ትግርኛ 78 – 103

ሉቃስ 1

ካህን ዘካርያስን ኤልሳቤጥን ንእግዚኣብሄር ባህ ዘብል ህይወት ዝነብሩ ሰብኣይን ሰበይትን እዮም ነይሮም። ክሳዕ ዚኣርጉ ድማ ውሉድ ኣይነበሮምን። ሓደ መዓልቲ መለአኽ ገብርኤል ዘካርያስ ኣብ ቤተ መቕደስ እናኣገልገለ ከሎ ተራእዮ። ዘካርያስ ንገብርኤል ምስ ረኣዮ ብፍርሒ ተንቀጥቀጠ። እቲ መልኣኽ ድማ “ኣጆኻ፡ ኣይትፍራሕ! ኣብ ቀረባ እዋን ንዓኻን ንብዙሓትን ሓጎስ ዝኸውን ቆልዓ ክትወልድ ኢኻ። ንስሙ ከአ ዮሃንስ ኢልካ ስመዮ! ንሱ ድማ ንልቢ ህዝቢ ንምጽኣት ክርስቶስ መድሓኒ ከዳሉ እዩ” በሎ። ዘካርያስ ንሱን ሰበይቱን ኣሪጎም ስለ ዝነበሩ፡ እዚ ብኸመይ ክኸውን ከም ዝኽእል ሓተተ። እቲ መልኣኽ ድማ “ነቲ ዝበልኩኻ ዘረባ ስለ ዘይኣመንካ፡ ወድኻ ክሳዕ ዝውለድ ክትዛረብ ኣይትኽእልን ኢኻ” በሎ። ዘካርያስ ብኡንብኡ ድማ ምዝራብ ተሰኣኖ።

ድሕሪ ዝተወሰነ ኣዋርሕ ኤልሳቤጥ ወዲ ወለደት። ዘካርያስ ድማ ከምቲ እቲ መልኣኽ ዝነገሮ ዮሃንስ ኢሉ ሰመዮ። ሽዑ ውን ከም ብሓድሽ ክዛረብ ጀመረ።

እግዚኣብሄር መልኣኹ ልኢኹ ንዘካርያስ ጸሎቱ ከም ዝተሰምዐ ወዲ ከም ዝህቦ ምስ ነገሮ

ሉቃስ 1

ድሕሪ ገለ ኣዋርሕ እግዚኣብሄር ንመለአኹ ገብርኤል ናብ ማርያም እትበሃል ሰበይቲ ሰደዶ። ንሱ ድማ፡ “ጎይታ ምሳኪ እዩ እሞ፡ ኣይትፍርሂ! ቆልዓ ክትወልዲ ኢኺ። ስሙ የሱስ ኢልኪ ጸውዕዮ። ወዲ ኣምላኽ ድማ ክበሃል ኢዩ። ከምቲ እግዚኣብሄር ንዳዊት ቃል ዝኣተዎ ንዘልኣለም ንጉስ ክኸውን እዩ” በላ። ማርያም ዘይተመርዓወት ጓል ስለ ዝነበረት ነቲ መልኣኽ “ሕራይ፡ እዚ ግን ከመይ ክከውን ይከኣል” ኢላ ሓተተቶ። እቲ መልኣኽ ድማ “እዚ ብሓይሊ ኣምላኽ ኢዩ ዝኸውን” በላ። ማርያም ድማ ነቲ ብመልአኽ ዝመጸ ቃል ብእምነት ተቐበለቶ።

ድሕሪ ቁሩብ መዓልታት ናብ ዘመዳ ኤልሳቤጥ ከደት። ኣብኡ ምስ በጽሐት፡ ስለ እቲ ዝተገብረሎም ነገር ብሓባር ንኣምላኽ ኣመስገኑ።

እግዚኣብሄር ብመልኣኹ ገብርኤል ገይሩ ማርያም ቆልዓ ከምትወልድ ክነግራ ከሎ

ማቴዎስ 1 + ሉቃስ 2

ማርያም ብዛዕባ እቲ ክትወልዶ ዝነበራ ቆልዓ ምስ ሰምዐት፡ ዮሴፍ ዝበሃል ሕጹይ ነበራ። ምስ ዮሴፍ ቅድሚ ምምርዓዎም ድማ ብእግዚኣብሄር መንፈስ ጠነሰት። ሓደ መልኣኽ ንዮሴፍ ብሕልሚ ተራእዩ ማርያም ብሓይሊ መንፈስ ቅዱስ ከም ዝጠነሰት ገለጸሉ። ስለዚ ነቲ ንማርያም ክምርዖ ዝነበሮ ሓሳብ ከይገድፎ ነገሮ።

መንግስቲ ንቁጽሪ ህዝቢ ይምዝግብ ስለ ዝነበረ፡ ዮሴፍን ማርያምን ክምዝገቡ ናብ ከተማ ቤተልሔም ተጓዒዞም። ኣብ ቤተልሔም ከለዉ ማርያም ንየሱስ ወለደቶ። ዝሓድሩሉ ቦታ ስለ ዘይረኸቡ፡ እንስሳታት ኣብ ዝበልዓሉ መብልዕ ማል ኣደቀሰቶ። ኣብታ የሱስ እተወልደላ ለይቲ፡ ነቶም ኣብ ጥቓኦም ኣባጊዖም ዚጓስዩ ዝነበሩ ጓሶት ሓደ መልኣኽ ተራእዮም። ንሱ ድማ “ኣይትፍርሑ፡ ሎሚ መድሓኒ ዝኮነ ጎይታ ኣብ ቤተልሄም ተወሊዱልኩም ኣሎ” በሎም። ናብ ቤተልሄም ከይዶም ንየሱስ ምስ ማርያምን ዮሴፍን ረኸብዎ። ምስ ረኣይዎ ብጣዕሚ ተሓጒሶም ንኣምላኽ ኣመስገኑ።

ድሕሪ ምውላድ የሱስ፡ እቶም ጓሶት ናብ ቤተልሄም ቀልጢፎም በጺሖም ክርእዩ ከለው

ማቴዎስ 2

ሰብ ጥበብ ሓደ ፍሉይ ኮኾብ ካብ ምብራቅ ክለዓል ርእዮም። በዚ ድማ ኣብ እስራኤል ሓድሽ ንጉስ ከም ዝተወልደ ተረድኡ። ነቲ ዝተወልደ ንጉስ ክርእዩ ካብ ሃገሮም ወጺኦም ድሕሪ ነዊሕ ጉዕዞ ናብ ኢየሩሳሌም በጽሑ። ኣብኡ ድማ ነቶም ህዝቢ “እቲ ዝተወልደ ንጉስ ኣበይ ክንረኽቦ ኢና? እቲ ኮኾብ ብሸነኽ ምብራቕ ክለዓል ርኢና ክንሰግዶ መጺእና” ኢሎም ሓተትዎም። መምህራን መጽሓፍ ቅዱስ መድሃኒ ኣብ ቤተልሔም ከም ዝውለድ ነጊሮምዎም። ነብያት እግዚኣብሄር ቅድሜ ብዙሕ ዓመታት ነዚ ተዛሪቦም ነይሮም። ስለዚ እቶም ሰብ ጥበብ ተንሲኦም ናብ ቤተልሔም ከዱ። እቲ ኮኾብ ክመርሖም ከሎ ድማ ኣብታ የሱስ ዝነበረላ ቤት ምስ በጽሑ ደው በለ። ናብቲ ገዛ ምስ ኣተዉ፡ ነቲ ህጻን የሱስ ምስ ኣዲኡ ማርያም ረኸብዎ እሞ ሰገዱሉ። ነቲ ዘምጽእዎ ክቡር ህያባት ድማ ሃብዎ።

እግዚኣብሄር፡ ምምጻእ ንጉስ ነገስታት ብቃሉ፡ ብነብያት፡ ብመላእኽትን ብፍሉይ ኮኾብን ኣቢሉ ኣበሲሩ ነይሩ።

እቶም ሰብ ጥበብ ንየሱስ ኣኽቢሮም ህያባት ክሕብዎ ከለው

ሉቃስ 2

ስምኦን ዝተባህለ ናይ እግዚኣብሄር ሰብ፡ ኣምላኽ ንመድሓኒኡ የሱስ ከይረኣየ ከም ዘይመውት ስለ ዝነገሮ፡ ንነዊህ እዋን ብእምነት ይጽበ ነበረ። ሓደ መዓልቲ ዮሴፍን ማርያምን ምስ ህጻን የሱስ ናብ ቤተ መቕደስ ከዱ። ስምኦን ድማ ብመንፈስ ቅዱስ ተመሪሑ ናባታቶም መጺኡ ነቲ ህጻን የሱስ ሓቚፉዎ። ነቲ ንነዊሕ እዋን ዝተጸበዮ መድሓኒ ምስ ረኣየ፡ ንኣምላኽ ብሓጎስ ኣመስገኖ። ንሱ ድማ “የሱስ ንኹሉ ሰብ ህይወት ዝህብ ብርሃን እዩ” በለ። ይኹን እምበር ዘይቅበልዎ ሰባት ክህልዉ እዮም ኢሉ ተዛረቦም።

ኣብቲ ግዜ እቲ ኣብ ቤተ መቕደስ ሃና እትበሃል ነብዪት ነበረት። ነቲ ህጻን የሱስ ምስ ረኣየቶ ድማ ንኣምላኽ ኣመስገነቶ፡ ንሱ መድሓኒ ምዃኑ ነቶም ህዝቢ ነገረቶም።

ማርያምን ዮሴፍን በቲ ስምኦንን ሃናን ብዛዕባ እቲ ህጻን ዝበልዎ ቃል ክግረሙ ከለው

ሉቃስ 2፡41-52

ኣብ ሃገረ እስራኤል እቶም ህዝቢ ንቐንዲ በዓላት ናብቲ ኣብ ከተማ ኢየሩሳሌም ጥራይ ዝነበረት ቤተ መቕደስ ይኸዱ ነበሩ። ከም ልማዶም ማርያምን ዮሴፍን ፋስጋ ከብዕሉ ምስ ከዱ፡ ንየሱስ ወዲ 12 ዓመት ከሎ ናብ ቤተ መቕደስ ወሰድዎ። እቲ በዓል ምስ ተዛዘመ ድማ ነዊሕ ጉዕዞ ናብ ገዝኦም ክጓዓዙ ጀመሩ። ኣብ መጀመርታ ግና የሱስ ኣብ ቤተ መቕደስ ከም ዝተረፈ ኣይፈለጡን ነበሩ። ክደልይዎ ድማ ናብ ኢየሩሳሌም ተመልሱ። ድሕሪ ሰለስተ መዓልቲ ድማ ኣብ ቤተ መቕደስ ረኸብዎ። ኣብኡ ድማ ምስ መምህራን ሕጊ እስራኤል ብዛዕባ ቃል ኣምላኽ ይዘራረብ ነበረ። ኩሎም በቲ ብዛዕባ ኣምላኽ ዝነበሮ ፍልጠት ተገረሙ። ኣብ መወዳእታ ዮሴፍን ማርያምን ምስ የሱስ ናብ ቤቶም ተመልሱ።

የሱስ ገና ቆልዓ ከሎ ብዛዕባ ቃል ኣምላኽ ክሓትትን ክምልስን ከሎ

ሉቃስ 3፡21-22

ዮሃንስ መጥምቕ ንእስራኤላውያን ንኣምላኽ ባህ ዘብል ህይወት ክነብሩ ኣተባቢዕዎም እዩ። በዚ ምኽንያት ድማ ክፉእ ተግባራቶም ዝሓደጉ ናብ እግዚኣብሔር ዝተመልሱን ብዙሓት ሰባት ኣብ ሩባ ዮርዳኖስ ኣጥመቐ። እቲ እግዚኣብሄር ቃል ዝኣተወሎም መድሓኒ ድሕሪ ቁሩብ ግዜ ከም ዝመጽእ እውን ነቶም ሰባት ይነግሮም ነበረ።

ሓደ መዓልቲ የሱስ መጺኡ ብዮሃንስ ኣብ ሩባ ዮርዳኖስ ተጠመቐ። ብኡንብኡ ምስ ተጠመቐ መንፈስ ኣምላኽ ብመልክዕ ርግቢ ኣብ ልዕሊኡ ወረደ። ኡንብኡ ድማ “ንስኻ ፍትው ወደይ ኢኻ! ኩሉ ግዜ ብኣኻ ክሕጎስ እየ” ዝብል ድምጺ ኣምላኽ ካብ ሰማይ ተሰምዐ።

የሱስ ምስ ተጠመቐ መንፈስ እግዚኣብሔር ብመልክዕ ርግቢ ኣብ ልዕሊኡ ክወርድ ከሎ

ሉቃስ 4፡1-11

የሱስ ምስ ተጠመቐ ኣብ በረኻ ንኣርብዓ መዓልቲ በይኑ ጸንሐ። ኣብዘን መዓልታት እዚኣተን ዝኾነ መግቢ ኣይበለዐን። ኣብዚ እዋን እዚ፡ ሰይጣን ነቲ ሕማቕ ሓሳቡ የሱስ ኺቕበሎ ፈቲኑ እዩ። የሱስ ግን ነቲ ሰይጣን ዝሃቦ ናይ ተንኮል ምኽሪ ፈጺሙ ኣይተቐበሎን። ነቲ ሕማቕን ክፉእን ሓሳባት ንምቅዋም ቃል እግዚኣብሄር ተጠቒሙ። ሰይጣን እቲ ዝገበሮ ፈተነ ከም ዘይተዓወተ ምስ ረኣየ፡ ንየሱስ ገዲፍዎ ከደ። ብድሕሪ እዚ የሱስ ብዛዕባ ኣምላኽ ክምህርን ንሰባት ካብ ዝተፈላለየ ሕማማት ክፍውስን ጀመረ። ሽዑ ወዲ ሰላሳ ዓመት ኣቢሉ ነበረ።

ሰይጣን ነቲ ሕማቕ ሓሳቡ የሱስ ምእንቲ ክቕበሎ ምስ ፈተነ

ሉቃስ 5፡1-11

ሓደ መዓልቲ የሱስ ኣብ ጥቓ እቲ ገፈፍቲ ዓሳ ዝነበሩሉ ቀላይ መሃረ። ድሕሪ ትምህርቲ ነቶም ገፈፍቲ ዓሳ ኣብ መርበቦም ዓሳ ክሕዙ ነገሮም። ምሉእ ለይቲ ከም ዝፈተኑን ዓሳ ክሕዙ ከም ዘይከኣሉን ነገሩዎ። የሱስ ስለ ዝተዛረቦም ግና መሊሶም ክገፉ ፈተኑ።

ኣብዚ ግዜ እዚ ብዙሕ ዓሳታት ሒዞም። ብዝሒ ዓሳ ነተን ዝሓዝወን ክልተ ጀላቡ መሊኡ ነበረ። በዚ ድማ የሱስ ሓይሊ እግዚኣብሄር ከም ዘለዎ ፈለጡ። ስለዚ ሰዓብቱ ክኾኑን ካብኡ ክመሃሩን ወሰኑ።

እቶም ገፈፍቲ ዓሳ ከምቲ የሱስ ዝበሎም ዓሳ ንምሓዝ መርበቦም ክድርብዩ ከለዉ

ሉቃስ 4፡38-41 + ማቴዎስ 8፡14-17

ሓደ መዓልቲ የሱስ ንስድራ ጴጥሮስ በጽሖም። ሓማት ጴጥሮስ ብብርቱዕ ዓሶ ሓሚማ ደቂሳ ነይራ። ኣብኡ ዝነበሩ ሰባት ንየሱስ ኬሕውያ ለመንዎ። የሱስ ልመናኦም ሰሚዑ ነቲ ዓሶ ክገድፋ ኣዘዞ። ብኡ ንብኡ ካብ ሕማማ ሓወየት፡ ተንሲኣ አገልገለቶም። በታ ለይቲ እቲኣ፡ የሱስ ንብዙሓት ካልኦት ሕሙማት ኣሕወየ። እቶም ብሰይጣን ብኣጋንንትን እተጨነቁ ሰባት ሓራ ኣውጽኦም። እቶም ክፉኣት መናፍስቲ ድማ የሱስ ወዲ እግዚኣብሄር እዩ እናበሉ ካብ ሰባት እናጨደሩ ይወጹ ነበሩ።

የሱስ ንሓማት ጴጥሮስ ምስ ኣሕወያ

ሉቃስ 5፡12-16

የሱስ ብዛዕባ እግዚኣብሄር እናመሃረን ንሕሙማት እናፈወሰን ኣብ ምድሪ እስራኤል ይዘውር ነበረ። ብዙሓት ካብቶም ሰባት ነቲ ምስ የሱስ ዝነበረ ሓይሊ ኣምላኽ ምስ ረኣዩ ኣዝዮም ተገረሙ። ገሊኦም ኪቕበልዎ ኸለዉ፡ ገሊኦም ግና ኣይተቐበልዎን።

ሓደ መዓልቲ ሓደ ከቢድ ሕማም ቆርበት ዝነበሮ ሰብኣይ ንየሱስ ረኣዮ። ንሱ ድማ “እንተደሊኻ ክትፍውሰኒ ትኽእል ኢኻ” በለ። የሱስ “እወ ክትፍውስ እደሊ ኣለኹ” በለ። ብኡንብኡ እቲ ሰብኣይ ምሉእ ብምሉእ ሓወየ። ብዙሓት ሰባት ነዚ ምስ ሰምዑ ክፍውሶም ናብ የሱስ ተኣከቡ። ንሱ ግን ከም ልማዱ ካብ ሰባት ርሒቑ በይኑ ይጽሊ ነበረ።

የሱስ ንሓደ ሕማም ቆርበት ዝነበሮ ሰብኣይ ምስ ኣሕወየ

ሉቃስ 5፡17-26

ሓደ መዓልቲ ሰባት ልሙስ ዝነበረ ዓርኮም ሒዞም ናብ የሱስ መጹ። እቲ ዝምህረሉ ዝነበረ ቤት ግና ብሰባት መሊኡ ስለ ዝነበረ ክኣትዉ ኣይከኣሉን። ስለዚ ናሕሲ እቲ ቤት ከፊቶም ንዓርኮም ኣብ ቅድሚ የሱስ ኣውረድዎ። እምነቶም ርእዩ ነቲ ልሙስ “ሓጢኣትካ ይቕረ ኢለልካ” በሎ። የሱስ ወዲ እግዚኣብሄር ስለ ዝኾነ፡ ንሓጢኣት ምሕረት ናይ ምግባር ስልጣን ኣለዎ። ነዚ ምእንቲ ኺፈልጡ፡ ሓጢኣቱ ይቕረ ምስ በለሉ፡ ነቲ ልሙስ ብሓይሉ ኣሕወዮ። እቶም ኣብኡ ዝነበሩ ሰባት ድማ ምሕዋይ ናይቲ ልሙስ ምስ ረኣዩ፡ ብስልጣንን ሓይልን የሱስ ተገረሙ።

እቶም ሰባት ናሕሲ ከፊቶም ነቲ ልሙስ ዝነበረ ዓርኮም ምስ ኣውረድዎ

ሉቃስ 5፡27-32

ናይ መንግስቲ ሮሜ ኣኻቢ ግብሪ ዝነበረ ሌዊ፡ ስሱዕ ሰብ እዩ ነይሩ። ካብ ሰባት ልዕሊ ዓቀን ገንዘብ ይወስድ ነይሩ። ሓደ መዓልቲ፡ የሱስ ሌዊ ገንዘብ ግብሪ ክእክብ ርእዩ፡ “ስዓበኒ” በሎ። ሌዊ ብኡብኡ ምስ የሱስ ከደ። ኣብ እንዳ ሌዊ ብሓባር በሊዖም። ኣብኡ ካልኦት ብዙሓት እኩያት ሰባትን ሓጥኣን ነበሩ። መምህራን ሕጊ ኣምላኽ ነዚ ምስ ረኣዩ “ስለምንታይ የሱስን ሰዓብቱን ምስ ሓጥኣን ይበልዑ?” ኢሎም ተቖጢዖም። የሱስ “ኣነ ንሓጥኣን ከድሕን እየ መጺአ። ስለዚ ድማ እየ ምስኦም ዘለኹ” በሎም።

የሱስ በዓል ብዙሕ ምሕረትን መድሓንን እዩ።

የሱስ ምስ ሓጥኣንን እኩያት ሰባትን ክበልዕ ከሎ

ሉቃስ 6፡12-42

ሓደ እዋን የሱስ ኣብ ከረን ኮይኑ ምሉእ ለይቲ ጸለየ። ንግሆ ካብ ሰዓብቱ 12 ሃዋርያት መሪጹ። ካብቲ ከረን ምስ ወረዱ ድማ ነቶም ኣብኡ ተኣኪቦም ዝነበሩ ሰባት መን ዝተባረከ ከም ዝከውን መሃሮም።

ንሱ ድማ “ነቶም ዘፍቅሩና ምፍቃር ቀሊል እዩ። ግናኸ ምእንቲ ክትባረኹ፡ ነቶም ዘፍቅሩኹም ጥራይ ዘይኰነስ፡ ነቶም ዝጸልኡኹም ኩሎም እውን ኣፍቅሩ። ነቶም ዝጸልኡኹም ሰናይ እንተ ገበርኩምሎም፡ በዚ ውሉድ እግዚኣብሄር ምዃንኩም ክትፍለጡ ኢኹም። ንጸላእትኹም ጸልዩ፡ ባርኽዎም ድማ። ንሰባት እትገብርዎ ኩሉ ነገር ብንጹህ ልቢ ግበርዎ። ምእንቲ ከይትፍረዱ ድማ፡ ንሰባት ኣይትፍረዱ!” ኢልዎም።

የሱስ ብዛዕባ ሰናይ ምግባርን ንዅሎም ሰባት ምፍቃርን ክምህር ከሎ

ማቴዎስ 6፡5-15

የሱስ ነቶም ህዝቢ ብዛዕባ ጸሎት ከምዚ ኢሉ ምሂርዎም፤

ክትጽልዩ ከለኹም ብሰባት ክትረኣዩ ኣይትጸልዩ! ትዕቢተኛታት ሰባት ኩሉ ሰብ ኣብ ዝርእዮም ቦታ ምጽላይ ይፈትዉ። እዚ ዝገብሩ ድማ ካብ ሰባት ክብሪ ክረኽቡ ስለ ዝደልዩ እዮም። እግዚኣብሄር ግን ከምዚ ዓይነት ጸሎት ኣይፈትዎን እዩ። ስለዚ ክትጽልዩ ከለኹም ናብ ቤትኩም አቲኩም ኣብ ቅድሚ ኣምላኽ ብትሕትና ልቢ ጸልዩ! ንጸሎትኩም ካብ ሰባት ዝኾነ ክብሪ ኣይትጸበዩ! ከምኡ ውን፡ ክትጽልዩ ከለኸለኩም ቃላት ብዙሕ ኣይትደጋግሙ! ምኽንያቱ አብ ሰማይ ዝነብር ኣቦኹም ቅድሚ ምሕታትኩም እኳ ኩሉ ዘድልየኩም ይፈልጥ እዩ።

ኣብ ቅድሚ እግዚኣብሄር በይኑ ዝጽሊ ሰብን ካብ ሰባት ክብሪ ክረክብ ዝጽሊ ሰብን

ሉቃስ 6፡46-49

የሱስ ብዛዕባ መንፈሳዊ ናይ ህይወት መሰረት ብምስላ ተዛሪቡ እዩ።

ንሱ ድማ “እቶም ቤቶም ኣብ ጽኑዕ ከውሒ ዝሃንጹ ሰባት ለባማት እዮም። ምኽንያቱ ኣብ ከውሒ ስለ ዝተሃንጸ፡ ዝኾነ ዓይነት ሽግር እንተመጸ ኣይወድቕን እዩ። እቶም ኣብ ሑጻ ቤቶም ዝሃንጹ ድማ ዓያሹ እዮም። ምኽንያቱ ውሒዝን ንፋስን ምስ መጸ፡ እቲ ዝተሰርሐ ቤት ይፈርስ። ስለዚ አነ ዝምህሮ መንፈሳዊ ትምህርቲ ሰሚዑ ዝእዘዝ ሰብ ቤቱ አብ ከውሒ ከም ዝሰርሐ ለባም ሰብ ኢዩ። እዚ ሰብ እዚ ሽግርን መከራን እንተ ኣጋጠሞ፡ ቃለይ መሰረት ህይወቱ ስለ ዝኾነ፡ ብቐሊሉ ኣይወድቕን እዩ። ኣነ ዝብሎ ሰሚዑ ዘይገብር ሰብ ግን፡ ቤቱ ኣብ ሑጻ ከም ዝሃንጽ ዓሻ ሰብ እዩ ዝመስል። እዚ ሰብ እዚ ሽግርን መከራን እንተ ኣጋጢምዎ ብቐሊሉ ክወድቕ ኢዩ ኢሉ” ምሂሩ።

ውሒዝ ምስ መጸ ዝዓነወ አብ ሑጻ ዝተሃንጸ ገዛን ኣብ ልዕሊ ከውሒ ዝተሃንጸ ዘይፈረሰ ገዛን

ሉቃስ 7፡1-10

ሓደ እዋን ሓደ ሰራሕተኛ ናይ ሓደ ሮማዊ ሓለቓ ኣዝዩ ሓመመ። የሱስ ንኽፍውሶ ክልምንዎ ሰባት ናብ የሱስ ለኣኸ። እቲ ሓለቓ እስራኤላዊ እኳ እንተ ዘይነበረ፡ ብዙሕ ጽቡቕ ነገራት ገይሩሎም እዩ። የሱስ ተንሲኡ ናብቲ ቤት ምስ ቀረበ፡ እቲ ሓለቓ ንኣዕሩኽቱ ልኢኹ፡ “ኣብ ገዛይ ክትኣቱ ብኣካል ክረኽበካ ኣይግብኣንን እዩ። ንሰራሕተኛታተይ ትእዛዝ ክህብ ከለኹ፡ ዝበልክዎ ኩሉ ይገብሩ። ስለዚ እንተደኣ ሓንቲ ቃል ጥራይ ተዛሪብካ፡ ሰራሕተኛይ ክድሕን እዩ” ኢሉ ለመኖ። የሱስ ድማ ብእምነት እቲ ሓለቓ ተገረመ። ነቲ ዝሓመመ ሰብ ናብ ቤቱ ከይኣተወ፡ ቃል ጥራይ ብምዝራብ ኣሕወዮ።

ሰባት ንየሱስ ነቲ ናይ ሮማዊ ሰራሕተኛ ክፍውሶ ምስ ለመንዎ።

ሉቃስ 7፡11-17

የሱስ ምስ ሰዓብቱ ናብ ሓንቲ ከተማ ከደ። ኣብ ኣፍ ደገ እታ ከተማ ምስ በጽሑ፡ ሰባት ንሓደ ዝሞተ መንእሰይ ተሰኪሞም ናብቲ መቓብር ክኸዱ ረኣየ። ንሱ እውን እንኾ ውላድ ናይ ሓንቲ ሰብአያ ዝሞታ ሰበይቲ እዩ ነይሩ። የሱስ ድማ ደንገጸላ እሞ “ኣጆኺ ኣይትበከይ!” ኢልዋ። ሽዑ ናብቲ ሬሳ ቀሪቡ “አታ መንእሰይ ተንስእ!” ኢልዎ። ብኡንብኡ ድማ ካብ ሞት ተንሰአ። ኮፍ ኢሉ ክዛረብ ጀመረ። በዚ መንገዲ እዚ እዛ ኣደ እንደገና እንኾ ውላዳ ረኸበት። እቶም ህዝቢ ነዚ ምስ ረኣዩ ንኣምላኽ ኣመስገኑ።

የሱስ ንሓደ መንእሰይ ካብ ሞት ምስ ኣተንሥኦ

ሉቃስ 8፡22-25

ሓደ እዋን የሱስን ሰዓብቱን ብጃልባ ባሕሪ ክሳግሩ ከለዉ ብርቱዕ ንፋስ ተላዕለ። ብሰንኪ እቲ ንፋስ ማይ ናብታ ጃልባ ኣትዩ ይመልኣ ስለ ዝነበረ፡ እቶም ሰዓብቲ ኣዝዮም ፈሪሖም። ኣብቲ ግዜ እቲ ግና የሱስ ኣብታ ጃልባ ደቂሱ ነበረ። ስለዚ ንየሱስ ኣበራቢሮም “የሱስ! ተንስእ፡ ሓግዘና!” ኢሎም ጨደሩ። ንሱ ድማ ተንሲኡ ነቲ ንፋስን ነቲ ማዕበልን ከሃድኡ ኣዘዞም። ብኡንብኡ እቲ ብርቱዕ ንፋስን እቲ ዝናወጽ ዝነበረ ማይን ጸጥ ኢሉ። ሰዓብቱ ተገሪሞም “ኣብ ልዕሊ ንፋስን ማይን ከምዚ ዝበለ ስልጣን ዘለዎ መን እዩ?” ኢሎም ነንሕድሕዶም ተዘራረቡ።

የሱስ ንንፋስን ማዕበልን ህድእ ክብሉ ምስ ኣዘዘ

ሉቃስ 8፡26-39

የሱስን ሰዓብቱን ኣብቲ ካልእ ሸነኽ እቲ ባሕሪ ምስ በጽሑ፡ ብዙሓት ኣጋንንቲ ዝሓደርዎ ሰብኣይ መጸ። እቲ ሰብኣይ ብርኩሳት መናፍስቲ እናተሳቐየ ኣብ መቓብር ይነብር ነበረ። ነቲ ዝኣስሮ ሰንሰለት ስለ ዝሰብር፡ ክሕዞ ዝኽእል ሰብ የለን። የሱስ ግና ነቶም መናፍስቲ ካብቲ ሰብኣይ ክወጹ ኣዘዞም። ብኡ ንብኡ ወጺኦም ናብቶም ኣብ ጥቓኦም ዝነበሩ ሓሰማታት ኣተዉ። እቶም ሓሰማታት ናብቲ ቀላይ ጎዮም ጸደፉ እሞ ጠሓሉ። እቲ ሰብኣይ ካብ ኣጋንንቲ ሓራ ስለ ዝወጸ ድማ፡ ንየሱስ ኣዝዩ ኣመስገኖ። ኣብታ ኸተማ እናዘወረ ኣምላኽ ዝገበረሉ ኩሉ ነገረ።

የሱስ ነቶም ኣጋንንቲ ካብቲ ሰብኣይ ክወጹ ምስ ኣዘዞም

ሉቃስ 8፡40-56

ሓደ መዓልቲ ሓንቲ ጓሉ ንሓደ መራሒ ሓመመት። ናብ የሱስ መጺኡ ንጓሉ ከሕውየሉ ለመኖ። የሱስ ምስኡ ናብ ቤቱ ኪኸይድ ከሎ፡ ሰባት መጺኦም ጓሉ ከም ዝሞተት ነገርዎ። የሱስ ግና እቶም ህዝቢ ዝዛረብዎ ሰሚዑ ነቲ መራሒ “ብኣይ ተኣመን እምበር ኣይትፍራሕ! ጓልካ ክትድሕን ኢያ” በሎ። ኣብ ቤት እቲ መራሒ ምስ በጽሑ፡ የሱስ ነቶም ዝበኽዩ ዝነበሩ ሰባት ስቕ ክብሉ ነገሮም። ሽዑ ምስ ወለዳን ሰለስተ ሰዓብቱን ናብቲ ገዛ ኣተወ እሞ “ኣንቲ ጓል፡ ተንስኢ!” በላ። ብኡብኡ ድማ ካብ ሞት ተንሰአት። የሱስ ድማ ንወለዳ ዝብላዕ ነገር ኪህብዋ ነገሮም።

የሱስ ነታ ዝሞተት ጓል ምስ ኣተንስኣ

ሉቃስ 9፡1-6

ሓደ መዓልቲ የሱስ ንሓዋርያቱ ሓይሊ ሂቡ “ኣብዚ ከባቢ ናብ ዘለው ከተማታት ኪዱ ብዛዕባ መንግስቲ ኣምላኽ ንህዝቢ ንገሩ። ንሕሙማት ፈውሱ፡ ነቶም ብኣጋንንትን ሰይጣን ዝተጨነቑ ድማ ሓራ ኣውጽእዎም!” ኢሉ ድማ ለኣኾም። ከምኡውን ኣብዚ ግዜዚ “ንመንገዲ ዝከውን ከም ቦርሳ፡ ባኒ፡ ገንዘብ ዝኣመሰሉ ነገራት ኣይትውሰዱ!” ኢልዎም። እዚ ዝበሎም እግዚኣብሄር ኣብ ዝኸድዎ ቦታ ዘድልዮም ኩሉ ስለ ዝህቦም እዩ።

የሱስ ንሓዋርያት ሓይሊ ሂቡ ናብ ከተማታት ኽልእኮም ከሎ

ሉቃስ 9፡10-17 + ዮሃንስ 6፡1-14

ሃዋርያት የሱስ ናብኡ ተመሊሶም ነቲ ኣብ ከተማታት ዝገበርዎ ዅሉ ተኣምራት ነገርዎ። ድሕሪኡ ንበይኖም ክኾኑ ካብ ሰባት ርሕቅ በሉ። ብዙሕ ህዝቢ ግና ንየሱስ ደለዮም ሰዓብዎም እሞ ናብቲ ንሱ ዘለዎ ቦታ መጹ። የሱስ ንህዝቢ ብዛዕባ መንግስቲ ኣምላኽ ምሂሩ ንሕሙማት፡ ድማ ኣሕወየ። ምስ መሰየ ነቶም ብዙሓት ሰባት መግቢ ካበይ ከም ከምዝረኽቡ ተዘራረቡ። የሱስ ግና ነቲ ሓደ ወዲ ዘምጽኦ ክልተ ዓሳን ሓሙሽተ እንጌራን ወሲዱ ንኣምላኽ ኣመስገኖ። ድሕሪኡ ነቲ መግቢ ንሰዓብቱ ንህዝቢ ክዕድሉ ሃቦም። እግዚኣብሄር ነቲ ንእሽቶ መግቢ ስለ ዝባረኾ ንልዕሊ፡ 5000 ሰባት ዝኣክል ኰነ። እቶም ህዝቢ በሊዖም ምስ ጸገቡ ድማ፡ 12 መሶብ ሙሉእ እንጌራ ተረፈ።

የሱስ ነቲ ሒደት ዓሳን እንጌራን ክበዝሐ ምስ ባረኾ

ማቴዎስ 14፡22-33

ቀጺሉ፡ የሱስ ንሰዓብቱ ብጃልባ ነቲ ቀላይ ክሰግሩ ነገሮም። ንሱ ግን ንበይኑ ክጽሊ ናብ ሓደ እምባ ደይቡ ኣብኡ ነዊሕ ሰዓታት ጸንሐ። እቶም ሰዓብቱ ብጀልባ እናተጓዕዙ ከለዉ፡ ኣብ ቅድሚኦም ሓያል ንፋስ ተላዒሉ ከሸግሮም ጀመረ። ክወግሕ ምስ ቀረብ፡ የሱስ ኣብ ልዕሊ ማይ እናከደ ናብኦም መጸ። መንፈስ ዝረኣዩ ስለ ዝመሰሎዎም ግን ብፍርሒ ራዕራዕ ኢሎም ኣእወዩ። የሱስ “ኣነ እየ! ኣይትፍርሑ!” ኢሉ ኣተባቢዕዎም። ጴጥሮስ ንየሱስ “ብልዕሊ ማይ ናባኻ ክመጽእ ዶ?” ኢሉ ምስ ሓተቶ፡ “ንዓ!” ኢልዎ። ካብታ ጃልባ ወሪዱ ድማ ቁሩብ ኣብ ልዕሊ ማይ ከደ፡ ንፋስን ማዕበልን ምስ ረኣየ ግና ፈርሐ።
ክጥሕል ምስ ጀመረ፡ የሱስ ከድሕኖ ኣእወየ። ብኡብኡ የሱስ ብኢዱ ሓዞ እሞ ኣውጸኦ “ስለምንታይ ምእማን ሲኢንኻ? ብኣይ ተኣመን እምበር ኣይትጠራጠር!” ኢልዎ። ምስ ጴጥሮስ ድማ ናብ ጃልባ ኣተወ። ሰዓብቱ ድማ ነዚ ምስ ረኣዩ፡ የሱስ ወዲ ኣምላኽ ምዃኑ ፈሊጦም ሰገዱሉ።

የሱስ ኣብ ልዕሊ ማይ ክከይድ ከሎ

ማቴዎስ 17፡1-8 + ሉቃስ 9፡28-36

ሓደ መዓልቲ፡ የሱስ ንሰዓብቱ ጴጥሮስን፡ ዮሃንስን ያእቆብን ሒዙ ናብ ከረን ደየበ። የሱስ ኣብኡ ኺጽሊ ምስ ጀመረ፡ ገጹን ዝተከድኖ ክዳውንቱን በርሀ። ቅድሚ ብዙሕ ዘመናት ዝነበሩ ሙሴን ኤልያስን ብተኣምር ኣብ ጥቓ የሱስ ተራእዮም። ብዛዕባ መደብ እግዝኣብሄር ብየሱስ ክሰርሖ ዝሓሰቦ ብሓባር ተዘራረቡ። እዚ መደብ እዚ ኢየሱስ ምእንቲ ድሕነት ሰብ ክሳቐን ክመውትን ክትንስእን ከም ዘለዎ እዩ ነይሩ።

ሽዑ ደበና መጺኡ ንኹሎም ሸፈኖም። ካብቲ ውሽጢ ደበና፡ “የሱስ ወደይ እዩ፡ ኣነ ይፈትዎ እየ። ንዑኡ ስምዑዎ!” ዝብል ድምጺ ኣምላኽ መጸ። እቲ ደበና ምስ ጠፍአ ብዘይካ የሱስን ሰዓብቱን ካልእ ኣይነበረን።

ሙሴን ኤልያስን ኣብ ከረን ምስ የሱስ ክዘራረቡ ከለዉ

ሉቃስ 10፡29-37

ሓደ እዋን የሱስ ብሓቂ ንሰባት ዘፍቅር ሰብ ከመይ ከምዝኮነ ዝገልጽ ዛንታ ምሂሩ ነይሩ፡

ሓደ እስራኤላዊ ካብ የሩሳሌም ናብ ከተማ የሪኮ ተጓዒዙ። ኣብ መንገዲ ሸፋቱ ረከብዎ። ብዓመጽ ቀጥቂጦም ዝነበሮ ድማ ዘሚቶምዎ ደርብዮሞ ከዱ። ብድሕሪ እዚ ሓደ ካህን ይሓልፍ ስለ ዝነበረ ነቲ ዝተሃርመ ሰብኣይ ረኣዮ። ካብ ሞት ንምድሓን ከይፈተነ ብዘይ ዝኾነ ሓገዝ ገዲፍዎ ከደ። ሽዑ ካልእ ኣገልጋሊ ኣምላኽ ረኣዮ። እሱ ውን ከይደንገጸሉ ገዲፍዎ ከደ። እቶም ክልተ ሰባት እስራኤላውያን እኳ እንተነበሩ፡ ፈጺሞም ኣይሓገዙዎን።

ኣብ መወዳእታ ሓደ ሰብኣይ ካብ ሃገር ሰማርያ በታ መገዲ መጸ። (አብ ሰማርያ ዝነብሩ ሰባት ሳምራውያን ኢዮም ዝበሃሉ።) ሳምራውያን ብእስራኤላውያን ዝተነአቁ ኢዮም ነይሮም። ኰይኑ ግና፡ እዚ ሳምራዊ እዚ፡ ነቲ ሰብኣይ በቶም ሸፋቱ ዝተቀጥቀተ ምስ ረኣየ፡ ኣዝዩ ደንገጸሉ። ብኡ ንብኡ ድማ ሕክምናዊ ረድኤት ገበረሉ። ኣብ ናይ ገዛእ ርእሱ ኣድጊ ኣንቢሩ ድማ፡ ናብ ሓደ ሰብ ክሕግዞን ክከናኸኖን ዝኽእል ቦታ ወሰዶ። ተወሳኪ ነቲ ዘድልዮ መግብን መድሃኒትን እውን ከፊሉሉ ከደ።

እቲ ሳምራዊ ሰብኣይ ነቲ ዝተሃርመ ሰብኣይ ብምህዛን ካብ ሞት ንኸምልጥ ምስ ሓገዞ