ትግርኛ 128-150

ሉቃስ 22፡7-30

የሱስ ንጴጥሮስን ዮሃንስን ናይ እስራኤላውያን በዓል ፋሲካ ዘብዕልሉ ቦታ ንኸዳልዉ ለኣኾም። ኣበይ ቦታ ክዳሎ ከም ዝደሊ ምስ ሓተትዎ፡ ንሱ ድማ “ኣብ የሩሳሌም ምስ ኣቶኹም ዕትሮ ማይ ዝጾረ ሰብ ክትረኽቡ ኢኹም። ናብቲ ዝኣትወሉ ቤት ስዓብዎ ድራር ፋሲካ ዝበልዓላ ምቹእ ክፍሊ ሕተትዎ!” በሎም። ከይዶም ድማ ልክዕ ከምቲ የሱስ ዝበሎ ኩሉ ረኸብዎ። እቲ ዋና ገዛ ድማ ውሑስ ክፍሊ ኣርኣዮም። ኣብኡ ድማ ንበዓል ምድላዋት ገበሩ።

ጸኒሑ፡ የሱስን እቶም ዓሰርተው ክልተ ሃዋርያትን ኣብቲ ክፍሊ ብሓባር ድራር ፋሲካ በልዑ። ኣብኡ ድማ አብ ቀረባ እዋን ከም ዝመውት ነገሮም። ንሱ ድማ ከም በዓል ፋሲካ እንጌራ ከም ዝቁረስን ደሙ ውን ከም ወይኒ ከምዝፈሥ ብምስላ ነገሮም። ደም ገንሸል ኣብ ፋሲካ ንእስራኤላውያን ካብ ሞት ኣብ ግብጺ ከም ዘድሕኖም፡ ሞቱ ድማ ንሰባት ካብ ዘለኣለማዊ ሞት ከም ድሕኖ የሱስ ይፈልጥ ነበረ።

የሱስ ቅድሚ ምሟቱ ንመወዳእታ ግዜ ምስ ሃዋርያቱ ክበልዕ ከሎ

ዮሃንስ 13፡1-17

የሱስ ኣብ እዋን ድራር ፋሲካ እግሪ ሃዋርያቱ ክሓጽብ ተንሲኡ። ጴጥሮስ ግና ስለምንታይ ጎይታ የሱስ ከምዚ ክገብር ከም ዝደለየ ኣይተረድኦን። ስለዚ ንየሱስ “ንስኻ እግረይ ኣይትሓጽብን ኢኻ” በሎ። የሱስ ከኣ “ኣእጋርኻ ብኣይ ምሕጻብ ኣገዳሲ ኢዩ” ኢሉ ገለጸሉ። ጴጥሮስ በዚ ምስ ተሰማምዐ፡ የሱስ ኣእጋሩ ሓጸቦ። ጎይታና የሱስ ዓቢ መምህርን ኣምላኽን እኳ እንተነበረ፡ ንሰዓብቱ ብትሕትናን ሰናይ ብምስራሕን የገልግሎም ነበረ። ንሱ መራአዩ ኾይኑ ንኦኦም ከም ዝገበሮ ንሶም ውን ኣብ ነንሕድሕዶም ኽገብርዎ ከም ዘለዎም ነገሮም።

ጎይታ የሱስ እግሪ ሓዋርያት ምስ ሓጸበ

ዮሃንስ 15፡1-12

የሱስ ንሰዓብቱ “ኣነ ከም ጉንዲ ወይኒ እየ ንስኻትኩም ድማ ከም ጨናፍረይ ኢኹም። ካባይ እንተ ተፈሊኹም ዋላ ሓንቲ ክትገብሩ ኣይትኽእሉን” በሎም። ስለዚ ምስኡ እንተ ዄንና፡ ከም ሰላም፡ ሓጐስ፡ ፍቕሪ፡ ተኣማንነትን ትዕግስትን ዝኣመሰሉ ሰናይ ፍረታት ከነፍሪ ኢና። እግዚኣብሄር ድማ ንሕና ብዙሕ ሰናይ ፍረ ንኽንፈሪ ከም ወይኒ ጨናፍር ይከናኸነና እዩ።

የሱስ እውን “ከምቲ ኣነ ዘፍቀርኩኹም፡ ንሓድሕድኩም ተፋቐሩ!” ኢሉ ንሰዓብቱ ኣዘዞም።

ንየሱስ ምፍቃር ማለት ንሱ ዝበሎ ምግባር እዩ።

ዋና ኣታኽልቲ ወይኒ ነቲ ዘይፈሪ ጨንፈር ክቖርጾ ከሎ

ሉቃስ 22፡39-53

ድሕሪ ድራር ፋሲካ፡ የሱስ ናብቲ ኣብ ጥቓ ከተማ የሩሳሌም ዝርከብ ደብረ ዘይቲ ዝበሃል ከረን ደየበ። ኣብኡ ድማ ንሃዋርያቱ ናብ ፈተና ከይኣትዉ ክጽልዩ ነገሮም። ነቲ ክገጥሞ ዝቐረበ መከራ ስለ ዝፈለጠ ድማ ኣዝዩ ፈሪሑ። ተንበርኪኹ ድማ ከምዚ ኢሉ ጸለየ፡ “ኣቦይ፡ ናብቲ ክመጸኒ ዝቐረበ መከራ ከይኣቱ በጃኻ ሓልወኒ። ነገር ግን ኣነ ዝደልዮ ፍቓደይ ዘይኮነስ ፍቓድካ ምፍጻም እዩ” በለ። ሽዑ መልኣኽ እግዚኣብሄር መጺኡ ኣተባብዖ። የሱስ ምስ ጸለየ ናብ ሃዋርያቱ መጸ። ክጽልዩ እኳ እንተደለዩ ግና፡ ደኺሞም ስለ ዝነበሩ ደቂሶም ረኸቦም። ስለዚ የሱስ ኣብዛ ናይ መከራ ሰዓት እዚኣ በይኑ ነበረ።

ነዊሕ ከይጸንሐ፡ ሓደ ኻብቶም ሃዋርያት ዝዀነ ይሁዳ ዚብሃል ሰብኣይ፡ ነቶም ንየሱስ ኪኣስርዎ ዝደልዩ ሰባት መገዲ ሪሒዎም መጸ። ብኡንብኡ ሒዞሞ ድማ ናብ ቤት ሊቀ ካህናት ወሰድዎ።

የሱስ ቅድሚ ምሟቱ ኣዝዩ ፈሪሑ ክጽልይ ከሎ ሃዋርያት ድማ ደቂሶም ከለዉ

ሉቃስ 22፡54-62

ጴጥሮስ ንየሱስ ናብቲ ፍርዲ ክወስድዎ ከለዉ ርሕቕ ኢሉ ሰዓቦ። ናብቲ የሱስ ዝኣተወሉ ቅጽሪ ኣትዩ ድማ ምስቶም ሓዊ ዝስሕኑ ዝነበሩ ሰባት ኮፍ በለ። ድሕሪ ቁሩብ ግዜ ሓንቲ ሰራሕተኛ ምስ ረዓየቶ “እዚ ሰብኣይ እዚ ሰዓቢ የሱስ ኢዩ” በለት። ጴጥሮስ ፈሪሑ “ሓቂ ኣይኮነን፡ ኣነ ኣይፈልጦን እየ” ኢሉ መለሰ። ካልኦት ክልተ ሰባት ድማ በብተራ “ንስኻ እውን ምስኡ ኔርካ” በልዎ። ጴጥሮስ ግን ንኽልቲኦም “ነዚ እትብልዎ ሰብኣይ ኣይፈልጦን እየ” ኢሉ ንሳልሳይ ግዜ ምስ ከሓዶ እቲ ደርሆ ነቀወ። ብኡብኡ የሱስ ናብ ጴጥሮስ ጠመተ። ጴጥሮስ ድማ ነቲ ኣቐዲሙ “ደርሆ ከይነቀወ ሰለስተ ግዜ ክትክሕደኒ ኢኻ” ዝበሎ ቃል ዘከረ። ንየሱስ ስለ ዝኸሓዶ ድማ ካብቲ ቅጽሪ ወጺኡ ኣምሪሩ በኸየ።

ጴጥሮስ ስለ ዝፈርሐ “ንየሱስ ኣይፈልጦን እየ” ኢሉ ክክሕድ ከሎ

ሉቃስ 22፡66 – 23፡25

ንግሆ መራሕቲ እስራኤል ንየሱስ ኣብ ፍርዲ ኣቕረብዎ። ኣብኡ ድማ ብዙሕ ሕቶታት እናሓተቱ መርመርዎ። ዋላ ሓንቲ በደል እኳ እንተዘይነበሮ፡ ብሓሶት ገበነኛ ገይሮምዎ። የሱስ ድሕሪ ሓጺር ግዜ ኣብ ጎኒ እግዚኣብሄር ኣብ ዝፋን ከም ዝቕመጥ ነገሮም። በዚ ምኽንያት እዚ ድማ “ንእግዚኣብሄር ጸሪፉ” ብምባል ናብ ወከልቲ መንግስቲ ሮማ ወሰድዎ። ንየሱስ ድማ መሊሶም ኣብ ቅድሚኦም ከሰስዎ። ንሳቶም ግና ዝኾነ በደል ኣይረኸቡሉን። የሱስ ግና ኣብ ቅድሚ ኩሉ ሰብ ከም ገንሸል ስቕ በለ። ምኽንያቱ ንሱ ንኹሉ ሓጢኣት ደቂ ሰባት ንከንጽሕ ዝተዳለወ ገንሸል ኣምላኽ እዩ። ኣብ መወዳእታ፡ መብዛሕትኦም መራሕቲ፡ የሱስ ኪመውት ከም ዘለዎ ብሓደ ድምጺ ተሰማምዑ።

መራሕቲ እስራኤል ንየሱስ ክመውት ኣለዎ ኢሎም ኣብ ቅድሚ ወኪል መንግስቲ ሮማ ኽከስዎ ከለዉ

ሉቃስ 23፡33-49 + ማቴዎስ 27፡33-56

ብድሕሪ እዚ እቶም ወተሃደራት ንየሱስ ካብታ ከተማ ኣውጽእዎ። ኣብ መንጎ ክልተ ገበነኛታት ኣብ ዝነበረ መስቀል ኢዱን እግሩን ብመስማር ሸንኪሮም ሰቀልዎ። ሓደ ኻብቶም ገበነኛታት ብዛዕባ የሱስ ሕማቕ ተዛረበ። እቲ ካልእ ግና ሓጥእ ምዃኑ ፈሊጡ ኣብታ እትመጽእ መንግስቱ ምሕረት ክገብረሉ ሓተቶ። የሱስ ነቲ ገበነኛ ይቕረ ኢሉ “ሎሚ ኣብ ሰማያዊ ስፍራ ምሳይ ክትህሉ ኢኻ” በሎ።

የሱስ ኣብ ዝተሰቕለሉ እዋን ካብ ፋዱስ ጀሚሩ ን 3 ሰዓታት ድሕሪ ቀትሪ ጸልማት ነበረ። ኣብ መስቀል ከሎ ድማ ሞተ። ኣብዚ ግዜ እዚ መሬት ተንቀጥቀጠ፡ እቲ መእተዊ ውሽጣዊ ክፍሊ ቤተ መቕደስ ዝነበረ መጋረጃ ድማ ካብ ላዕሊ ክሳብ ታሕቲ ተቐደደ። እዚ ድማ እቲ ብሰንኪ ሓጢኣት ዝተዓጽወ ናብ እግዚኣብሄር ዝወስድ መንገዲ ንኹሉ ክፉት ምዃኑ ዘርኢ እዩ።

የሱስ ብዘይ በደል ምእንቲ ሓጢኣትና ኣብ መስቀል ምስ ሞተ

ማቴዎስ 27፡57 – 28፡10

የሱስ ምስ ሞተ፡ ሓደ ብሕቡእ ክስዕቦ ዝጸንሐ ሕያዋይ ሰብ፡ ሬስኡ ወሲዱ ኣብ ሓድሽ መቓብር ኣቐመጦ። እዚ ዓርቢ ድሕሪ ቀትሪ እዩ ኣጋጢሙ። ቀዳም ናይ እስራኤል መዓልቲ ዕረፍቲ ስለዝኮነ፡ ናብቲ የሱስ ዝተቀብረሉ መቓብር ዝኸደ ሰብ ኣይነበረን። ሰንበት ንግሆ፡ ገሊአን ኣንስቲ ንሬሳ የሱስ ቅዱይ ቅብኢ ንምቕባእ ናብ መቓብር ከዳ። ሓደ መልኣኽ ኣብ መቓብሩ ተራእየ። በዚ ምኽንያት እዚ ምንቅጥቃጥ ምድሪ ኾነ፡ እቲ መቓብር የሱስ እተዓጽወሉ ዓብዪ እምኒ ድማ ተገልባጠ። እቶም ነቲ መቓብር ዝሕልዉ ዝነበሩ ሓለውቲ ድማ ብፍርሒ ከም ዝሞተ ሰብ ወደቑ።

ኣብዚ ግዜ እዚ እቲ መልኣኽ ነተን ኣንስቲ “ኣይትፍርሓ! የሱስ ከምቲ ኣቐዲሙ ዝበሎ ካብ ሞት ተንሲኡ ኣሎ። ቀልጢፍክን ኪዳ ነዚ ብስራት እዚ ንሰዓብቱ ንገሩዎም!” በለን። እተን ኣንስቲ ድማ የሱስ ኣብ መቓብር ከም ዘይነበረ ረኣያ። ቀልጢፈን ናብ ሰዓብቲ የሱስ ከዳ። ኣብ መገዲ ኸለዉ፡ የሱስ ብሃንደበት ተረኣዮም። ስለዚ ብሓጐስ መሊኦም ነቶም ሰዓብቲ ብስራት ነገሩዎም። ንሳቶም ድማ ኣዝዮም ተገረሙ። ብኡንብኡ ግን ኣይኣመኑን።

ኣብቲ መቓብር፡ እቶም ሓለውቲ ብፍርሒ ወዲቖም፡ እቲ መልኣኽ ነተን ኣንስቲ “የሱስ ተንሲኡ ኣሎ” ምስ በለን

ሉቃስ 24፡36-43

ብድሕሪ እዚ የሱስ ንሃዋርያት ተራእዮም። ንመጀመርታ ግዜ ምስ ረኣይዎ ድማ፡ ናይ ዝሞተ ሰብ መንፈስ መሲልዎም ነበረ። የሱስ ግን መንፈስ ዘይኮነስ ብሓቂ ካብ ሞት ተንሲኡ እዩ። ስለዚ ኣብ እግሩን ኣእዳዉን ጎድኑን ዝነበረ ቁስሊ ኣርኣዮም። ምእንቲ ክኣምኑ ድማ ብኢዶም ክትንክፍዎ ፈቀደሎም። ብተወሳኪ ኣብ ቅድሚኦም ዝተጠብሰ ዓሳ እውን በልዐ። እዚ ዅሉ ምስ ረኣዩ፡ ብሓቂ የሱስ ካብ ሞት ከምዝተንሰአ ፈለጡ። ብዚ ምክንያት ድማ ብሓጐስ ተመልኡ።

እቶም ሰዓብቲ የሱስ ካብ ሞት ተንሲኡ ምስ ተራኸቡ

ዮሃንስ 21፡1-17

ሓደ ለይቲ ጴጥሮስ ምስ ገለ ሃዋርያት ዓሳ ክገፍፍ ከደ። ምሉእ ለይቲ ግን ዓሳ ኣይሓዙን። ንግሆ ንየሱስ ኣብ ጥቓ እቲ ቀላይ ደው ኢሉ ረኣይዎ። መን ምዃኑ ግን ገና ኣይፈለጡን። የሱስ ድማ “መርበብኩም ኣብ የማናይ ሸነኽ ጃልባ ደርብዩ። ዓሳ ክትረኽቡ ኢኹም” በሎም። ከምቲ ዝበሎም ምስ ገበሩ ድማ፡ እታ ጃልባ ክትሕዞም ዘይከኣለት ብዙሕ ዓሳታት ሓዙ። ብድሕሪ እዚ እቲ ኣብ ጥቓ ባሕሪ ደው ኢሉ ዝነበረ ሰብኣይ የሱስ ምዃኑ ፈለጡ።

የሱስ ኣብ ሓዊ ዝተጠብሰ ዓሳታትን እንጌራ መገቦም። ምስ በልዑ ድማ፡ ንጴጥሮስ ኣዘራረቦ። ጴጥሮስ ጕድለት ዘለዎ ሰብ እኳ እንተ ነበረ፡ ንየሱስ ግን የፍቅሮ ነበረ። ስለዚ ንሰዓብቱ ንፉዕ ጓሳ ኪኸውን ሸሞ።

የሱስ ኣብ ጥቓ ቀላይ ንሃዋርያት ቁርሲ ኣዳልዩ እንደገና ክርአዮም ከሎ

ሉቃስ 24፡44-49

የሱስ ካብ ሞት ተንሲኡ ናብ ሰማይ ቅድሚ ምኻዱ፡ ንመወዳእታ ግዜ ንሰዓብቱ ብዛዕባ ቃል ኣምላኽ ምሂርዎም እዩ። ኣብ ትምህርቱ ክመጽእ ዝጽበይዎ ዝነበሩ መድሓኒ ንሱ ምዃኑ ኣረድኦም። ብተወሳኪ ውን ክመውትን ካብ ሞት ክትንስእን ከም ዝነበሮ እውን ገለጸሎም። በዚ መንገዲ እምበር፡ ንሰባት ንምድሓን ካልእ ኣማራጺ ኣይነበረን። ነብያት ብዛዕባ እዚ ጉዳይ ቅድሚ ብዙሕ ዘመናት ጽሒፎም እዮም።

ስለዚ ሕጂ ኩሎም ብየሱስ ዝኣምኑ ካብ ጥፍኣት ክድሕኑ ይኽእሉ እዮም። እግዚኣብሄር ድማ ይቕረ ክብሎም ይደሊ። የሱስ ንሰዓብቱ ናብ መላእ ዓለም ከይዶም፡ ነዚ ናይ ኣምላኽ ምሕረት ዝሓዘ መልእኽቲ ንኹሉ ሰብ ክነግሩ ኣዘዞም።

የሱስ ንሰዓብቱ ነቲ ብስራት ንዅሎም ሰባት ኪነግሩ ምስ ኣዘዞም

ግብሪ ሃዋርያት 1፡1-14 + ማቴዎስ 28፡16-20 + ዮሃንስ 14

የሱስ “መንፈስ ቅዱስ ምስ መጸ ክሕግዘኩምን ከጸናንዓኩምን ክምህረኩምን እዩ” ኢሉ ኣቀዲሙ ምሂሩ ነይሩ። ኣብ መወዳእታ ንሰዓብቱ “ኣብ ቀረባ እዋን መንፈስ ቅዱስ ክሰደልኩም እየ። ንሱ ውን ብዛዕባ ምድሓነይን ምሕረተይን ክትዛረቡ ክሕግዘኩም እዩ። ስለዚ ንሱ ክሳብ ዝመጽእ ኣብ የሩሳሌም ጽንሑ!” ኢልዎም።

ቅድሚ ናብ ሰማይ ምኻዱ ድማ “ኩሉ ግዜ ምሳኻትኩም ክኸውን እየ” በሎም። ሽዑ የሱስ ኣእዳዉ ኣልዒሉ ባረኾም። እናረኣይዎ ድማ ናብ ሰማይ ደየበ። ናብ ኣቦኡ እግዚኣብሄር ተመሊሱ ድማ ኣብ ጎድኑ ኣብ ዝፋን ተቐመጠ። ንሱ ንዘለኣለም ጎይታ እዩ። ከምቲ ናብ ሰማይ ዝዓረገ ድማ ሓደ መዓልቲ ናብዛ ዓለም ክምለስ እዩ።

የሱስ ናብ ሰማይ ምስ ዓረገ፡ ሰዓብቱ ናብ የሩሳሌም ተመልሱ። ንኣምላኽ እናኣመስገኑን እናጸለዩን ንምምጻእ መንፈስ ቅዱስ ይጽበዩን ነበሩ።

የሱስ ነዛ ዓለም እዚኣ ሓዲጉ ናብ እግዚኣብሔር ኣቦ ክምለስ ከሎ

ግብሪ ሃዋርያት 2፡1-12 + 1ይ ቆረንቶስ 12፡7

ድሕሪ ሒደት መዓልታት ሰዓብቲ የሱስ ኣብ ሓደ ቦታ ብሓባር ከለዉ፡ መንፈስ ቅዱስ መጸ። ኣብዛ ህሞት እዚኣ ሃንደበት ካብ ሰማይ ብርቱዕ ናይ ንፋስ ድምጺ ክመጽእ ሰምዑ። ኣብ ነፍሲ ወከፎም ድማ ከም ንእሽቶ ሓዊ ዝኣመሰለ ሃልሃልታ ተቐመጠ። ንሱ ግና ኣየቃጸሎምን። ምክንያቱ መንፈስ ኣምላኽ ንሰባት ንምሕጋዝ እምበር፡ ንኺጐድኦም ኣይኰነን ዝተወሓበ። ብኡ ንብኡ ድማ ብዘይፈልጥዎ ቋንቋ ናይ ዝተፈላለያ ሃገራት ሰባት ክዛረቡ ጀመሩ። ነዞም ቋንቋታት እዚኣቶም ክዛረቡ መንፈስ እግዚኣብሄር ሂብዎም ነይሩ። ካብ ዝተፈላለያ ሃገራት ዝመጹ ሰባት በቲ ዝፈልጥዎ ቋንቋ ብዛዕባ ዕዮ ኣምላኽ ክዛረቡ ምስ ሰምዑ ተገረሙ።

ብድሕሪ እዚ ብመንፈስ ቅዱስ ሓይልን ውህበትን ብዝበለጸ ንሕድሕዶም ክተሃናነጹን ክደጋገፉን ክኢሎም። ሓይሊ መንፈስ ቅዱስ ንኽብሪ ገዛእ ርእሶም ዘይኮነስ፡ ንኽብሪ እግዚኣብሔር ዝተወሃበ እዩ።

መንፈስ ኣምላኽ አብ ለዕሊ ሰዓብቲ የሱስ ክወርድ ከሎ

ግብሪ ሃዋርያት 2፡14-47

መንፈስ ቅዱስ ምስ መጸ፡ ጴጥሮስ ብዘይ ፍርሒ ነቶም ዝተኣከቡ ህዝቢ ክዛረብ ተንሲኡ። እዚ ዝረኣይዎን ዝሰምዕዎን መስተንክር ነገር ምጽኣት መንፈስ ቅዱስ ምዃኑ ኣረድኦም። የሱስ ንሞት ከም ዝሰዓረን ከም ዝተንሥኤን ኩሉ ሰብ ብእኡ ብምእማን ከም ዝድሕን ምሂሩ። ነዚ ስብከት ጴጥሮስ ዝሰምዑ ብዙሓት ሰባት ብየሱስ ኣሚኖም ተጠመቑ።

ብየሱስ ዝኣመኑ ሰባት ብሓባር ብምጽላይን ብሓባር ብምብላዕን ብሰላም ይነብሩ ነበሩ። ገንዘቦም ብሓደ ስለዝገበሩ፡ ኣብ መንጎኦም ዝተጸገመ ሰብ ኣይነበረን። ንሕድሕዶም ብጣዕሚ ብሓጎስ ይተሓጋገዙ ነበሩ። እቲ ሰናይ ግብሮም፡ ኣብ ቅድሚ እቶም ህዝቢ ሞገስ ኣውሃቦም።

ጴጥሮስ ንህዝቢ ቃል እግዚኣብሄር ክምህሮም ከሎ

ግብሪ ሃዋርያት 3

ኣብ የሩሳሌም ዝነበሩ ዅሎም ሰባት ዝፈልጥዎ ካብ ዚውለድ ኣትሒዙ ልሙስ ዝነበረ ሓደ ሰብኣይ ነበረ። መዓልታዊ ኣብ ኣፍደገ ቤተ መቕደስ ኮፍ ኢሉ ገንዘብ ይልምን ነበረ። ሓደ መዓልቲ ጴጥሮስ ምስ ረኣዮ፡ “ዝህበካ ገንዘብ የብለይን። ብስም ጎይታ የሱስ ተንስእ እሞ ኺድ!” በሎ። ብኡ ንብኡ እቲ ልሙስ ሰብ ሓውዩ ክኸይድ ጀመረ። እንዳዘለለ ብሓጎስ ንኣምላኽ ኣመስገነ። በዚ ምኽንያት ድማ ብዙሓት ሰባት ኣብ ዙርያ ጴጥሮስን እቲ ዝሓወየ ሰብን ተኣከቡ። ኣብዚ ግዜ እዚ ጴጥሮስ ነቲ ልሙስ ዘሕወየ የሱስ ከም ዝኾነ ገሊጹ ኩሉ ክብሪ ድማ ንዑኡ ሂቡ። የሱስ መድሓኒ ምዃኑ እውን ነገሮም።

ጴጥሮስ ነቲ ልሙስ ብስም የሱስ ክትንስእ ምስ ነገሮን የሱስ ድማ ክፍውሶ ከሎ

ግብሪ ሃዋርያት 8፡26-40

ፊልጶስ ናይ እግዚኣብሄር ሰብ እዩ ነይሩ። ሓደ መዓልቲ ኣምላኽ ናብ ደቡብ እስራኤል ክከይድ ነገሮ። ስለዚ ፊልጶስ ናብኡ ከደ። እናተጓዕዘ ከሎ፡ ኣብ ሰረገላ ተቀሚጡ ዝከይድ ሰብኣይ ረኣየ። ካብ ኢትዮጵያ ንእግዚኣብሄር ክሰግድ ዝመጸ ናይ መንግስቲ በዓል ስልጣን እዩ ነይሩ። ኣብ መንገዲ ኮሎ ድማ ኣብ ነቢይ ኢሳይያስ ብዛዕባ ገንሸል ኣምላኽ ዝተጻሕፈ ክፍሊ የንብብ ነበረ። እቲ ዝተጻሕፈ ብዛዕባ እንታይ ከምዝዛረብ ግን ኣይተረድኦን። ፊልጶስ ነዚ ከንብብ ምስ ሰምዐ ደይቡ ገለጸሉ። የሱስ ገንሸል ኣምላኽ ምዃኑን ካብ ኩሉ ጥፍኣት ከም ዘድሕኖን ኣረድዎ። እቲ ኢትዮጵያዊ ነዚ ምስ ሰምዐ ብየሱስ ኣሚኑ ተጠመቐ።
ብድሕሪኡ ፊልጶስ ብኡንብኡ ብሓይሊ ብመንፈስ ቅዱስ ተወሲዱ ኣብ ካልእ ቦታ ተራእዮ። እቲ በዓል ስልጣን ውን ብሓጎስ ናብ ኢትዮጵያ ተመልሰ።

ፊልጶስ ምስቲ ኢትዮጵያዊ ብዛዕባ የሱስ ክዛረብ ከሎ

ግብሪ ሃዋርያት 9

ሳውል ግጉይ ብዝኾነ ሓሳብ ንእግዚኣብሄር ብምግልጋል ኣዝዩ ብዙሕ ዝጸዓረ ሰብ እዩ ነይሩ። ስለዚ ንሰዓብቲ የሱስ ግጉይ መገዲ ዝኽተሉ ዘለዉ ስለ ዝመሰሎ የሳድዶም ነበረ። ብዙሓት ክርስትያናት ብሰንኪ ሳኦል ካብ የሩሳሌም ሃዲሞም።

ሓደ መዓልቲ ሳውል ንክርስትያናት ከሳድድ ናብ ካልእ ከተማ ይኸይድ ነበረ። ኣብ መንገዲ ከሎ የሱስ ተገሊጹ ደው ኣበሎ። ሃንደበት ኣብ ዙርያኡ ዓቢ ብርሃን በርሀ እሞ ወደቀ። የሱስ “ሳውል፡ ስለምንታይ ትሰጎኒ ኣለኻ?” ክብል ከሎ ሰምዐ። ሳውል ካብ መሬት ምስ ተንስአ ኣዒንቱ ምርኣይ ሰኣና። ድሕሪ ሰለስተ መዓልቲ፡ ኣምላኽ ንሓደ ካብ ክርስትያናት ንሳውል ክጽልየሉ ለኣኾ። እቲ ዝተለኣከ ሰብኣይ ምስ ጸለየሉ፡ መሊሱ ክርኢ ጀመረ።

በዚ መንገዲ እዚ ድማ ህይወት ሳውል ተቐይሩ ሰዓቢ የሱስ ኰነ። ካብቲ ግዜ እቲ ኣትሒዙ ድማ ስሙ ጳውሎስ ኮነ።

የሱስ ንሳውል ተገሊጹ ደው ምስ ኣበሎ

ግብሪ ሃዋርያት 9 + ተወሳኺ ምዕራፋት

ጳውሎስ የሱስ ወዲ ኣምላኽ ምዃኑ ምስ ፈለጠ፡ ምኵራባት ኣብ ዝበሃሉ ናይ እስራኤላውያን ቤት ጸሎታት ብዛዕባ የሱስ ኪሰብኽ ጀመረ። ናብ ርሑቕ ሃገራት ተጓዒዙ ንኻልኦት ህዝብታት እውን ይምህር ነይሩ። ገሊኦም ሰባት ብዛዕባ የሱስ ኪምህር ከሎ፡ ብሓጐስ ይሰምዕዎን ብየሱስ ይኣምኑን ነበሩ። ገለገለ ሰባት ግና መልእኽቱ ክሰምዑ ስለዘይደለዩ ተቓወምዎ። ንሱ ግና ኣገልግሎቱ ኣየቋረጸን። ብሓይሊ እግዚኣብሄር ድማ ብዙሕ ተኣምራት ገበረ። ብዚ ምክንያት ብዙሓት ሰባት እግዚኣብሄር ከም ዘፍቅሮምን ቃል እግዚኣብሄር ሓቂ ምዃኑን ፈለጡ።

ጳውሎስ ቃል እግዚኣብሄር ክምህር ከሎ

ግብሪ ሃዋርያት 10

ሓደ መዓልቲ ጴጥሮስ እናጸለየ ከሎ፡ ካብ እግዚኣብሄር ራእይ ረኣየ። እዚ ራእይ እዚ ሕልሚ ዝመስል ከይደቀስኻ ዝረኣይ እዩ ነይሩ። ኣብዚ ራእይ እዚ ጴጥሮስ ካብ ሰማይ ጨርቂ ክወርድ ረኣየ። እስራኤላውያን ክበልዕዎም ዘይፍቀደሎም እንስሳታት ዝተመልአ ጨርቂ እዩ ነይሩ። ኮይኑ ግና ካብ ሰማይ ዝመጸ ድምጺ ነቲ እንስሳ ሓሪዱ ክበልዖ ነገሮ። ጴጥሮስ “ርኹስ እንስሳ ኣይበልዕን” ኢሉ ምስ መለሰ ግና፡ እቲ ድምጺ ብኡንብኡ “ኣምላኽ ዘንጽሆ ርኹስ ኢዩ ኣይትበል” በሎ። ጴጥሮስ ነዚ ራእይ እዚ ሰለስተ ሳዕ ረኣዮ። ኣብ መወዳእታ ትርጉም ናይዚ ራእይ ንዝኾነ ሰብ ርኹስ ኢዩ ከይብል ከምዝኮነን፡ ንኹሉ ሰብ ግን ብዛዕባ የሱስ ምንጋር ምዃኑ ተረድአ። ኣብታ ህሞት እቲኣ፡ ኣጋይሽ ናብቲ ዝሓድርሉ ዝነበረ ገዛ መጺኦም ምስኦም ናብ ገዝኦም ክኸይድ ሓተትዎ። እቶም ኣጋይሽ እስራኤላውያን ኣይነበሩን። ይኹን እምበር፡ ኣምላኽ ንጴጥሮስ ብሓጎስ ኪቕበሎም ከም ዘለዎ ኣቐዲሙ ብራእይ ብንጹር ገሊጹሉ ነበረ።

ስለዚ ናብቲ ዝነብረሉ ቤት ዓደሞም። ብሓንሳብ ምስ በልዑ ድማ ምሳታቶም ከደ።

ኣምላኽ ንጴጥሮስ ራእይ ምስ ኣርኣዮ

ግብሪ ሃዋርያት 10

ጴጥሮስ ምስቶም ዝመጹ ኣጋይሽ ናብ ገዛ ሓደ ሮማዊ ሰብኣይ በጽሐ። እዚ ሕያዋይ ሮማዊ ኩሉ ግዜ ዝጽልን ንእግዚኣብሄር ዘክብርን ሰብ ኢዩ ነይሩ። ንሱ ግና የሱስ መድሓኒ ምዃኑ ኣይፈለጠን ነበረ። እቲ ሰብኣይ መልእኽቲ ጴጥሮስ ብሓባር ክሰምዑ ንኣዝማዱ ዓደሞም። ጴጥሮስ ነቶም ዝተኣከቡ ሰባት የሱስ መድሓኒ ምዃኑ ምሂርዎም። እና መሃሮም ከሎ፡ እግዚኣብሔር ንኦኦም እውን መንፈስ ቅዱስ ሃቦም። ብድሕሪ እዚ ንኣታቶም ንኽጥመቁ ምውሳን ኣጸጋሚ ኣይነበረን።
ስለዚ እቲ ሮማዊን ኣዝማዱን ተጠመቑ።

ነገር ግን እቶም ኣብ የሩሳሌም ዝነበሩ እስራኤላውያን ክርስትያናት ነዚ ምስ ሰምዑ ንጴጥሮስ ተቓወምዎ። ብዚ ምክንያት፡ ጴጥሮስ ከመይ ገይሩ ኣምላኽ ናብቶም እስራኤላውያን ዘይኰኑ ከም ዝመርሖ ነገሮም። ንሱ ድማ “ኣምላኽ ከምቲ ንዓና መንፈሱ ሒቡና ዝነበረ ከምኡ ድማ ንዓኣቶም ሂብዎም” ኢሉ ገለጸሎም። ኣምላኽ ነቶም እስራኤላውያን ዘይኮኑ እውን ከድሕኖም ከም ዝደሊ ምስ ተረድኡ፡ ኣብ መወዳእታ ንኣምላኽ ኣመስገኑ።

እቲ ሮማዊ ሰብኣይ ኣብ ቅድሚ ጴጥሮስ ክሰግድ ከሎን ጴጥሮስ ከይሰግደሉ ክክልክሎ ከሎን

ግብሪ ሃዋርያት 12

ሄሮድስ ዝተባህለ ንጉስ ንገለ ክርስትያናት ከይበደሉ ክኣስሮም ጀመረ። ንጴጥሮስ እውን ኣብ ቤት ማእሰርቲ ኣእተዎ። ንሱ ውን ብሰንሰለት ተኣሲሩ፡ ብብዙሓት ሓለውቲ ይሕሎ ነበረ። ኣብቲ ግዜ እቲ፡ ክርስትያናት ተኣኪቦም ስለ ጴጥሮስ ኣበርቲዖም ይጽልዩ ነበሩ። ጴጥሮስ ኣብ ቤት ማእሰርቲ ኣብ ዝነበረሉ እዋን፡ ሃንደበት ብለይቲ ሓደ መልኣኽ ናብኡ መጸ። ተንሲኡ ድማ ናብ ደገ ክስዕቦ ነገሮ። እቲ ዝኣሰሮ ሰንሰለት ድማ ካብኡ ወደቐ። ማዕጾ ቤት ማእሰርቲ ድማ ብተኣምር ተኸፊቱ። ኣብቲ ግዜ እቲ፡ ጴጥሮስ ዝሓልም ዘሎ መሲልዎ ነበረ። ካብቲ ቤት ማእሰርቲ ወጻኢ ምስ ኰነ ግን፡ ብሓቂ ናጻ ምዃኑ ተረድአ። ድሕሪኡ ናብቶም ዝጽልዩሉ ዝነበሩ ሰባት ከደ። ንጴጥሮስ ምስ ረኣይዎ ድማ ኣዝዮም ተገረሙ። ከም ብሓድሽ ስለ ዝረኣይዎ ድማ ንኣምላኽ ኣመስገኑ።

ጴጥሮስ ምስ ኣረገ፡ ምእንቲ የሱስ ብዙሕ መከራ ተቀቢሉ ኢዩ። ይኹን እምበር፡ እግዚኣብሄር ወትሩ ምስኡ እዩ ነይሩ።

መልኣኽ እግዚኣብሄር ንጴጥሮስ ካብ ማእሰርቲ ሓራ ክገብሮ ክዛረቦን ከሎ

ግብሪ ሃዋርያት 13-28

ጳውሎስ ንሰባት ብዛዕባ የሱስ እናመሃረ ናብ ብዙሓት ሃገራት ምጉዓዙ ቀጸለ። ኣብ ዝኸዶ ቦታ ክምህር ከሎ ሰባት ብየሱስ ይኣምኑ ስለነበሩ፡ ብዙሓት ኣብያተ ክርስቲያናት ድማ ተመስረታ።

ድሕሪ ሒደት ዓመታት ንጳውሎስ ዝቓወምዎ ሰባት ናብ ቤት ማእሰርቲ ኣእተውዎ። ንፍርዲ ኣብ ቅድሚ እቲ ዳኛ ደው ምስ በለ፡ ንገሊኦም መራሕቲ መንግስቲ ብዛዕባ የሱስ ነገሮም። ኣብ መወዳእታ ድማ እሱር ኰይኑ ብመርከብ ናብ ከተማ ሮማ ከደ። ይኹን እምበር፡ እታ ዝነበረላ መርከብ ብብርቱዕ ማዕበል ተሰባቢራ። እግዚኣብሄር ግና ንጳውሎስን ንዅሎም እቶም ኣብታ መርከብ ዝነበሩን ሰባት ካብ ጥፋአት ኣድሒንዎም እዩ። ኣብ መወዳእታ ጳውሎስ ኣብ ሮማ በጽሐ። ኣብ ሮማ እሱር ኣብ ዝነበረሉ እዋን፡ ንኣጋይሽ ክቅበል ይፍቀደሉ ነበረ። ኣብቲ ግዜ እቲ ንዝተፈላለዩ ኣብያተ ክርስቲያናት ንመንፈሳዊ ህይወት ዝጠቅሙ ብዙሓት ደብዳቤታት ጽሒፉ። ብዙሓት ካብዘን ደብዳቤታት እዚኣተን ንህይወትና እውን ጠቐምቲ ስለ ዝዀና፡ ኣብ መጽሓፍ ቅዱስ ተኻቲተን እየን።

ጳውሎስ ኣብ ሮማ እሱር ከሎ ኣጋይሽ ክቕበልን ከሎ

ራእይ ዮሃንስ፡ ማቴዎስ 25

ሃዋርያ ዮሃንስ ንሰማይ ማለት ነቲ ኣምላኽ ዝነብረሉ ቦታ ብራእይ ረኣየ። ብሓጎስን ፍቕርን ዝተመልአ ጽብቕቲ ስፍራ ከም ዝኾነ ርእዩ። እቲ ጎደናታት ብወርቂ ዝተሰርሐ እዩ። ሕማምን ሞትን ሓዘንን ውግእን ሰይጣንን ኣብኡ የለን። ኣብቲ ስፍራ ዘሎ ንጉስ ድማ የሱስ ኢዩ።

ዮሃንስ ዝራዮ ኩሉ ኣብ መጽሓፍ ራእይ ጽሒፍዎ። ኣብዛ መጽሓፍ እዚ ዝተጸሓፉ ትንቢታት ኪፍጸም ምስ ጀመረ፡ ንሰባት ዝያዳ ንጹር እንዳ ኾነ ክመጽዕ ኢዩ።

ሕጂ ውን የሱስ ገንሸል ኣምላኽን ንጉስ ነገስታትን ምዃኑ ንፈልጥ ኢና። ንሱ ካብ ካልኦት ሓያላት ኩሉ ይዓቢ። ዳግማይ ናብ ምድሪ ተመሊሱ ክመጽእ እዩ። እንተ ኮነ ግን መዓስ ከም ዝመጽእ ብልክዕ ዝፈልጥ ሰብ የለን። ምስ ተመልሰ ግና ንሕሱማት ሰባት ከም ዝፈርዶም ንፈልጥ ኢና። ደቁ ግን ናቱ ስለዝኮኑ ነዚ ፍርዲ ኣይፈርህዎን እዮም። የግዳስ፡ መድሓኒኦም ምስ ረኣዩ ክሕጐሱ እዮም። ገንሸል ኣምላኽ፡ የሱስ ንደቁ ብሓጎስ ይቕበሎም እምበር፡ ኣይፈርዶምን እዩ።

ሕጂ እውን እንተኾነ፡ የሱስ ኩሉ ግዜ ምስ ደቁ እዩ።

የሱስ ጎይታ ጎይቶት ኮይኑ ብኽብርን ብሓይልን ክምለስ ከሎ