tig-66

ሉቃስ 22፥7-30

ኢየሱስ ጴጥሮስን እና ዮሐንስን የእስራኤላውያንን የፋሲካ በዓል ለማክበር ቦታ እንዲያዘጋጁ ላካቸው። እነርሱም የት ቦታ ማድርግ እንደሚፈልግ ሲጠይቁት፥ እርሱ “ኢየሩሳሌም በገባችሁ ጊዜ፥ ውሃ የተሸከመ ሰው ታገኛላችሁ። ወደ ሚገባበት ቤት ተከትላችሁ ለፋሲካ እራታችን የሚመች ክፍል ጠይቁት!” አላቸው። እነርሱም ሄደው ሁሉን ነገር ኢየሱስ እንደተናገረው ሆኖ አገኙ። የቤቱም ባለቤት ደህና ክፍል አሳያቸው። እነርሱም በዚያ ለበዓሉ ዝግጅት አደረጉ።

በኋላም ኢየሱስ እና አሥራ ሁለቱ ሐዋርያት በክፍሉ የፋሲካን እራት አብረው በሉ። በዚያም በቅርብ ጊዜ እንደሚሞት ነገራቸው። እርሱም እንደ ፋሲካው ዳቦ እንደሚቆረስ እና ደሙም እንደ ወይን እንደሚፈስ በምሳሌ ገለጸላቸው። እስራኤላውያንንም የፋሲካው የበግ ደም በግብጽ ከሞት እንዳዳናቸው፥ የእርሱም ሞት ሰዎችን ከዘለአለም ሞት የሚያድን መሆኑን ኢየሱስ ያውቅ ነበር።

ኢየሱስ ከመሞቱ በፊት ከሐዋርያቱ ጋር ለመጨረሻ ጊዜ አብረው ሲበሉ

ዮሐንስ 13፥1-17

ኢየሱስ ከሐዋርያቱ ጋር በፋሲካ እራት ጊዜ እግራቸውን ለማጠብ ተነሣ። ጴጥሮስ ግን ጌታ ኢየሱስ ለምን ይህን ማድረግ እንደፈለገ አልገባውም ነበር። ስለዚህ ኢየሱስን
“አንተ እግሬን አታጥበኝም” አለው። ኢየሱስም እግሩን በእርሱ መታጠቡ አስፈላጊ መሆኑን አስረዳው። ጴጥሮስም በዚህ ከተስማማ በኋላ፥ ኢየሱስ እግሩን አጠበው። ጌታችን ኢየሱስ ታላቅ አስተማሪ እና አምላክ ቢሆንም፥ ተከታዮቹን በትሕትና ዝቅ ብሎ መልካም በማድረግ አገለገላቸው። እርሱ ምሳሌ ሆኖ ለእነርሱ እንዳደረገ እነርሱም ደግሞ እርስ በርሳቸው እንደዚሁ እንዲያደርጉ ነገራቸው።

ጌታ ኢየሱስ የሐዋርያቱን እግር ሲያጥብ

ዮሐንስ 15፥1-12

ኢየሱስ ለተከታዮቹ “እኔ እንደ ወይን ተክል ነኝ፥ እናንተ ደግሞ እንደ ቅርንጫፎቼ ናችሁ። ከእኔ ከተለያችሁ ምንም ማድረግ አትችሉም” አለ። ስለዚህ ከእርሱ ጋር ከሆነን እንደ ሰላም፥ ደስታ፥ ፍቅር፥ ታማኝነት፥ ትዕግሥት ዐይነት መልካም ፍሬ እናፈራለን። እግዚአብሔርም እኛን እንደ ወይን ቅርንጫፍ ብዙ መልካም ፍሬ እንድናፈራ ይንከባከበናል።

ኢየሱስ በተጨማሪም “እኔ እንደወደድኳችሁ፥ እናንተም እርስ በርሳችሁ ተዋደዱ!” ብሎ ተከታዮቹን አዘዛቸው።

ኢየሱስን መውደድ ማለት የተናገረውን ቃል ማድርግ ነው።

አትክልተኛው ፍሬ የማያፈራውን ቅርንጫፍ ሲቆርጥ

ሉቃስ 22፥39-53

ኢየሱስ ከፋሲካ እራት በኋላ ኢየሩሳሌም ከተማ አጠገብ ወዳለው ደብረ ዘይት ወደ ተባለ ተራራ ወጣ። እዚያም ሐዋርያቱን ወደ ፈተና እንዳይገቡ እንዲፀልዩ ነገራቸው። እርሱም በቅርቡ የሚደርስበትን መከራ ስላወቀ በጣም ፈራ። ተንበርክኮ እንዲህም ሲል ጸለየ፡- “አባቴ፥ ሊመጣብኝ ወዳለ መከራ ውስጥ እንዳልገባ እባክህ ጠብቀኝ። ነገር ግን እኔ የምፈልገውን* ሳይሆን፥ ያንተ ፈቃድ እንዲሆን እፈልጋለሁ” አለ። የዚያን ጊዜ የእግዚአብሔር መልአክ መጥቶ አበረታው። ኢየሱስ ከጸለየ በኋላ ወደ ሐዋርያቱ መጣ። እነርሱ ግን መጸለይ ቢፈልጉም፥ ደክሟቸው ስለነበር ተኝተው አገኛቸው። ስለዚህ ኢየሱስ በዚህ በመከራው ሰዓት ብቻውን ነበር።

ብዙም ሳይቆይ ከሐዋርያቱ አንዱ ይሁዳ የተባለው ሰው፥ ኢየሱስን መያዝ ለሚፈልጉ ሰዎች መንገድ እየመራቸው መጣ። እነርሱም ወዲያውኑ ይዘውት ወደ ካህናት አለቃ ቤት ወሰዱት።

ኢየሱስ ከመሞቱ በፊት በጣም ፈርቶ ሲጸለይ እና ሐዋርያቱ ሲተኙ

ሉቃስ 22፥54-62

ጴጥሮስ ኢየሱስን ለፍርድ ይዘውት ሲሄዱ ከሩቅ ሆኖ ተከተለው። እርሱም ኢየሱስ ወደ ገባበት ግቢ ገብቶ እሳት ይሞቁ ከነበሩ ሰዎች ጋር ተቀመጠ። ከጥቂት ጊዜ በኋላ አንድ ሰራተኛ አየችውና “ይህም ሰው ኢየሱስን ይከተል ነበር” አለች። ጴጥሮስም ስለፈራ “ትክክል አይደለም፥ እኔ አላውቀውም” ብሎ መለሰ። ደግሞም ሌሎች ሁለት ሰዎች ተራ በተራ “አንተም ከእርሱ ጋር ነበርህ” አሉት። ጴጥሮስ ግን ለሁለቱም “እኔ ይህንን የምትሉትን ሰው አላውቀውም” ብሎ ለሦስተኛ ጊዜ ሲክድ ዶሮ ጮኸ። ወዲያውም ኢየሱስ ጴጥሮስን ተመለከተ። ጴጥሮስም አስቀድሞ “ዶሮ ሳይጮኽ ሦስት ጊዜ ትክደኛለህ” ያለው ቃል ትዝ አለው። ኢየሱስንም ስለካደ ከግቢው ወጥቶ በጣም አለቀሰ።

ጴጥሮስ ስለፈራ “ኢየሱስን አላውቀውም” ብሎ ሲክደ

ሉቃስ 22፥66 – 23፥25

በማለዳም ኢየሱሰን የእስራኤል መሪዎች ለፍርድ አቀረቡት። በዚያም ብዙ ጥያቄዎችን እየጠየቁ መረመሩት። ክፉ ነገር ባያድርግም፥ በውሸት ወንጀለኛ አደረጉት። ኢየሱስም በቅርብ* ጊዜ በእግዚአብሔር አጠገብ በዙፋን ላይ እንደሚቀመጥ ነገራቸው። በዚህ ምክንያት “እግዚአብሔርን ሰደበ” ብለው ወደ ሮም መንግሥት ተወካዮች ወሰዱት። በእነርሱም ፊት ኢየሱስን ደግመው ከሰሱት። ሆኖም እነርሱም ምንም ዐይነት ጥፋት አላገኙበትም። ኢየሱስ ግን በሁሉም ፊት እንደ በግ ዝም አለ። ምክንያቱም እርሱ ለሰው ልጅ ኃጢያት ሁሉ የተዘጋጀ የእግዚአብሔር በግ ነው። በመጨረሻም አብዘኞቹ መሪዎች በአንድነት ኢየሱስ መሞት እንዳለበት ተስማሙ።

የእስራኤል መሪዎች ኢየሱስን መሞት እንዳለበት በሮም መንግሥት ተወካይ ፊት ሲከሱት

ሉቃስ 23፥33-49 + ማቴዎስ 27፥33-56

ከዚያ በኋላ ወታደሮች ኢየሱስን ይዘውት ከከተማ ወጡ። በሁለት ወንጀለኞች መካከል በመስቀል ላይ እጁን እና እግሩን በምስማር አጣብቀው ሰቀሉት። ከወንጀለኞቹ አንዱ በኢየሱስ ላይ መጥፎ ንግግር ተናገረ። ሌላኛው ግን ኃጢአተኛ መሆኑን አውቆ በሚመጣው መንግሥቱ ምሕረት እንዲያደርግለት ጠየቀው። ኢየሱስም ወንጀለኛውን ይቅርታ አድርጎለት “ዛሬ ከእኔ ጋር በሰማያዊ ስፍራ ትሆናለህ” አለው።

ኢየሱስ በተሰቀለ ጊዜ ከቀኑ 6 ሰዓት እስከ 9 ሰዓት ድረስ ጨለመ። በመስቀልም ላይ እያለ ሞተ። በዚህ ጊዜ መሬት ተንቀጠቀጠ፥ እንዲሁም ወደ ቤተ መቅደስ ውስጠኛ ክፍል መግቢያ የነበረው መጋረጃ ከላይ ወደታች ተቀደደ። ይህ የሚያሳየው በኃጢያት ምክንያት ዝግ የነበረው ወደ እግዚአብሔር የሚወስደው መንገድ ለሁሉም ሰው መከፈቱን ነው።

ኢየሱስ ምንም ጥፋት ሳይኖርበት ስለእኛ ኃጢያት በመስቀል ላይ ሲሞት

ማቴዎስ 27፥57 – 28፥10

ኢየሱስ ከሞተ በኋላ፥ እርሱን በድብቅ ይከተል የነበረ መልካም ሰው፥ አስከሬኑን ወስዶ በአዲስ መቃብር ውስጥ አስቀመጠው። ይህ የሆነው አርብ ከሰአት በኋላ ነበር። ቅዳሜ የእረፍት ቀን ስለነበር፥ ማንም ሰው ወደ መቃብር አልሄደም። እሁድ በማለዳ አንዳንድ ሴቶች የኢየሱስን አስከሬን ሽቶ ሊቀቡ ወደ መቃብር ቦታ ሄዱ። በመቃብሩም ቦታ መልአክ ተገለጠ። በዚህ ምክንያት መሬቱ* ተንቀጠቀጠ፥ የኢየሱስ መቃብር የተዘጋበት ትልቅ ድንጋይም ተንከባለለ፥ እንዲሁም መቃብሩን ሲጠብቁ የነበሩ ጠባቂዎች በፍርሀት እንደሞተ ሰው ሆነው ወደቁ።

በዚህ ጊዜ መልአኩ ለሴቶቹ “አትፍሩ! ኢየሱስ አስቀድሞ እንደተናገረ ከሞት ተነስቷል። ቶሎ ሄዳችሁ ለተከታዮቹ ይህንን የምስራች ንገሯቸው!” አላቸው። ሴቶቹም ኢየሱስ በመቃብሩ ውስጥ እንደሌለ አዩ። በፍጥነትም ወደ ኢየሱስ ተከታዮች ሄዱ። በመንገድም እያሉ ኢየሱስ በድንገት ታያቸው። ስለዚህ በደስታ ተሞልተው መልካሙን ዜና ለተከታዮቹ ተናገሩ። እነርሱም በጣም ተገረሙ። ወዲያውኑ ግን አላመኗቸውም ነበር።

በመቃብር ቦታ ጠባቂዎቹ በፍርሀት ወድቀው፥ መልአኩ ለሴቶች “ኢየሱስ ተነስቷል” ሲላቸው

ሉቃስ 24፥36-43

ከዚህም በኋላ ኢየሱስ ለተከታዮቹ ታየ። እነርሱም በመጀመሪያ ሲያዩት፥ የሞተ ሰው መንፈስ መሰሏቸው ነበር። ኢየሱስ ግን በእውነት ከሞት ተነስቶ እንጂ፥ መንፈስ አልነበረም። ስለዚህ በእግሮቹ፥ በእጆቹ እና በጎኑ ላይ የነበረው ቁስሎችን አሳያቸው። እንዲያምኑም በእጃቸው እንዲነኩት ጠየቃቸው። በተጨማሪም በፊታቸው የተጠበሰ ዓሣ በላ። ይህን ሁሉ ባዩ ጊዜ በእውነት ኢየሱስ ከሞት እንደተነሳ አወቁ። በዚህም ምክንያት በደስታ ተሞሉ።

ተከታዮቹ ኢየሱስ ከሞት ከተነሳ በኋላ ሲያገኙት

ዮሐነስ 21፥1-17

አንድ ሌሊት ጴጥሮስ ከአንዳንድ ሐዋርያት ጋር ዓሳ ለማጥመድ ሄደ። ሌሊቱን ሙሉ ግን ምንም ዓሳ አልያዙም። በማለዳም በሐይቁ ዳርቻ ኢየሱስን ቆሞ አዩት። ማን እንደሆነ ግን ገና አላወቁም ነበር። ኢየሱስም “ከጀልባው በቀኝ በኩል መረቡን ጣሉት። ዓሳም ታገኛላቸሁ” አላቸው። እርሱም እንዳላቸው ባደረጉ ጊዜ፥ ጀልባዋ መያዝ እስከማትችል ድረስ ብዙ ዓሳ ያዙ። ከዚህም በኋላ በባሕሩ ዳር የቆመው ሰው ኢየሱስ መሆኑን አወቁ።

ኢየሱስም በእሳት ላይ ዓሣ ጠብሶ በዳቦ አበላቸው። እነርሱም ምግብ ከበሉ በኋላ፥ ጴጥሮስን አነጋገረው። ጴጥሮስ ስህተት ያለበት ሰው ቢሆንም፥ ኢየሱስን ግን ይወደው ነበር። ስለዚህ ለተከታዮቹ ጥሩ እረኛ እንዲሆን ሾመው።

ኢየሱስም በሐይቅ ዳር ለሐዋርያት ቁርስ አዘጋጅቶ በድጋሜ ሲታያቸው

ሉቃስ 24፥44-49

ኢየሱስ ከሞት ተነስቶ ወደ ሰማይ ከመሄዱ በፊት ለመጨረሻ ጊዜ ለተከታዮቹ ስለ እግዚአብሔር ቃል አስተማራቸው። በትምህርቱም ይመጣል ብለው ሲጠበቁት የነበረው አዳኝ እርሱ እንደሆነ አስረዳቸው። በተጨማሪም ሞቶ ከሞት መነሣትም እንደነበረበት ገለጸላቸው። በዚህ መንገድ እንጂ፥ ሰዎችን ለማዳን ሌላ አማራጭ አልነበረም። ነቢያትም ስለዚህ ጉዳይ ከብዙ መቶ ዓመታት በፊት ጽፈው ነበር።

ስለዚህ አሁን በኢየሱስ የሚታምኑ ሰዎች ሁሉ ከጥፋት መዳን ይችላሉ። እግዚአብሔርም ይቅር ሊላቸው ይፈልጋል። ኢየሱስ ተከታዮቹን ይህንን የእግዚአብሔር ምሕረትን የያዘ መልእክት ወደ ዓለም ሁሉ ሄደው፥ ለማንኛውም ሰው እንዲናገሩ አዘዛቸው።

ኢየሱስ ተከታዮቹን መልካሙን መልእክት ለሰዎች ሁሉ እንዲናገሩ ሲያዛቸው

የሐዋርያት ሥራ 1፥1-14 + ማቴዎስ 28፥16-20 + ዮሐንስ 14

ኢየሱስ “መንፈስ ቅዱስ ሲመጣ ይረዳችኋል፥ ያጽናናችኋል፥ ደግሞም ያስተምራችኋል” ብሎ አስቀድሞ አስተምሮ ነበር። በመጨረሻም ለተከታዮቹ
“በቅርብ ጊዜ መንፈስ ቅዱስን እልክላችኋለሁ። እርሱም ስለ አዳኝነቴ እና ምሕረቴ እንድትናገሩ ይረዳችኋል። ስለዚህ እርሱ እስኪመጣ ድረስ በኢየሩሳሌም ቆዩ!” ብሎ ነገራቸው።

ወደ ሰማይም ከመሄዱ በፊት “ሁልጊዜ ከእናንተ ጋር እሆናለሁ” አላቸው። ከዚያም ኢየሱስ እጆቹን አንሥቶ ባረካቸው። እነርሱም እያዩት ሳለ ወደ ሰማይ ተወሰደ። ወደ አባቱም ወደ እግዚአብሔር ተመልሶ በጎኑ በዙፋን ላይ ተቀመጠ። እርሱ ለዘለአለም ጌታ ነው። ወደ ላይ እንደ ወጣ እንደዚሁ አንድ ቀን ወደዚህ ዓለም ተመልሶ ይመጣል።

ኢየሱስ ወደ ሰማይ ከሄደ በኋላ፥ ተከታዮቹ ወደ ኢየሩሳሌም ተመለሱ። እግዚአብሔርን እያመሰገኑ እና እየጸለዩ የመንፈስ ቅዱስን መምጣት እየጠበቁ ቆዩ።

ኢየሱስ ይህንን ዓለም ትቶ ወደ እግዚአብሔር አብ ሲመለስ

የሐዋርያት ሥራ 2፥1-12 + 1ኛ ቆሮንቶስ 12፥7

ከጥቂት ቀናት በኋላ የኢየሱስ ተከታዮች አብረው በአንድ ቦታ ሳሉ፥ መንፈስ ቅዱስ መጣ። በዚህ ጊዜ በድንገት ከሰማይ ኃይለኛ የሆነ የነፋስ ድምፅ ሰሙ። ደግሞ በእያንዳንዳቸው ላይ ትናንሽ እሳት የሚመስል ነበልባል ተቀመጠባቸው። ነገር ግን አላቃጠላቸውም። ምክንያቱም የእግዚያብሔር መንፈስ የተሰጠው ሰውን ሊረዳ እንጂ፥ ሊጎዳ አይደለም። ወዲያውም በማያውቁት በተለያዩ ሀገር ሰዎች ቋንቋ መናገር ጀመሩ። እነዚህን ቋንቋዎች እንዲናገሩ የእግዚአብሔር መንፈስ ሰጥቷቸው ነበር። ከተላያዩ ሀገራት የመጡ ሰዎችም በሚያውቁት ቋንቋ ስለ እግዚአብሔር ስራ ሲናገሩ ሰምተው ተገረሙ።

ከዚህም በኋላ በመንፈስ ቅዱስ ኃይል እና ስጦታ በተሻለ ሁኔታ እርስ በርሳቸው መተናነጽ እና መረዳዳት ቻሉ። የመንፈስ ቅዱስ ኃይል ለራሳቸው ክብር ሳይሆን፥ ለእግዚአብሔር ክብር የተሰጠ ነው።

የእግዚአብሔር መንፈስ ወደ ክርስትያኖች ሲመጣ

የሐዋርያት ሥራ 2፥14-47

መንፈስ ቅዱስ ከመጣ በኋላ፥ ጴጥሮስ ሳይፈራ ለተሰበሰበው ሕዝብ ለመናገር ተነሳ። ለእነርሱም ይህ ያዩት እና የሰሙት አስደናቂ ነገር የመንፈስ ቅዱስ መምጣት እንደሆነ አስረዳቸው። ኢየሱስም ሞትን አሸንፎ እንደተነሳ እና ሰው ሁሉ የሚድነው በእርሱ በማመን እንደሆነ አስተማረ። ይህንን የጴጥሮስ ስብከት የሰሙ ብዙ ሰዎችም በኢየሱስ አምነው ተጠመቁ።

በኢየሱስም ያመኑ ሰዎች አብረው በመጸለይ እና አንድ ለይ በመብላት በሰላም ይኖሩ ነበር። ያላቸውን ገንዘብ በአንድ ላይ ስላደረጉ ችግረኛ በመካከላቸው አልነበረም። እርስ በርሳቸውም በደስታ በጣም ይረዳዱ ነበር። ይህንን መልካም ስራቸውን ህዝቡ ስላዩ፥ በፊታቸው ሞገስን አገኙ።

ጴጥሮስ ለሕዝቡ የእግዚአብሔርን ቃል ሲያስተምር

የሐዋርያት ሥራ 3

በኢየሩሳሌም ሰዎች ሁሉ የሚያውቁት ከመወለዱ ጀምሮ ሽባ የሆነ አንድ ሰው ነበር። በየቀኑ በቤተ መቅደስ መግቢያ ተቀምጦ ገንዘብ ይለምን ነበር። አንድ ቀን ጴጥሮስ ባየው ጊዜ “የምሰጥህ ገንዘብ የለኝም። ነገር ግን በጌታ በኢየሱስ ስም ተነሳ እና ተራመድ!” አለው። ሽባውም ሰው ወዲያውኑ ተፈውሶ መራመድ ጀመረ። እየዘለለም እግዚአብሔርን በደስታ አመሰገነ። በዚህ ምክንያት ብዙ ሰዎች በጴጥሮስ እና በተፈወሰው ሰው ዙሪያ ተሰበሰቡ። በዚህ ጊዜ ጴጥሮስ ሽባውን የፈወሰው ኢየሱስ እንደሆነ በማስረዳት ክብርን ሁሉ ለእርሱ ሰጠ። ደግሞም ኢየሱስ አዳኝ እንደሆነ ነገራቸው።

ጴጥሮስ ለሽባው በኢየሱስ ስም እንዲነሳ ሲነግረው እና ኢየሱስ ሲፈወሰው

የሐዋርያት ሥራ 8፥26-40

ፊልጶስ የእግዚአብሔር ሰው ነበር። አንድ ቀን እግዚአብሔር ወደ ደቡብ እስራኤል እንዲሄድ ነገረው። ስለዚህ ፊልጶስ ወደዚያ ሄደ። በመንገድም እየሄድ ሳለ በጋሪ-ፈረስ ላይ አንድ ሰው አየ። እርሱም ከኢትዮጵያ እግዚአብሔርን ለማምልክ የመጣ የመንግሥት ባለሥልጣን ነበር። በመንገድም እያለ በነቢዩ ኢሳይያስ ስለ እግዚአብሔር በግ የተጻፈውን ክፍል እያነበበ ነበር። የተጻፈው ግን ስለምን ጉዳይ እንደሚናገር ግልጽ አልሆነለትም። ፊልጶስም ይህንን ሲያነብ በሰማው ጊዜ ቀርቦ አስረዳው። ኢየሱስ የእግዚአብሔር በግ እንደሆነ እና ከጥፋት ሁሉ ነፃ እንደሚያወጣ አስተማረው። ኢትዮጵያዊው ይህን ሰምቶ በኢየሱስ አምኖ ተጠመቀ። ከዚያ በኋላ ፊልጶስ በመንፈስ ቅዱስ ኃይል ወዲያውኑ ተወስዶ በሌላ ቦታ ታየ። ባለሥልጣኑ ግን በደስታ ወደ ኢትዮጵያ ተመለሰ።

ፊልጶስ ከኢትዮጵያዊው ሰው ጋር ስለ ኢየሱስ ሲነጋገር

የሐዋርያት ሥራ 9

ሳውል እግዚአብሔርን ትክክል ባልሆነ ሐሳብ ለማገልገል በጣም የሰራ ሰው ነበር። ስለዚህ የኢየሱስ ተከታዮችን የተሳሳተ መንገድ የሚከተሉ ስለመሰለው አሳደዳቸው። በሳውልም ምክንያት ብዙ ክርስትያኖች ከኢየሩሳሌም ሸሽተው ወጡ።

አንድ ቀን ሳውል ክርስትያኖችን ለማሳደድ ወደ ሌላ ከተማ ይሄድ ነበር። በመንገድ ላይ እያለ ኢየሱስ ተገልጦ አስቆመው። ሳውልም በድንገት በዙርያው ታላቅ ብርሃን ሲያንፀባረቀበት ወደቀ። ኢየሱስን “ሳውል! ለምን ታሳድደኛለህ?” ሲል ሰማው። ከዚህ በኋላ ሳውል ከመሬት ሲነሳ ዓይኖቹ ታውረው ነበር። ከሦስት ቀን በኋላ እንዲጸልይለት እግዚአብሔር ከክርስቲያኖች አንዱን ወደ ሳውል ላከ። የመጣው ሰው ከጸለየለት በኋላ፥ እንደገና ማየት ቻለ።

በዚህ መንገድ የሳውል ሕይወት ተለውጦ የኢየሱስ ተከታይ ሆነ። ስሙም ከዚያን ጊዜ ጀመሮ ጳውሎስ ተባለ።

ኢየሱስ ለሳውል ተገልጦ ሲያስቆመው

የሐዋርያት ሥራ 9 + ተጨማሪ ምዕራፎች

ጳውሎስ ኢየሱስ የእግዚአብሔር ልጅ እንደሆነ ከተረዳ በኋላ፥ መኩራብ በሚባለው በእስራኤላውያን የጸሎት ቤቶች ስለ ኢየሱስ መስበክ ጀመረ። በተጨማሪም ወደ ሩቅ ሀገሮች በመሄድ ሌሎች ሕዝቦችን አስተማረ። አንዳንዶች ስለ ኢየሱስ ሲያስተምር፥ በደስታ ይሰሙት እና በኢየሱስ ያምኑ ነበር። አንዳንድ ሰዎች ግን የእርሱን መልእክት መስማት ስላልፈለጉ ተቃወሙት። እርሱ ግን አገልገሎቱን አላቆመም። በእግዚአብሔርም ኃይል ብዙ ተአምራትን አደረገ። በዚህም ብዙ ሰዎች እግዚአብሔር እንደሚወዳቸው እና የእግዚአብሔር ቃል እውነት እንደሆነ አወቁ።

ጳውሎስ የእግዚአብሔርን ቃል ሲያስተምር

የሐዋርያት ሥራ 10

አንድ ቀን ጴጥሮስ እየጸለየ ሳለ፥ ከእግዚአብሔር ራእይ አየ። ይህም ራእይ ሕልም የሚመስል እንቅልፍ ሳይተኛ የሚታይ ነው። በዚህም ራእይ ጴጥሮስ ከሰማይ የወረደ ጨርቅ አየ። ለእስራኤላውያን ለመብላት ያልተፈቀዱ እንስሳትን የተሞላ ጨርቅ ነበር። ቢሆንም፥ ከሰማይ አንድ ድምፅ እንሰሳቱን አርዶ እንዲበላ ነገረው። ጴጥሮስ ግን “ርኩስ እንሰሳትን አልበላም” ብሎ ሲመለስ፥ ወዲያው ድምፁ  “እግዚአብሔር ንጹሕ ያደረገውን ርኩስ ነው አትበል” ብሎ ተናገረው። ጴጥሮስም ይህንን ራእይ ሦስት ጊዜ አየ። የዚህ ራእይ ትርጉም ማንንም ሰው እርኩስ እንዳይል ሲሆን፥ ደግሞም ስለ ኢየሱስ ለሰዎች ሁሉ እንዲናገር መሆኑን በመጨረሻ ተረዳ። ልክ በዚያን ሰዓት እንግዶች ወደ ሚኖርበት ቤት መጡ እና ከእነርሱ ጋር ወደ ቤታቸው እንዲሄድ ጠየቁት። እንግዶቹ ግን እስራኤላውያን አልነበሩም። ሆኖም ግን ጴጥሮስ እነርሱን መቀበል እንዳለበት እግዚአብሔር አስቀድሞ በራእዩ ግልጽ አድርጎለት ነበር።

ስለዚህ ወደ ሚኖርበት ቤት ጋበዛቸው። አብረውም ከበሉ በኋላ፥ ከእነርሱ ጋር ሄደ።

እግዚአብሔር ለጴጥሮስ ራእይ ሲያሳየው

የሐዋርያት ሥራ 10

ጴጥሮስ ከመጡት እንገዶች ጋር ሮማዊ በሆነው ሰው ቤት ደረሰ። ይህ መልካም ሮማዊ ሁልጊዜ የሚፀልይ እና እግዚአብሔርን የሚያክብር ሰው ነበር። ነገር ግን ኢየሱስ አዳኝ እንደሆነ ገና አላወቀም ነበር። ሰውየውም የጴጥሮስን መልእክት አንድ ላይ እንዲሰሙ ዘመዶቹን ጋበዛቸው። ጴጥሮስም ለተሰብሰቡት ሰዎች ኢየሱስ አዳኝ እንደሆነ አስተማራቸው። እያስተማረም ሳለ፥ እግዚአብሔር መንፈስ ቅዱስን ለእነርሱም ደግሞ ሰጣቸው። ይህ ከሆነ በኋላ እነርሱን ለማጥመቅ መወሰን ከባድ አልነበረም። ስለዚህ ሮማዊው እና ዘመዶቹ ተጠመቁ።

ነገር ግን በኢየሩሳሌም የነበሩ እስራኤላዊ ክርስቲያኖች ይህንን ሲሰሙ ጴጥሮስን ተቃወሙት። በዚህ ምክንያት ጴጥሮስ እግዚአብሔር እርሱን እንዴት እስራኤላዊ ወዳልሆኑትን እንደመራው አስረዳቸው። እርሱም “እግዚአብሔር መንፈሱን ለእኛ ስጥቶ እንደነበር ለእነዚህም ሰዎች ሰጣቸው” ብሎ ገለጸላቸው። እግዚአብሔር እስራኤላዊ ያልሆኑትንም ደግሞ ሊያድን እንደወደደ ከተረዱ በኋላ፥ በመጨረሻ እግዚአብሔርን አመሰገኑ።

ሮማዊው ሰው በጴጥሮስ ፊት ሲሰገድ እና ጴጥሮስ ይህንን ሲከለክለው

የሐዋርያት ሥራ 12

ሄሮድስ የሚባል ንጉሥ አንዳንድ ክርስትያኖችን ምንም ሳያጠፉ ማሰር ጀመረ። ጴጥሮስንም እስር ቤት አስገባው። እርሱም በወፍራም ሰንሰለት ታስሮ፥ በብዙ ጠባቂዎች ይጠበቅ ነበር። በዚህ ጊዜ ክርስትያኖች ተሰብስበው ለጴጥሮስ በጣም ይጸልዩ ነበር። ጴጥሮስ በእስር ቤት እንዳለ፥ በሌሊት ድንገት አንድ መልአክ ወደ እርሱ መጣ። ተነሥቶም ወደ ውጭ እንዲከተለው ነገረው። የታሰረበትም ሰንሰለቶች ተፈተው ከላዩ ወደቁ። የእስር ቤቱ በሮችም በተአምር ተከፈቱ። በዚህ ጊዜ ጴጥሮስ ሕልም የሚያይ መስሎት ነበር። ነገር ግን ከእስር ቤት ውጭ በነበረበት ጊዜ በእውነት ነጻ መሆኑን ተረዳ። ከዚያም ሲፀልዩለት ወደ ነበሩት ወገኖች ሄደ። ጴጥሮስንም ባዩት ጊዜ በጣም ተገረሙ። እንደገና ስላዩትም እግዚአብሔርን አመሰገኑ።

ጴጥሮስ ካረጀ በኋላ፥ ስለ ኢየሱስ ብዙ መከራ ተቀበለ። ቢሆንም ሁልጊዜ እግዚአብሔር ከእርሱ ጋር ነበር።

ጴጥሮስን ከእስር ቤት ነፃ ለማውጣት የእግዚአብሔር መልአክ ሲያናግረው

የሐዋርያት ሥራ 13-28

ጳውሎስ ወደ ብዙ ሀገሮች እየተጓዘ ሰዎችን ስለ ኢየሱስ ማስተማሩን ቀጠለ። በየሄደበት ቦታም ሲያስተምር፥ ሰዎች በኢየሱስ ስላመኑ ብዙ ቤተ ክርስቲያናት ተመሰረቱ።

ከተወሰኑ ዓመታት በኋላ ጳውሎስን የሚቃወሙ ሰዎች ወደ እስር ቤት አስገቡት። ለፍርድም በዳኛ ፊት በቆመበት ጊዜ፥ ለአንዳንድ የመንግሥት መሪዎች ስለ ኢየሱስ ተናገረ። በመጨረሻም እስረኛ ሆኖ በመርከብ ወደ ሮም ከተማ ተጓዘ። ሆኖም ግን የነበረባት መርከብ በተነሳ ከባድ የንፋስ ማዕበል ተሰባበረች። እግዚአብሔር ግን ጳውሎስን እና በመርከቧ የነበሩትን ሰዎች ሁሉ ከጥፋት አዳናቸው። በመጨረሻም ጳውሎስ ሮም ደረሰ። በሮምም እስረኛ በነበረበት ጊዜ እንግዶችን እንዲቀበል ተፈቅዶለት ነበር። በዚያን ጊዜ ለተለያዩ ቤተ ክርስቲያናት መንፈሳዊ ሕይወት የሚጠቅሙ ብዙ ደብዳቤዎችን ጻፈ። ከእነዚህ ደብዳቤዎች ብዙዎቹ ለእኛም ሕይወት ጠቃሚ ስለሆኑ፥ በመጽሐፍ ቅዱስ ውስጥ ይገኛሉ።

ጳውሎስ በሮም እስረኛ በነበረበት ጊዜ እንግዶችን ሲቀበል

የዮሐንስ ራእይ፥ ማቴዎስ 25

ሐዋሪያው ዮሐንስ ሰማይን፥ ማለትም እግዚአብሔር ያለበትን ቦታ በራእይ አየ። ይህ ቦታ በደስታ እና በፍቅር የተሞላ ውብ ቦታ እንደሆነ ተመለከተ። መንገዶቹም ከወርቅ የተሠሩ ናቸው። በሽታ፥ ሞት፥ ሐዘን፥ ውጊያ ወይም ሰይጣን እዚያ የለም። በዚያም ሰፍራ ያለው ንጉሥ ኢየሱስ ነው።

ዮሐንስም ያየውን ሁሉ በራእይ መጽሐፍ ውስጥ ጻፈ። በዚህም መጽሐፍ የተጸፉት ትንቢቶች መፈጸም ሲጀምሩ ለሰዎች ግልጽ እየሆኑ ይመጣሉ።

አሁንም ኢየሱስ የእግዚአብሔር በግ እና የነገሥታት ንጉሥ እንደሆነ እናውቃለን። እርሱ ከሌሎቹ ኀያላን ሁሉ ይበልጣል። እንደገናም ተመልሶ ወደ ምድር ይመጣል። ነገር ግን መቼ እንደሚመጣ ትክክለኛውን ጊዜ ማንም ሰው አያውቅም። ሲመለስ ግን በክፉ ሰዎች ላይ እንደሚፈርድ እናውቃለን። የእርሱ የሆኑት ልጆቹ ይህንን ፍርድ አይፈሩም። ይልቁንም አዳኛቸውን ሲያዩ በጣም ይደሰታሉ። የእግዚአብሔር በግ፥ ኢየሱስ ልጆቹን ይቀበላቸዋል እንጂ፥ አይፈርድባቸውም።

አሁንም ቢሆን፥ ኢየሱስ ሁልጊዜ ከልጆቹ ጋር ነው።

ኢየሱስ የጌቶች ጌታ ሆኖ በክብር እና በኃይል ሲመለስ