WORK IN PROGRESS! NOT FINALIZED YET

ሉቃስ 1

ካህኑ ዘካርያስ እና ኤልሳቤጥ እግዚአብሔርን የሚያስደስት ሕይወት የሚኖሩ ባል እና ሚስት ነበሩ። እነርሱም እስከ እርጅናቸው ድረስ ልጅ አልነበራቸውም። አንድ ቀን መልአኩ ገብርኤል ለዘካርያስ በቤተ መቅደስ እያገለገለ ሳለ ተገለጠለት። ዘካርያስ ገብርኤልን ሲያይ በፍርሀት ተንቀጠቀጠ። መልአኩም “አይዞህ፥ አትፍራ! በቅርብ ጊዜ ላንተ እና ለብዙዎች ደስታ የሚሆን ልጅ ትወልዳለህ። ስሙንም ዮሐንስ በለው! እርሱም ሕዝቡን ለአዳኙ ለክርስቶስ መምጣት ልባቸውን ያዘጋጃል” አለው። ዘካርያስም እርሱ እና ሚስቱ ስላረጁ ይህ እንዴት ሊሆን እንደሚችል ጠየቀው። መልአኩም “የነገርኩህን ቃል ስላላመንክ ልጅህ እስኪወለድ ድረስ መናገር አትችልም” አለው። ዘካሪያስም ወዲያውኑ መነገር አቃተው። 

ከተወሰኑ ወራት በኋላ ኤልሳቤጥ ልጅን ወለደች። ዘካሪያስም መልአኩ እንደነገረው ስሙን ዮሐንስ አለው። የዚያን ጊዜ እንደገና መናገር ጀመረ።

እግዚአብሔር መልአኩን ልኮ ለዘካሪያስ ጸሎቱ እንደተሰማ እና ልጅ እንደሚሰጠው ሲነግረው 

ሉቃስ 1

ከተወሰኑ ወራት በኋላ እግዚአብሔር መልአኩ ገብርኤልን ማርያም ወደ ምትባል ሴት ላከው። እርሱም “ጌታ ከአንቺ ጋር ነውና፥ አትፍሪ! ልጅ ትወልጃለሽ። ስሙንም ኢየሱስ ብለሽ ጥሪው። እርሱም የእግዚአብሔርም ልጅ ይባላል። እግዚአብሔርም ለዳዊት እንደገባው ቃል ለዘለአለም ንጉሥ ይሆናል” አላት። ማርያም ገና ያላገባች ልጅ ስለነበረች መልአኩን “እሺ፥ ይህ ግን እንዴት ሊሆን ይቻላል?” ብላ ጠየቀችው። መልአኩም “ይህ የሚሆነው በእግዚአብሔር ኃይል ነው” አላት። ማርያምም በመልአኩ የመጣላትን ቃል በእምነት ተቀበለች።

ከጥቂት ቀኖች በኋላ ወደ ዘመድዋ ወደ ኤልሳቤጥ ሄደች። እዚያም ስትደርስ ስለተደረገላቸው ነገር አብረው እግዚአብሔርን አመሰገኑ።

እግዚአብሔር በመልአኩ በገብርኤል በኩል ማርያም ልጅ እንደምትወልድ ሲነግራት

ማቴዎስ 1 + ሉቃስ 2

ማርያም ስለምትወልደው ልጅ በሰማች ጊዜ ዮሴፍ የሚባል እጮኛ ነበራት። ከዮሰፍም ጋር ሳይጋቡ በእግዚአብሔር መንፈስ አረገዘች። መልአክም በሕልም ለዮሴፍ ተገልጦ ማርያም ያረገዘችው በመንፈስ ቅዱስ ኃይል መሆኑን አስረዳው። ስለዚህ ማርያምን የማግባት ሀሳቡን እንዳይተው ተናገረው። 

መንግስት የሕዝብ ቁጥር እየመዘገበ ስለነበር፥ ዮሴፍ እና ማርያም ሊመዘገቡ ወደ ቤተልሔም ከተማ ተጓዙ። በቤተልሔም ሳሉ ማርያም ኢየሱስን ወለደች። የሚያርፉበት ቤት ስላላገኙ፥ እንስሶች በሚበሉበት ቦታ በግርግም አስተኛችው። ኢየሱስ በተወለደበት ሌሊት በቅርብ በጎች ሲጠብቁ ለነበሩ እረኞች መልአክ ተገለጠላቸው። እርሱም “አትፍሩ፥ ዛሬ አዳኝ የሆነው ጌታ በቤተልሔም ተወልዶላችኋል” አላቸው። እነርሱም ወደ ቤተልሔም ሄደው ኢየሱስን ከማርያም እና ከዮሴፍ ጋር አገኙት። እርሱንም ስላዩ እጅግ ደስ እያላቸው እግዚአብሔርን አመሰገኑ።

ኢየሱስ ከተወለደ በኋላ፥ እረኞቹ በፍጥነት ቤተልሔም ደርሰው ሲያዩት

ማቴዎስ 2

ጠቢባን የሆኑ ሰዎች በምስራቅ ልዩ ኮከብ ሲወጣ አዩ። በዚህም አዲስ ንጉሥ በእስራኤል እንደተወለደ አስተዋሉ። የተወለደውን ንጉሥ ለማየት ካሉበት ሀገር ተነስተው ከብዙ ጉዞ በኋላ ኢየሩሳሌም ደረሱ። በዚያም “የተወለደውን ንጉሥ የት እናገኘዋለን? ኮከቡን በምስራቅ ሲወጣ አይተን ልንሰግድለት መጥተናል” ብለው ሰዎችን ጠየቁ። የመፀሐፍ ቅዱስ አስተማሪዎች፥ አዳኙ የሚወለደው በቤተልሔም እንደሆነ ነገሯቸው። ከብዙ መቶ ዓመታት በፊት የእግዚአብሔር ነቢያት ይህንን ተናግረው ነበር። ስለዚህ ጠቢባኑ ተነስተው ወደ ቤተልሔም ሄዱ። ኮከቡም እየመራቸው ሲሄዱ፥ ኢየሱስ ያለበት ቤት ሲደርሱ ቆመ። ወደ ቤቱም ሲገቡ ሕፃኑን ኢየሱስን ከእናቱ ከማርያም ጋር አገኙት እና ሰገዱለት። ይዘውለት የመጡትንም ውድ ስጦታዎች ሰጡት።

እግዚአብሔር የነገሥታትን ንጉሥ መምጣት በቃሉ፥ በነቢያት፥ በመላእክት እና በልዩ ኮከብ አስታውቆ ነበር።

ጠቢባኑ ሰዎች ኢየሱስን አክብረው ስጦታ ሲሰጡት

ሉቃስ 2

ስምዖን የሚባል የእግዚአብሔር ሰው፥ እግዚአብሔር አዳኙን ኢየሱስን ሳያይ እንደማይሞት ስለተናገረው፥ ለረጅም ጊዜ በእምነት ይጠባበቅ ነበር። አንድ ቀን ዮሴፍ እና ማርያም ከሕፃኑ ከኢየሱስ ጋር ወደ ቤተ መቅደስ ሄዱ። ስምዖንም መንፈስ ቅዱስ ስለመራው ወደ እነርሱ መጥቶ ሕፃኑን ኢየሱስን አቀፈው። ለብዙ ጊዜ የጠበቀውን አዳኝ ስላየ፥ በደስታ እግዚአብሔርን አመሰገነ። እርሱም “ኢየሱስ ለሰዎች ሁሉ ሕይወትን የሚሰጥ ብርሃን ነው” አለ። ቢሆንም ግን የማይቀበሉትም ሰዎች እንደሚኖሩ ተናገረ።

በዚያን ጊዜ አንዲት ሐና የምትባል ነቢይት ደግሞ በቤተ መቅደስ ነበረች። እርሷም ሕፃኑን ኢየሱስን ባየች ጊዜ፥ አዳኝ መሆኑን ለሰዎች እየተናገረች እግዚአብሔርን አመሰገነች።

ስምዖን እና ሐና ስለሕፃኑን በተናገሩት ቃል ማርያም እና ዮሴፍ ሲገረሙ

ሉቃስ 2፥41-52

በእስራኤል ሀገር በኢየሩሳሌም ከተማ ብቻ ወደሚገኘው ቤተ መቅደስ ሕዝቡ ለዋና በዓላት ይሄዱ ነበር። እንደልማዳቸው ማርያም እና ዮሴፍም የፋሲካን በዓል ለማክበር ሲሄዱ፥ ኢየሱስን በ12 አመቱ ይዘውት ወደ ቤተ መቅደስ ሄዱ። በዓሉ ካለቀ በኋላ፥ ወደ ቤታቸው ረጅሙን ጉዞ መጓዝ ጀመሩ። ኢየሱስ ግን በቤተ መቅደስ እንደቀረ በመጀመሪያ አላወቁም ነበር። ሊፈልጉትም እንደገና ወደ ኢየሩሳሌም ተመለሱ። ከሦስት ቀናትም በኋላ በቤተ መቅደስ ውስጥ አገኙት። በዚያም ከእስራኤል ሕግ አስተማሪዎች ጋር ስለ እግዚአብሔር ቃል ይወያይ ነበር። ሁሉም ስለ እግዚአብሔር ባለው እውቀት ተገረሙ። በመጨረሻም ዮሴፍ እና ማርያም ከኢየሱስ ጋር አብረው ወደ ቤታቸው ተመለሱ።

ኢየሱስ ገና ልጅ ሆኖ ሳለ ስለ እግዚአብሔር ቃል ሲጠይቅ እና ሲመልስ

ሉቃስ 3፥21-22

አጥማቂው ዮሐንስ እስራኤላውያንን እግዚአብሔርን ደስ የሚያሰኝ ሕይወት እንዲኖሩ አበረታታቸው። ከዚህ የተነሳ ክፉ ስራቸውን ትተው ወደ እግዚአብሔር የተመለሱትን ብዙ ሰዎች በዮርዳኖስ ወንዝ አጠመቃቸው። በተጨማሪም እግዚአብሔር ተስፋ የሰጣቸው አዳኝም ከትንሽ ጊዜ በኋላ እንደሚመጣ ለሕዝቡ ይናገር ነበር።

አንድ ቀን ኢየሱስም መጥቶ በዮሐንስ በዮርዳኖስ ወንዝ ተጠመቀ። እንደተጠመቀም የእግዚአብሔር መንፈስ እርግብ መስሎ በእርሱ ላይ ወረደ። ወዲያውም “አንተ የምወድህ ልጄ ነህ! ሁልጊዜ ባንተ ደስ ይለኛል” የሚል የእግዚአብሔር ድምፅ ከሰማይ ተሰማ።

ኢየሱስ ሲጠመቅ፥ የእግዚአብሔር መንፈስ እርግብ በመምሰል በእርሱ ላይ ሲወርድ

ሉቃስ 4፥1-11

ኢየሱስ ከተጠመቀ በኋላ ለአርባ ቀኖች ብቻውን በምድረ በዳ ቆየ። በዚህ ጊዜ ምንም ምግብ አልበላም። በእነዚህም ቀኖች* ሰይጣን ኢየሱስን የእርሱን መጥፎ ሐሳብ እንዲቀበል ለማድረግ ሞከረ። ኢየሱስ ግን የሰይጣንን የተንኮል ምክር በፍፁም አልተቀበለም። የነገረውን መጥፎ ሐሳቦች የእግዚአብሔርን ቃል ተጠቅሞ ተቃወመው። ሰይጣንም ሙከራው እንዳልተሳካለት ባየ ጊዜ ኢየሱስን ትቶ ሄደ። ከዚህ በኋላ ኢየሱስ ስለ እግዚአብሔር ማስተማር እና ሰዎችን ከተለያዩ በሽታዎች መፈወስ ጀመረ። ያን ጊዜ ዕድሜው ሠላሳ ዓመት ያህል ነበር።

ሰይጣን ኢየሱስን የእርሱን መጥፎ ሐሳብ እንዲቀበል ለማድረግ ሲሞክር

ሉቃስ 5፥1-11

አንድ ቀን ኢየሱስ ዓሳ አጥማጆች ባሉበት ሐይቅ አጠገብ አስተማረ። ትምህርቱን ከጨረሰ በኋላ ዓሳ አጥማጆቹን ዓሣዎችን በመረባቸው እንዲይዙ ነገራቸው። እነርሱም ሌሊቱን ሙሉ ሞክረው ምንም ዓሳ መያዝ እንዳልቻሉ መለሱለት። ኢየሱስ ግን ስለተናገራቸው እንደገና ለመያዝ ሞከሩ።

በዚህ ጊዜ እጅግ ብዙ ዓሳዎች ያዙ። ያገኙትም ዓሳዎች ብዛት ሁለት ጀልባዎች ሙሉ ነበር። በዚህም ኢየሱስ የእግዚአብሔር ኃይል እንዳለው አወቁ። የእርሱም ተከታዮች ለመሆን እና ከእርሱ ለመማር ወሰኑ።

ዓሣ አጥማጆቹ ኢየሱስ እንዳላቸው ዓሳዎችን ለመያዝ መረባቸውን ሲጥሉ

ሉቃስ 4፥38-41+ ማቴ 8፥14-17

አንድ ቀን ኢየሱስ የጴጥሮስን ቤተሰብ ጎበኘ። የጴጥሮስ አማት በከባድ ትኩሳት ታማ ተኝታ ነበር። እዚያ የነበሩ ሰዎች ኢየሱስን እንዲፈውሳት ለመኑት። ኢየሱስም ልመናቸውን ሰምቶ ትኩሳቱ እንዲለቃት አዘዘው። ወዲያውኑ ከበሽታዋ ስለተፈወሰች ተነስታ አስተናገደቻቸው። በዚያን ቀን ማታ ኢየሱስ ሌሎችም ብዙ በሽተኞችን ፈወሰ። እንዲሁም በሰይጣን መናፍስት የሚጨነቁትን ሰዎች ነፃ አወጣቸው። ክፉ መናፍስቱም ኢየሱስ የእግዚአብሔር ልጅ መሆኑን እየጮሁ በመናገር ከሰዎች ይወጡ ነበር።

ኢየሱስ የጴጥሮስን አማት ሲፈውስ

ሉቃስ 5፥12-16

ኢየሱስ በእስራኤል ሀገር ስለ እግዚአብሔር እያስተማረ እና የታመሙትን እየፈወሰ ዞረ። ብዙ ሰዎቹም ከኢየሱስ ጋር የነበረውን የእግዚአብሔር ኃይል ሲያዩ በጣም ተገረሙ። እርሱንም አንዳንዶች ሲቀበሉት፥ አንዳንዶች ደግም አልተቀበሉትም ነበር።

አንድ ቀንም በከባድ ቆዳ በሽታ የታመመ ሰው ኢየሱስን አየ። እርሱም “ከፈለግህ፥ ልትፈውሰኝ ትችላለህ” አለው። ኢየሱስም “አዎን፥ እንድትፈወስ እፈልጋለሁ” አለው። ወዲያውም ሰውየው ሙሉ በሙሉ ተፈወሰ። ይህንንም ብዙ ሰዎች ሲሰሙ እንዲፈውሳቸው ወደ ኢየሱስ ተሰበሰቡ። እርሱ ግን እንደልማዱ ከሰዎች ርቆ ለብቻው ይጸልይ ነበር።

ኢየሱስ የቆዳ በሽታ ያለበትን ሰው ሲፈወስ

ሉቃስ 5፥17-26

አንድ ቀን ሰዎች ሽባ የሆነ ጓደኛቸውን ይዘው ወደ ኢየሱስ መጡ። እርሱ የሚያስተምርበት ቤት ግን በሕዝብ የተሞላ ስለነበር መግባት አልቻሉም። ስለዚህ ከላይ የቤቱን ጣራ ከፍተው ጓደኛቸውን በኢየሱስ ፊት አወረዱት። እርሱም እምነታቸውን አይቶ ሽባውን “ኃጢአትህን ይቅር ብዬኃለሁ” አለው። ምክንያቱም ኢየሱስ የእግዚአብሔር ልጅ ስለሆነ፥ ኃጢአትን ይቅር የማለት ሥልጣን አለው። ይህንንም እንዲያውቁ ሽባውን ሰው ኃጢአቱን ይቅር ካለው በኋላ በኃይሉ ፈወሰው። በዚያም የነበሩ ሰዎች የሽባውን መፈወስ ሲያዩ፥ በኢየሱስ ሥልጣን እና ኃይል ተደነቁ።

ሰዎቹ ሽባ የሆነውን ጓደኛቸውን ጣራውን ከፍተው ሲያወርዱት

ሉቃስ 5፥27-32

የሮም መንግሥት ገንዘብ ሰብሳቢው ሌዊ ስግብግብ ሰው ነበር። ከሰዎች ከመጠን በላይ ገንዘብ ይወስድ ነበር። አንድ ቀን ኢየሱስ ሌዊ የግብር ገንዘብ ሲሰበስብ አይቶ “ተከተለኝ” አለው። ሌዊም ወዲያውኑ ከኢየሱስ ጋር ሄደ። በሌዊም ቤት አብረው ምግብ በሉ። በዚያ ሌሎች ብዙ ክፉ ሰዎች እና ኃጢአተኞች ነበሩ። የእግዚአብሔር ሕግ አስተማሪዎች ይህንን ባዩ ጊዜ “ኢየሱስ እና ተከታዮቹ ለምን ከኃጢአተኞች ጋር ይበላሉ?” ብለው ተቆጡ። ኢየሱስም “ኃጢአተኞችን ለማዳን መጥቻለሁ። ለዚህ ነው አብሬአቸው የምሆነው” አላቸው።

ኢየሱስ በምሕረት የተሞላ አዳኝ ነው።

ኢየሱስ ከኃጢአተኞች እና ከክፉ ሰዎች ጋር ሲበላ

ሉቃስ 6፥12-42

አንድ ጊዜ ኢየሱስ በተራራ ላይ ሆኖ ሌሊቱን ሙሉ ጸለየ። በማለዳም ከተከታዮቹ 12 ሐዋርያትን መረጠ። ከተራራው ከወረዱ በኋላ እዚያ ተሰብሰበው ለነበሩት ሰዎች ማን የተባረከ እንደሚሆን አስተማራቸው። እርሱም “የሚወድዱንን ሰዎች መወደድ ቀላል ነው። የተባረካችሁ እንድትሆኑ ግን የሚወዷችሁን ብቻ ሳይሆን፥ የሚጠሏችሁንም ሁሉ ውደዱ። ለሚጠሏችሁ መልካም ካደረጋቸሁ፥ የእግዚአብሔር ልጆች መሆናችሁ በዚህ ይታወቃልና። ለጠላቶቻቸሁ ጸልዩላቸው፥ ደግሞም ባርኳቸው። ለሰዎች የምታደርጉትን ሁሉ በመልካም ሐሳብ አድርጉ። በእናንተም ላይ እንዳይፈረድባችሁ፥ በሰዎች ላይ አትፍረዱ!” አላቸው።

ኢየሱስ መልካም ማድረግ እና ሰዎችን ሁሉ ስለ መውደድ ሲያስተምር

ማቴዎስ 6፥5-15

ኢየሱስ ስለ ጸሎት ለሕዝቡ እንዲህ ሲል አስተማረ፡-

ስትጸልዩ በሰዎች ለመታየት ፈልጋችሁ አትጸልዩ! ትዕቢተኛ ሰዎች ሁሉም ሊያያቸው በሚችል ቦታ ሆነው መጸለይ ይወዳሉ። ይህንን የሚያደርጉት ከሰዎች ክብር ማግኘት ስለሚፈልጉ ነው። እግዚአብሔር ግን እንደዚህ ዐይነት ጸሎትን አይወድም። ስለዚህ ስትጸልዩ ወደ ቤታቸሁ ገብታቸሁ በእግዚአብሔር ፊት በትሑት ልብ ጸልዩ! ከሰዎች ለጸሎታቸሁ ምንም ክበር አትጠብቁ! በተጨማሪም፥ በምትጸልዩበት ጊዜ ቃላትን ብዙ አትደጋግሙ! ምክንያቱም በሰማይ የሚኖር አባታችሁ ገና ሳትጠይቁት የሚያስፈልጋችሁን ሁሉ ያውቃል።

ብቻውን በእግዚአብሔር ፊት የሚጸልይ ሰው እና ከሰዎች ክብር ለማግኘት የሚጸልይ ሰው

ሉቃስ 6፥46-49

ኢየሱስ ስለ መንፈሳዊ የሕይወት መሰረት በምሳሌ ተናገረ። እርሱም

“ቤታቸውን በጠንካራ ዓለት ላይ የሚሰሩ ሰዎች ጠቢባን ናቸው። ምክንያቱም በዓለት ላይ ስለተሰራ፥ ምንም ዐይነት ችግር ቢመጣ አይወድቅምና። በአሸዋ ላይ ቤት የሚሰሩ ሰዎች ደግሞ ሰነፎች ናቸው። ምክንያቱም ጎርፍ እና ነፋስ ሲመጣ፥ የተሰራው ቤት ይፈርሳልና። ስለዚህ እኔ የማስተምረውን መንፈሳዊ ትምህርት ሰምቶ የሚታዘዝ ሰው ቤቱን በዓለት ላይ እንደሚሰራ ዐይነት ጠቢብ ሰው ነው። ይህ ሰው መከራ እና ችግር ቢያጋጥመው ቃሌ የሕይወቱ መሰረት ስለሆነ፥ በቀላሉ አይወድቅም። እኔ የምለውን ሰምቶ የማያደርግ ሰው ግን ቤቱን በአሸዋ ላይ እንደሚሰራ ዐይነት ሰነፍ ሰው ይመስላል። ይህ ሰው መከራ እና ችግር ቢያጋጥመው በቀላሉ ይወድቃል” ሲል አስተማረ።

ጎርፍ ሲመጣባቸው የፈረሰው በአሸዋ ላይ የተሰራው ቤት እና ያልፈረሰው በዓለት ላይ የተሰራው ቤት

ሉቃስ 7፥1-10

አንድ ጊዜ የአንድ ሮማዊ መሪ ሰራተኛ በጣም ታመመ። ሰዎችንም ወደ ኢየሱስ እንዲፈውሰው ለመለመን ላከ። መሪው እስራኤላዊ ባይሆንም፥ ለእነርሱ ብዙ መልካም ነገሮችን አድርጎ ነበር። ኢየሱስም ተነስቶ ወደ ቤቱ ሲቀርብ፥ መሪው ወዳጆቹን ልኮ “ወደ ቤቴ ልተገባ እና በአካል ልገናኝኽ አይገባኝም። እኔ ለሰራተኞቼ ትእዛዝ ስሰጣቸው፥ ያልኳቸውን ሁሉ ያደርጋሉ። ስለዚህ አንተም ቃል ብቻ ከተናገርክ፥ ሰራተኛዬ ይድናል” ብሎ ለመነው። ኢየሱስም በመሪው እምነት ተገረመ። ወደ በሽተኛውም ቤት ሳይገባ ቃል ብቻ በመናገር ፈወሰው።

ሰዎች ኢየሱስ የሮማዊውን ሰራተኛ እንዲፈውስለት ሲለምኑት

ሉቃስ 7፥11-17

ኢየሱስ ከተከታዮቹ ጋር ወደ አንድ ከተማ ሄደ። ወደ ከተማዋ በር ሲደርሱ፥ ሰዎች የሞተ ሰው ተሸክመው ወደ መቃብር ሲሄዱ አየ። እርሱም የአንዲት ባሏ የሞተባት ሴት ብቸኛ ልጅ ነበር። ኢየሱስም አዘነላት እና “አይዞሽ፥ አታልቅሺ!” አላት። ከዚያም ወደ ሬሳው ቀርቦ “አንተ ወጣት፥ ተነሳ!” አለው። ወዲያውኑ ከሞት ተነሳ። ተቀምጦም መናገር ጀመረ። በዚህ መንገድ ይህች እናት ብቸኛ ልጇን እንደገና አገኘች። ሕዝቡም ይህንን ባዩ ጊዜ እግዚአብሔርን አመሰገኑ።

ኢየሱስ ወጣት ከሞት ሲያስነሳ

ሉቃስ 8፥22-25

አንድ ጊዜ ኢየሱስ እና ተከታዮቹ በጀልባ ሐይቅን ሲሻገሩ ኃይለኛ ነፋስ ተነሳ። በነፋሱ ምክንያት ውሃ ወደ ጀልባዋ እየገባ ይሞላት ስለነበር፥ ተከታዮቹ በጣም ፈሩ። በዚያን ጊዜ ግን ኢየሱስ በጀልባው ውስጥ ተኝቶ ነበር። ስለዚህም ኢየሱስን ከእንቅልፍ ቀስቅሰው “ኢየሱስ! ተነሳ፥ እርዳን!” ብለው ጮኹ። እርሱም ተነስቶ ነፋሱን እና የሚናወጠውን ውሃ ጸጥ እንዲሉ አዘዛቸው። ወዲያውም ኃይለኛው ነፋስ እና የሚናወጠው ውሃም ጸጥ አሉ። ተከታዮቹም ተደነቀው “በነፋስ እና በውሃ ላይ እንደዚህ ዐይነት ሥልጣን ያለው እርሱ ማን ነው?” ተባባሉ።

ኢየሱስ ነፋሱን እና ውሃውን ጸጥ እንዲሉ ሲያዝ

ሉቃስ 8፥26-39

ኢየሱስ እና ተከታዮቹ ከሐይቁ ማዶ ሲደርሱ፥ አንድ ብዙ የሰይጣን መናፍስት ያለበት ሰው መጣ። ሰውየውም በሰይጣን መናፍስቱ እጅግ እየተሰቃየ በመቃብር ቦታ ይኖር ነበር። እርሱም የሚታሰርበትን ሰንሰለት ስለሚሰባብር፥ ማንም ሊይዘው አይችልም ነበር። ኢየሱስ ግን መናፍስቱን ከሰውየው ወጥተው እንዲሄዱ አዘዛቸው። ወዲያውም ወጥተው በቅርብ ወደ ነበሩት ዐሣማዎች ውስጥ ገቡ። ዐሣማዎቹም ወደ ሐይቁ ሮጠው ሰመጡ። ሰውየውም ከሰይጣን መናፍስቱ ነፃ ስለወጣ፥ ኢየሱስን በጣም አመሰገነ። እግዚአብሔርም ያደረገለትን በከተማው ሁሉ እየዞረ ተናገረ።

ኢየሱስ የሰይጣን መናፍስቱን ከሰውየው ወጥተው እንዲሄዱ ሲያዛቸው

ሉቃስ 8፥40-56

አንድ ቀን አንድ መሪ ብቸኛ ልጁ ታመመችበት። ወደ ኢየሱስም መጥቶ ልጁን እንዲፈውስለት ለመነው። ኢየሱስም አብሮት ወደ ቤቱ በመሄድ ላይ እያለ ሰዎች መጥተው ልጁ እንደሞተች ነገሩት። ኢየሱስ ግን ሰዎቹ ያሉትን ሰምቶ መሪውን “በእኔ ታመን እንጂ አትፍራ! ልጅህ ትድናለች” አለው። በመሪው ቤት ሲደርሱ፥ ኢየሱስ የሚያልቅሱትን ሰዎች ዝም እንዲሉ ነገራቸው። ከዚያም ከወላጆቿ እና ከሦስት ተከታዮቹ ጋር ወደ ቤት ውስጥ ገብቶ “አንቺ ልጅ፥ ተነሺ!” አላት። እርሷም ወዲያው ከሞት ተነሳች። ኢየሱስም ለወላጆቿ ምግብ እንዲሰጧት ነገራቸው።

ኢየሱስ የሞተችውን ልጅ ከሞት ሲያስነሳት

ሉቃስ 9፥1-6

አንድ ቀን ኢየሱስ ለሐዋሪያቱ ኃይል ሰጥቶ “በዚህ አካባቢ ባሉ ከተሞች ሄዳችሁ ስለ እግዚአብሔር መንግሥት ለሕዝቡ ተናገሩ። በሽተኞችን ፈውሱ፥ ደግሞም በሰይጣን መናፍስት የሚጨነቁትን ሰዎች ነጻ አውጡ!” ብሎ ላካቸው። በተጨማሪም በዚህ ጊዜ “ለጉዞአችሁ የሚሆን እንደ ቦርሳ፥ ዳቦ፥ ገንዘብ ያሉ ነገሮችን አትያዙ!” አላቸው። ይህንን ያላቸው እግዚአብሔር በሄዱበት ቦታ የሚያስፈለጋቸውን ሁሉ ስለሚሰጣቸው ነው።

ኢየሱስ ለሐዋሪያቱ ኃይል ሰጥቶ ወደ ከተሞች ሲልካቸው

ሉቃስ 9፥10-17 + ዮሐንስ 6፥1-14

የኢየሱስ ሐዋሪያት ወደ እርሱ ተመልሰው በከተሞች ያደረጉትን ተአምራት ሁሉ ነገሩት። ከዚያም ለብቻቸው ለመሆን ከሰዎች ራቅ አሉ። ብዙ ሕዝብ ግን ኢየሱስን ፈልገው ተከትለዋቸው ወዳሉበት ቦታ መጡ። ኢየሱስም ሕዝቡን ስለ እግዚአብሔር መንግሥት አስተማረ፥ በሽተኞችንም ፈወሰ። በመሸም ጊዜ ምግብ እጅግ ብዙ ለሆነው ሕዝብ ከየት እንደሚያገኙ ተወያዩ። ኢየሱስ ግን አንድ ልጅ ያመጣውን ሁለት ዓሣ እና አምስት እንጀራ አንስቶ እግዚአብሔርን አመሰገነ። ከዚያም ምግቡን ለሕዝቡ እንዲያከፋፍሉ ለተከታዮቹ ሰጣቸው። እግዚአብሔር ትንሹን ምግብ ስለባረከው፥ ከ5000 በላይ ለሆኑ ሰዎች የሚበቃ ሆነ። ሰዎችም በልተው ከጠገቡ በኋላ፥ 12 መሶብ ሙሉ እንጀራ ተረፈ።

ኢየሱስ ትንሹን ዓሳ እና እንጀራ እንዲበዛ ሲባርክ

ማቴዎስ 14፥22-33

ቀጥሎም ኢየሱስ ተከታዮቹ በጀልባ ሐይቁን እንዲሻገሩ ነገራቸው። እርሱ ግን ብቻውን ሊጸልይ ወደ አንድ ተራራ ወጥቶ እዚያው ለረጅም ሰዓት ቆየ። ተከታዮቹ በጀልባ ሲጓዙ፥ ከባድ ነፋስ ከፊታቸው ተነስቶ ያስጨንቃቸው ጀመር። ሌሊቱ ሊነጋ ትንሽ ሲቀረው፥ ኢየሱስ በውሃው ላይ እየተራመደ ወደ እነርሱ መጣ። እነርሱ ግን መንፈስ የሚያዩ ስለመሰላቸው፥ በፍርሀት ተንቀጥቅጠው ጮኹ። ኢየሱስም “እኔ ነኝ! አትፍሩ!” ብሎ አበረታቸው። ጴጥሮስም ኢየሱስን “በውሃው ላይ ወደ አንተ ልምጣ?” ብሎ ሲጠይቀው፥ “ና!” አለው። እርሱም ከጀልባዋ ወርዶ ትንሽ በውሃ ላይ ከተራመደ በኋላ፥ ነፋሱን እና ማዕበሉን ባየ ጊዜ ግን ፈራ። መስመጥም ስለጀመረ፥ ኢየሱስ እንዲያድነው ጮኸ። ወዲያውም ኢየሱስ እጁን ይዞ አወጣውና “ለምን በእኔ መታመን አቃተህ? ታመን እንጂ አትጠራጠር!” አለው። ከጴጥሮስም ጋር ወደ ጀልባዋ ገባ። ተከታዮቹም ይህንን ባዩ ጊዜ፥ ኢየሱስ የእግዚአብሔር ልጅ መሆኑን አውቀው ሰገዱለት።

ኢየሱስ በውሃው ላይ እየተራመደ ሲሄድ

ማቴዎስ 17፥1-8 + ሉቃስ 9፥28-36

አንድ ቀን ኢየሱስ ተከታዮቹ የሆኑትን ጴጥሮስ፥ ዮሐንስ እና ያዕቆብን ይዞ ወደ ተራራ ወጣ። ኢየሱስ በዚያ መጸለይ ሲጀምር፥ ፊቱ እና የለበሰውም ልብስ የሚያበራ ሆነ። ከብዙ ዘመናት በፊት የኖሩት ሙሴ እና ኤልያስ በተአምር ከኢየሱስ አጠገብ ታዩ። እግዚአብሔር በኢየሱስ እንዲሰራ ስላሰበው እቅድ አብረው ተነጋገሩ። ይህም እቅድ ኢየሱስ ስለ ሰው መዳን መከራ መቀበል፥ መሞት እና መነሳት እንዳለበት ነበር።

ከዚያም ደመና መጥቶ ሁሉንም ሸፈናቸው። ከደመና ውስጥ፡- “ኢየሱስ ልጄ ነው፥ እወደዋለው። እርሱን ስሙት!” የሚል የእግዚአብሔርን ድምፅ መጣ። ደመናው በጠፋ ጊዜ ከኢየሱስ እና ተከታዮቹ በስተቀር ማንም አልነበርም።

ሙሴ እና ኤልያስ በተራራ ላይ ከኢየሱስ ጋር ሲነጋገሩ

ሉቃስ 10፥29-37

አንድ ጊዜ ኢየሱስ ሰዎችን በትክክል የሚወድ ሰው ማን እንደሆነ እንዲህ ሲል በታሪክ አስተማረ፡-

አንድ ኢስራኤላዊ ከኢየሩሳሌም ወደ ኢያሪኮ ከተማ ተጓዘ። በመንገድ ላይ ዘራፊዎች መጡበት። በኃይል ደብድበው እና የነበረውን ዘርፈው ጥለውት ሄዱ። ከዚህም በኋላ አንድ ካህን በዚያ ሲያልፍ የተደበደበውን ሰው አየው። ሆኖም ግን ከሞት እንዲተርፍ ምንም ሳይረዳው ትቶት ሄደ። ቀጥሎም ሌላ የእግዚአብሔር አገልጋይ አየው። እርሱም ሳያዝንለት አልፎት ሄደ። ሁለቱ ሰዎች እስራኤላውያን ቢሆኑም ምንም አልረዱትም።

በመጨረሻ የሰማርያ ሀገር ሰው በዚያ መንገድ መጣ። ሰማርያውያን በእስራኤላውያን የተናቁ ነበሩ። ሆኖም ግን ይህ ሳምራዊ በዘራፊዎች የተደበደውን ሰው ሲያይ እጅግ አዘነለት። ወዲያውኑ የህክምና እርዳታ አደረገለት። በራሱም አህያ ላይ አስቀምጦ ሰው ሊረዳው እና ሊንከባከበው ወደሚችል ቦታ ወሰደው። በተጨማሪም ለሚያስፈልገው የምግብ እና የመድሃኒትም ዋጋ ከፍሎለት ሄደ።

የሰማርያ ሰው ለተደበደው ሰው በማዘን ከሞት እንዲተርፍ ሲረዳው