልቲ እኽሊ አብ ዝዕጸደሉ እዋን፡ ምሉእ መዓልቲ ኣብ ሓደ ግራት ተረፍ እኽሊ እናኣከበት ኣሕለፈት። ዋና እቲ ሕርሻ ቦኣዝ ዝበሃል ሕያዋይን ሃብታምን ሰብኣይ እዩ ነይሩ። ብዛዕባ ሕያውነት ሩት ድማ ሰሚዑ ነበረ። ስለዚ ኣብ ግራቱ ተረፍ እኽሊ ክትእክብ ፈቐደላ። ነቶም ሰራሕተኛታት እውን ሕያዎት ክኾኑላ ብዙሕ እኽሊ ክገድፉላን ነገሮም። በዚ ምኽንያት እዚ ሩት እኹል እኽሊ ክትእክብ ከኣለት።

ሩት ነቲ ካብ ግራት ዝተረፈ እኽሊ ምስ ኣከበት

ሩት 3

ድሕሪ ገለ ግዜ ናእሚ ንሩት ንቦኣዝ ሕያዋይ ሰብ ስለ ዝኾነ ክትምርዓዎ መኽረታ። ሩት ምስቲ ናእሚ ዝሃበታ ምኽሪ ተሰማምዐት። ስለዚ ድማ ጽቡቕ ክዳን ተኸዲና ናብቲ ቦኣዝ ዝነበረሮ ከደት። ንኡኡ ድማ ክትምርዖ ከም እትደሊ ነገረቶ።

ቦኣዝ ንሩት ብሕያውነት “ናብ ካልእ ሰብ ኣይከድክን። ንቤተሰብና እምንቲ ስለ ዝኾንኺ ድማ እግዚኣብሄር ይባርኽኪ! ብዛዕባ ጉዳይ መርዓ ግና ምስ ሓደ ዘመድና ክዘራረብ ኣለኒ። መልሱ ድሒረ ክነግረኪ እየ። ሕጂ ግን እኽሊ ወሲድካ ናብ ናእሚ ሓማትኪ ኪድ!” ኢለዋ። ሽዑ ብዙሕ እኽሊ ሃባ። ሩት ድማ ነቲ እኽሊ ሒዛ ናብ ቤታ ከደት እሞ ንናእሚ ሃበታ።

ሩት ንቦኣዝ ክትምርዖ ከም እትደሊ ክትነግሮ ክትከይድ ከላ

ሩት 4

ቦኣዝ ምስ ዘመዱን ምስ ሽማግለታትን ብዛዕባ እቲ ንሩት ኪምርዓዋ ዘለዎ ሓሳብ ተዘራረበ። ኩሎም ምስ ተሰማምዑ፡ ቦኣዝን ሩትን ተመርዓዉ።

ዮቤድ ዝበሃል ወዲ ድማ ወለዱ። ናእሚ ከም ወዳ ገይራ እያ ኣዕብያቶ። ናእሚን ስድራ ቤታን መሊሶም ጽቡቕ ክነብሩ ጀመሩ። እዞም ስድራ ብዙሕ ሽግራት እኳ እንተሓለፉ፡ እግዝያብሄር ግና ምስኦም ነብረ። አዝዩ ድማ ባረኾም።

ዮቤድ ጸኒሑ ኣቦሓጎ ንጉስ ዳዊት ኰነ።

ናይ ቦኣዝ ዘመድን ሽማግለታትን ኣብ ጉዳይ ሓዳር ቦኣዝ ምስ ወሰኑ

1ይ ሳሙኤል 1-2

ሃና ንብዙሕ ዓመታት ቆላዓ ክትወልድ አይትክእል እያ ነይራ። በዚ ምኽንያት ድማ ኣዝያ ሓዚና “ንእግዝኣብሄር፡ ወዲ እንተሂብካኒ፡ ኣገልጋሊኻ ክኸውን መሊሰ ክሕበካ እየ። ወድኻ እምበር ናተይ ኣይከውንን” ኢላ እናበኸየት ጸለየት። እቲ ክትጽሊ ዝረኣያ ካህን ድማ “እግዚኣብሄር ዝለመንክዮ ይሃብኪ!” ለዋ። ስለዚ ሃና ተጸናኒዓ ናብ ገዝኣ ተመልሰት።

ድሕሪ ሓደ ዓመት ኣምላኽ ንሃና ወዲ ሃባ። ንሳ ድማ ሳሙኤል ኢላ ሰመየቶ። ሳሙኤል ቁሩብ ምስ ዓበየ ናብ ቤት ኣምላኽ ወሲዳ ሃበቶ። ሃና ነዚ ብምግባራ ንኣምላኽ ዝኣተወቶ መብጽዓ ፈጸመት። ሳሙኤል ኣብኡ እዩ ዓብዩ። ኣብ ቤት ኣምላኽ ንዝነበረ ካህን ኤሊ ይሕግዞ ነበረ።

ሃና ተጨኒቓ ኣብ ቤት ኣምላኽ ክትጽልይ ከላ

1ይ ሳሙኤል 3-4

ሓደ ለይቲ ሳሙኤል ደቂሱ ከሎ “ሳሙኤል፡ ሳሙኤል!” ዝብል ድምጺ ሰምዐ። ኤሊ ዝጸዋኦ መሲልዎ፡ ናብኡ ብምኻድ “ጸዊእካኒ ዲኻ” ኢሉ ሓተቶ። ንሱ ግን “ኣነ ኣይጸዋዕኩኻን። ተመሊስካ ደአ ደቅስ!” በሎ። ሳሙኤል ነዚ ድምጺ ሰለስተ ግዜ ብተደጋጋሚ ሰሚዑ ናብ ኤሊ ከደ። ኣብ መወዳእታ ኤሊ ኣምላኽ ንሳሙኤል ከም ዝጸውዖ ተረድአ። ንሱ ድማ፡ “ድሕሪ እዚ ድምጺ ምስ ሰማዕካ፡ ‘ጐይታይ፡ ኣነ ኣገልጋሊኻ ይሰምእ አሎኹ እሞ በጃኻ ተዛረብ!’ በል” ኢልዎ።

ሳሙኤል ድማ ከምቲ ኤሊ ዝበሎ ገበረ። ሽዑ ኣምላኽ ንቤተሰብ ኤሊ ክንድዚ ዝኣክል ዓመታት ብዘይምእዛዞም ክቐጽዖም ምዃኑ ነገሮ።

ድሕሪ ዝተወሰነ ግዜ ንአምላኽ ዘየኽበሩ ካህን ኤሊን ደቁን ሞይቶም። ሳሙኤል ግን ንህዝቢ እስራኤል ጽቡቅ ዝሓስብ ሓቀኛን ነብዪ ኮነሎም።

ኣምላኽ ንሳሙኤል ምስ ጸውዖ፡ ንሱ ግና ናብ ኤሊ ክከይድ ከሎ

1ይ ሳሙኤል 7

እስራኤላውያን ንብዙሕ ዓመታት ብጸላእቶም ተጨነቁ። በዚ ምኽንያት ድማ ናብ እግዝያብሄር ኣእወዩ። ሳሙኤል ነቶም ህዝቢ ንኣምላኽ ክእዘዙ መኸሮም። ህዝቢ ድማ ክፉእ ተግባራቱ ገዲፉ ክእዘዝ ወሰነ። ተኣኪቦም ከለዉ ሳሙኤል ናብ ኣምላኽ ጸለየ። እስራኤል ከም ዝተኣከቡ ጸላእቶም ሰሚዖም፡ ኣንጻርኦም ክዋግኡ ብኽፍኣት ተንስኡ መጹ። ኣምላኽ ግን ንእስራኤላውያን ሓጊዙ ንጸላእቶም ብሓያል ነጎዳ ሰጐጎም።

ህዝቢ ነቲ ሕማቕ ተግባራቱ ገዲፉ ሳሙኤል ውን ክጽለየሎም ከሎ